بۇل تۋرالى ايبار ولجايەۆ فب پاراقشاسىنا جازدى.
“جۋرناليستيكانىڭ قۇرمەتتى ۇستازى، ءبارىمىزدى وقىتقان ارداگەر كاكەن قامزين اۋىر جاعدايعا دۋشار بولدى” دەپ جازعان ەدى شاكىرتى ءارى ارىپتەسىمىز ايبار ولجايەۆ.
اۆتوردىڭ جازباسىنا سۇيەنسەك، كاكەن قامزين قارتايعان شاعىندا جالعىز ۇيىنەن ايرىلىپ قالعالى تۇر.
الاياقتار ارداگەر جۋرناليست، پروفەسسوردىڭ سەنگىشتىگىن پايدالانىپ كينوداعىداي ارەكەت ەتكەن. الدىمەن ەنەرگوسبىت ادامدارى رەتىندە حابارلاسىپ، مەكەن-جايى، جسن، پاتەرى تۋرالى اقپاراتتى ءبىلىپ العان.
ارتىنان ۇلتتىق قاۋىپسىزدىك كوميتەتىنىڭ اتىن جامىلىپ، حابارلاسىپ، ءۇيىن بىرەۋلەر تارتىپ الايىن دەپ تۇرعانىن ايتىپ، تەز ساتۋعا كوندىرىپ، ال اقشانى ۇلتتىق بانكتىڭ ارنايى شوتىندا ساقتايسىز دەپ الداعان.
پروفەسسور نوتاريۋس ارقىلى ءۇيىن ساتىپ، اقشانى الاياقتار جىبەرگەن كۋرەرگە بەرە سالعان.
ءقازىر الماتى قالاسى اۋەزوۆ اۋداندىق پوليسيا دەپارتامەنتىندە قىلمىستىق ءىس قوزعالدى. الماتى قالاسىنىڭ پوليسيا دەپارتامەنتىنەن وسى رەزونانستى ىسكە بارىنشا جۇمىلۋدى سۇرايمىن. ىشكى ىستەر ءمينيسترى، قۇرمەتتى ەرجان سادەنوۆ، وسى ءىستى جەكە باقىلاۋعا الساڭىز نۇر ۇستىنە نۇر بولار ەدى.
سوت ارقىلى ءۇيدى ساتۋ مامىلەسىن زاڭسىز دەپ تانۋ ءۇشىن ادۆوكاتتاردىڭ كومەگى كەرەك. سىيلايتىن اعامىز ابزال قۇسپان كاسىبي كەڭەس بەرسە ۇلكەن كومەك بولادى.
پارلامەنت دەپۋتاتتارى، پروفەسسور شاكىرتتەرى جاناربەك ءاشىمجان، نارتاي سارسەنعالييەۆ، ماقسات تولىقباي، اردا جۋرناليست ەرمۇرات باپي وسى ءىستى نازارعا الىپ، ۇلكەن رەزونانس تۋعىزسا، پروفەسسوردى قورعاي الامىز.
ءدال ءقازىر كاكەن قامزين جالعىز، ۇيىندە بارريكادا قۇرىپ بەكىنىپ جاتىر. پاتەردى ساتىپ العاندار كەشكە، تۇندە كەلىپ قوقان-لوققى كورسەتكەن. ءىس ناسىرعا شاۋىپ بارادى، - دەپ جازدى اۆتور.