ءاربىر بەسىنشى قازاقستاندىق تەمەكى شەگەدى

ەرەسەك حالىقتىڭ تەمەكى تۇتىنۋى بويىنشا ءۇي شارۋاشىلىقتارىن ىرىكتەپ زەرتتەۋ ناتيجەلەرى بويىنشا رەسپوندەنتتەردىڭ 20،4% تەمەكى تارتادى (تەمەكى تارتپايتىندار – 79،6%)، بارلىق ەر ادامنىڭ 38،4%، (تەمەكى تارتپايتىندار – 61،6%)، ال ايەلدەردىڭ 8،4% تەمەكى ونىمدەرىن تۇتىنادى (تەمەكى تارتپايتىندار – 91،6%).

      تەمەكىنى تارتۋ جيىلىگى بويىنشا حالىقتىڭ ءبولىنىسى كەلەسىدەي: رەسپوندەنتتەردىڭ 16،6% تەمەكىنى كۇن سايىن تارتادى، اندا-ساندا تارتاتىندار – 3،8%، دەپ حابارلايدى Almaty-akshamy.kz.

     ۇيلەرىندە تەمەكى ءتۇتىنىنىڭ اسەرىنە ۇشىرايتىن رەسپوندەنتتەردىڭ ۇلەسى – 12،8%، جۇمىستا – 8،1%، قوعامدىق تاماقتانۋ ورىندارىندا – 10،5%، ولاردىڭ باسىم كوپشىلىگى (93% استامى) تەمەكى تارتپايتىن ادامدار.

      وڭىرلەر اراسىندا تەمەكى ونىمدەرىن تۇتىناتىنداردىڭ ەڭ كوپ ۇلەسى قاراعاندى (25،4%)، پاۆلودار جانە جامبىل وبلىستارىندا (24،6%) تىركەلدى.

      تەمەكى تارتۋ اۋىر اۋرۋلاردى تۋدىرادى دەپ سانايتىن رەسپوندەنتتەردىڭ ۇلەسى 85،5%-دى  قۇرايدى.

     قوعامدىق ورىنداردا تەمەكى تارتۋعا تىيىم سالۋ تۋرالى زاڭنامانىڭ قولدانىلۋىن قولدايتىندار – 67،7%.

     2021 جىلمەن سالىستىرعاندا 2022 جىلى تەمەكى تارتاتىن رەسپوندەنتتەردىڭ ۇلەسى 18–28 جاس جانە 60 (63) جاس جانە ودان جوعارى جاس توپتارىندا ءوستى، قالعان جاس توپتارىندا تومەندەدى.

ۇلتتىق ستاتيستيكا بيۋروسى 2020 جىلدان باستاپ قازاقستان رەسپۋبليكاسى دەنساۋلىق ساقتاۋ مينيسترلىگىنىڭ ۇسىنىسى بويىنشا ەلدەگى ەرەسەك حالىقتىڭ تەمەكى تۇتىنۋى بويىنشا زەرتتەۋ جۇرگىزەدى. ونىڭ ماقساتى – تەمەكىنى تۇتىنۋ، ءپاسسيۆتى تەمەكى تارتۋ جانە تەمەكىنى تاستاۋعا دەگەن ىنتا-جىگەردىڭ بولۋى جايىندا باعالاۋ دەرەكتەرىن الۋ، سونداي-اق تەمەكى تۇتىنۋدى باقىلاۋ مەن ونىڭ الدىن الۋ.

 ساۋالناما جۇرگىزۋ ءۇشىن تۇرمىس دەڭگەيى بويىنشا ءۇي شارۋاشىلىقتارىن ىرىكتەپ زەرتتەۋ  جەلىسى قولدانىلادى. دەرەكتەردى جيناۋ رەسپوندەنتتەردىڭ سۇراقنامالاردى تولتىرۋى ارقىلى جۇرگىزىلدى، بۇل رەتتە زەرتتەۋدە رەسپوندەنت رەتىندە 11 839 ءۇي شارۋاشىلىعىنىڭ 15 جانە ودان جوعارى جاستاعى ءبىر مۇشەسى قاتىستى.