قالاعان مولشەردەگى زەينەتاقى الۋ ءۇشىن قانشا اقشا جيناۋ كەرەك؟
بجزق قازاقستاندىقتارعا اي سايىن زەينەتاقى قورىنا قانشا جارنا سالۋىن ءوزى تاڭداي الاتىن جاڭا قۇرال شىعاردى، دەپ حابارلايدى Almaty-akshamy.kz
2022-2026 جىلدارعا ارنالعان كورپوراتيۆتىك ستراتەگيانىڭ اياسىندا ۇسىنىلعان بۇل قۇرال جيناقتاۋشىلارعا بولاشاق زەينەتاقىسىن باسقارۋعا مۇمكىندىك بەرەدى. بۇل تۋرالى قوردىڭ باسپا ءسوز قىزمەتى حابارلادى.
قوردىڭ مالىمەتىنشە، بجزق الداعى ۋاقىتتاعى زەينەتاقىنى جوسپارلاۋدىڭ جاڭا قۇرالى – جەكە زەينەتاقى جيناق جوسپارىن ەنگىزۋدى جوسپارلاپ جاتىر.
قالىپتى زەينەتاقى كالكۋلياتورلارىنا قاراعاندا جاڭا قۇرال الداعى ۋاقىتتا الاتىن زەينەتاقى مولشەرىن ەسەپتەپ قانا قويماي، سونىمەن قاتار پايدالانۋشىعا مىنانداي مۇمكىندىكتەر بەرەدى:
قاجەتتى زەينەتاقى مولشەرىنە قول جەتكىزۋ ءۇشىن جارنا مولشەرىن ءوز بەتىنشە انىقتاۋ؛
اۆتوماتتاندىرىلعان حابارلامالار ارقىلى جوسپاردىڭ ورىندالۋىن باقىلاۋ.
الداعى ۋاقىتتا الاتىن زەينەتاقىنى بولجامدى ەسەپتەۋ مىنالاردى قامتيدى:
مەملەكەتتىك بيۋدجەت ەسەبىنەن تولەنەتىن زەينەتاقى (بازالىق زەينەتاقى جانە ىنتىماقتى (ەڭبەك) زەينەتاقى).
مىنالاردىڭ ەسەبىنەن بجزق-دان تولەنەتىن زەينەتاقى:
بجزق-عا قىزمەتكەرلەردىڭ تابىسىنان تولەنەتىن مىندەتتى زەينەتاقى جارنالارىنىڭ (مزج) 10%-ى؛
جۇمىس بەرۋشى زياندى ەڭبەك جاعدايىندا جۇمىس ىستەيتىن قىزمەتكەرلەردىڭ پايداسىنا بجزق-عا اۋداراتىن مىندەتتى كاسىپتىك زەينەتاقى جارنالارىنىڭ (مزج) 5%-ى.
قىزمەتكەر دە، ونىڭ جۇمىس بەرۋشىسى دە اۋدارا الاتىن ەرىكتى زەينەتاقى جارنالارى (ەزج) ەسەبىنەن بجزق-دان بەرىلەتىن زەينەتاقى.
"بۇل قىزمەت سالىمشىلارعا ءوزىنىڭ الداعى ۋاقىتتا الاتىن زەينەتاقىسىن جوسپارلاۋعا، جوسپاردىڭ ورىندالۋىن باقىلاۋعا جانە كەز كەلگەن ۋاقىتتا تۇزەتۋلەر ەنگىزۋگە بىرەگەي مۇمكىندىك بەرەدى. بۇل – زەينەتاقى جيناقتاۋ سالاسىنداعى دارالاندىرۋ مەن اشىقتىققا قاراي جاسالعان قادام"، - دەپ مالىمدەدى "بجزق" اق وكىلدەرى.