وتىز جىلدان بەرى كوشتىڭ تۇزەلگەنىن كورمەدىك
الماتىدا ق ر ءماجىلىس دەپۋتاتتارى، زيالى قاۋىم وكىلدەرى، ءتىل سالاسىنىڭ ماماندارى، پەداگوگتار، قوعام بەلسەندىلەرى مەن جۋرناليستەردىڭ قاتىسۋىمەن «ارالاس مەكتەپ قازاقتى قايدا اپارادى؟!» اتتى دوڭگەلەك ۇستەل ءوتتى، دەپ حابارلايدى Almaty-akshamy.kz Baq.kz سايتىنا سىلتەمە جاساپ.
ءححى عاسىر. قازاق حالقىنىڭ كەلەشەگى قانداي؟ بۇل سۇراق ەل ەرتەڭىن ويلايتىن ءار ازاماتتى تولعاندىرادى. اسىرەسە ءبىلىم سالاسى، مەملەكەتتىك ءتىلدىڭ جاعدايى، ۇلت رۋحانياتىنىڭ بۇگىنگى احۋالى، ۇلتتىق ءبىرتۇتاستىقتى ساقتاۋ جولىنداعى ءتۇرلى ماسەلەلەر ءوز شەشىمىن تاپپاي وتىر. سونىڭ ەڭ نەگىزگىسى – ەلىمىزدەگى ارالاس مەكتەپتەردىڭ ءدۇبارا، ءتىلى مەن دىلىنەن اداسقان ۇرپاق تاربيەلەۋدىڭ ورداسىنا اينالعاندىعى.
شارانى ۇيىمداستىرۋشىلاردىڭ ءبىرى اقىن ءتوقتارالى تاڭجارىق «قازاق ادەبيەتى» گازەتىنىڭ №7 سانىندا ءتىل جاناشىرى بەكزاكىر قۇرالبايەۆتىڭ «الماتى ءدۇبارالاردىڭ ورداسىنا اينالدى. ارالاس مەكتەپتەردى جابۋ كەرەك» دەگەن كولەمدى سۇحباتى جارىق كورگەنىن، وسىدان كەيىن قوعامدىق ورتادا قىزۋ پىكىر قالىپتاسقانىن ايتتى.
«ەلىمىزدەگى زيالى قاۋىم وكىلدەرى ءۇن قوسىپ، ارالاس مەكتەپتەردەن ءبىلىم الاتىن وقۋشىلاردىڭ دەنى ءورىستىلدى، بوگدە رۋحتى بولىپ وسەتىنىن ايتىپ، دابىل قاقتى. ايتالىق، الماتى قالاسىندا مەملەكەتتىك مەكتەپتەردىڭ سانى 207 بولسا، سونىڭ 70ء-ى قازاق، 64ء-ى ورىس، 3ء-ى ۇيعىر، ال 70ء-ى ارالاس مەكتەپ ەكەن. بۇل جەردە ارالاس مەكتەپتەردىڭ دەنى ءورىستىلدى ۇرپاق تاربيەلەپ شىعاراتىنىن ەسكەرسەك، ماسەلەنىڭ قانشالىقتى كۇردەلى ەكەنى بەلگىلى. مۇنان سىرت، 60-تان استام جەكەمەنشىك ءبىلىم وردالارى جۇمىس ىستەيدى. ولار دا ارالاس مەكتەپتەردىڭ سانىن ارتتىرىپ وتىر»، -دەدى اقىن.
جيىنعا قاتىسۋشىلار ەلىمىزدەگى ارالاس مەكتەپتەردى جابۋ قاجەتتىگىن قولدايتىندارىن ايتىپ، تازا قازاق تىلىندە ساباق بەرەتىن مەكتەپ سانىن ارتتىرۋ جونىندە ۇسىنىتارىن جەتكىزدى.
قوعام قايراتكەرى امالبەك تىشانوۆ «كوش جۇرە تۇزەلەدى» دەگەن سوزدەن ارىلىپ، ناقتى ىسكە كوشۋ قاجەتتىگىن ايتتى.
«وتىز جىلدان بەرى كوشتىڭ تۇزەلگەنىن كورمەدىك. قالىقتىڭ تالابىنا قۇلاق تۇرەيىك دەگەن باسشىلىق تا، جۇيەلى شارادا بولعان جوق. قوعامدىق ۇيىمداردىڭ تالابى قانشالىقتى بيلىككە جەتىپ جاتىر؟ ءتىل ماسەلەسىندە بارلىق ۇيىمدار باس قوسۋ كەرەك، سول كەزدە عانا بيلىككە ءوز تالابىن ورىنداتا الادى»،-دەدى ا. تىشانوۆ.