اتالمىش شارا ونلاين رەجيمدە ءوتتى.
22 اقپاندا "ارالدى قۇتقارۋ" حالىقارالىق قورىنىڭ وتىرىسى ونلاين رەجيمدە ءوتتى. قازاقستان تاراپىنان بۇل شاراعا پرەمەر-مينيستردىڭ ءبىرىنشى ورىنباسارى رومان سكليار قاتىستى، دەپ حابارلايدى Almaty-akshamy.kz Primeminister.kz-كە سىلتەمە جاساپ.
كەزدەسۋدە سۋ رەسۋرستارىن باسقارۋ جانە پايدالانۋ ماسەلەلەرىن شەشۋدىڭ ماڭىزدىلىعىن ءتۇسىنۋ، مۇددەلى ەلدەر اراسىنداعى كوپ قىرلى ىنتىماقتاستىقتىڭ وڭ ۇردىستەرى اتاپ ءوتىلدى.
رومان سكليار ءوز سوزىندە قازاقستان تاراپى ارال تەڭىزىنە ترانسشەكارالىق وزەندەردىڭ اعىنىنىڭ قالىپتاسۋ ايماعىنان جوسپارلانعان ەكسپەديسيانى قولدايتىنىن، سونداي-اق وسى ەكسپەديسيانى ءساتتى ۇيىمداستىرۋ مەن وتكىزۋگە كومەك كورسەتۋگە دايىن ەكەنىن اتاپ ءوتتى. سونىمەن قاتار يرريگاسيا مەن ەنەرگەتيكا مۇددەلەرىن ەسكەرە وتىرىپ، ءوڭىردىڭ سۋ-ەنەرگەتيكالىق رەسۋرستارىن ءتيىمدى پايدالانۋ مەحانيزمىن قاراستىراتىن وڭىرلىك سۋ-ەنەرگەتيكالىق كونسورسيۋمىن قۇرۋ ماسەلەسىن قاراستىرۋ ۇسىنىلادى.
ارال تەڭىزى باسسەينىنىڭ سۋ شارۋاشىلىعىن، ەكولوگيالىق جانە الەۋمەتتىك-ەكونوميكالىق جاعدايىن جاقسارتۋ قاجەتتىلىگى تۇرعىسىندا قاتىسۋشىلار ايماقتىق ۇيىمداردىڭ ءرولىن كۇشەيتۋدىڭ جانە ايماقتاعى بارلىق ەلدەردىڭ قاجەتتىلىكتەرى مەن مۇددەلەرىن ەسكەرە وتىرىپ، سۋ-ەنەرگەتيكالىق رەسۋرستاردى پايدالانۋ سالاسىنداعى ءتيىمدى شارالاردى ازىرلەۋدى جالعاستىرۋدىڭ ماڭىزدىلىعىن اتاپ ءوتتى.
ارالدى قۇتقارۋ حالىقارالىق قورىنىڭ باسقارما وتىرىسىنىڭ ناتيجەسىندە ءتيىستى حاتتامالار مەن قۇجاتتارعا قول قويىلدى.
كەزدەسۋگە سونداي-اق تاجىكستان رەسپۋبليكاسى مەن وزبەكستان رەسپۋبليكاسى پرەمەر-مينيسترلەرىنىڭ ورىنباسارلارى، تۇرىكمەنستاننىڭ سۋ رەسۋرستارى كوميتەتىنىڭ ءتوراعاسى، "ارالدى قۇتقارۋ" حالىقارالىق قورىنا مۇشە ەلدەردىڭ مۇددەلى ۆەدومستۆولارىنىڭ جاۋاپتى قىزمەتكەرلەرى قاتىستى.