كۇن جىلىسىمەن ساياباقتار مەن ورمانداردا جانە گۇلدەردىڭ اينالاسىندا ارالار كوبەيەدى.
ارانىڭ شاعۋىنان بولاتىن ءولىم جاعدايلارى سيرە كەزدەسەدى، دەگەنمەن ونى ەلەمەي قويۋعا تاعى بولمايدى
قانداي جاعدايدا ارانىڭ شاعۋى ءقاۋىپتى بولۋى مۇمكىن جانە ارا شاققاندا نە ىستەۋ كەرەك؟
بۇل تۋرالى Almaty-akshamy.kz Massaget.kz پورتالىنا سىلتەمە جاساي وتىرىپ حابارلايدى.
ارالاردىڭ تابيعاتقا پايداسى مول بولعانىمەن، ولاردىڭ شاعۋى ادامعا ءقاۋىپتى. ادامعا ارا ەمەس، ونىڭ بىزگەگىندەگى ۋ ءقاۋىپ توندىرەدى. ارا شاعۋىنىڭ نەگىزگى بەلگىلەرىنە شاققان جەردىڭ كۇيىپ اۋىرۋى، قىشۋ، ءىسىپ كەتۋ، باس اۋىرۋ جانە باس اينالۋ جاتادى. كەي ادامدار دەنەسىندە السىزدىك سەزەدى، جۇرەك سوعىسى جيىلەيدى جانە ليمفالىق تۇيىندەر ۇلكەيىپ كەتەدى.
كوپ جاعدايدا ادامدار ارا شاعۋىن جەڭىل وتكەرەدى. الايدا ەگەر ادامنىڭ يممۋنيتەتى ءالسىز بولسا، اللەرگياعا بەيىم بولسا جانە سوزىلمالى اۋرۋى بار بولسا، ول كەي اسقىنۋلارعا شالدىعۋى مۇمكىن.
اسقىنۋلاردى بولدىرماس ءۇشىن ءاربىر ادام ارا شاققاندا العاشقى كومەكتى قالاي جاساۋ كەرەگىن ءبىلۋى كەرەك. مىنا رەتتىلىكتى ساقتاعان ءجون:
ارا شاققان جەردى تەكسەرۋ كەرەك. ەگەر ارانىڭ بىزگەگى شاققان جەردە قالىپ قويسا، ونى انتيسەپتيكپەن نەمەسە سپيرتپەن وڭدەلگەن پينسەتپەن الىپ تاستاۋ كەرەك. باستىسى، بىزگەكتى قولمەن قىسپاعان دۇرىس، ايتپەسە ۋ قالدىقتارى تىنگە تەرەڭ ەنىپ كەتەدى؛
جارانى انتيسەپتيكالىق قۇرالمەن زالالسىزداندىرۋ كەرەك؛
جارا شاققان جەرگە سالقىن بىردەڭە باسقان ءجون؛
سۋدى كوبىرەك ءىشۋ كەرەك؛
ارا شاققان جەرگە انتيگيستاميندىك جاقپاماي نەمەسە كرەم جاعۋ قاجەت.
ەگەر ارا كوزدى، اۋىز قۋىسىن شاعىپ السا، جىلدام جەدەل مەديسينالىق كومەك شاقىرتۋ كەرەك. ارانىڭ بەت تۇسىن شاققانى ءقاۋىپتى. بۇل جاعدايدا اللەرگياعا بەيىم ەمەس ادامنىڭ وزىندە قاتتى ىسىك پايدا بولۋى مۇمكىن. ەگەر ارا ءتىلدى شاعىپ السا، ول قاتتى ءىسىپ، تىنىس الۋدى بىتەپ تاستاۋى مۇمكىن.
مىنا جاعدايلاردا جەدەل جاردەم شاقىرۋ كەرەك:
ارا شاققاننان كەيىن دەگەنە بورتپە نەمەسە باسقا دا اللەرگيالىق رەاكسيا شىعىپ كەتسە؛
ارا شاققان ادامنىڭ تەمپەراتۋراسى كوتەرىلىپ كەتسە؛
ادامدى بىردەن بىرنەشە ارا شاعىپ السا.