ءار قازاق ءۇيلى بولسىن!

قازاقستاندىقتارعا باسپانا سالۋعا 3،6 پايىزبەن  نەسيە الۋعا بولادى

قازاقستاندىقتارعا تومەن پايىزدىق مولشەرلەمەمەن باسپانا سالۋعا نەسيە الۋعا بولادى. بۇل مۇمكىندىكتى قازاقستان ازاماتتارى ەلىمىزدىڭ كەز كەلگەن ايماعىندا پايدالانا الادى، دەپ حابارلايدى اlmaty-akshamy.kz.

ول ءۇشىن "وتباسى بانكىنىڭ" سالىمشىسى بولۋ - باستى تالاپ. قۇرىلىسقا نەسيە الۋ ءۇشىن بانكتە دەپوزيت اشىپ، قارىز الۋعا قاجەتتى قارجىنى جيناقتاپ، كەپىلمەن قامتاماسىز ەتۋ جانە تولەم قابىلەتتىلىگىن راستاۋ كەرەك. مۇنىڭ بارلىعى قارجى ينستيتۋتى سايتىندا كورسەتىلگەن.  

قازاقستاندىقتار نەسيە ءتۇرىن تاڭداي الادى. مىسالى، ەڭ تومەنگى پايىزدىق مولشەرلەمە – 3،6%-دان 25 جىلعا نەمەسە ودان از مەرزىمگە بەرىلەتىن كەپىلمەن تۇرعىن ءۇي نەسيەسى. وعان 100 ملن تەڭگەگە دەيىن الۋعا بولادى. ەگەر جيناقتاۋ مەرزىمى ءۇش جىلعا جەتپەسە، ارالىق نەسيەنى قۇرىلىسقا پايدالانۋعا بولادى. مۇندا پايىزدىق كورسەتكىش جوعارى – 25 جىلعا جىلدىق 8،5%-عا دەيىن. بانك بەرە الاتىن ماكسيمالدى سوما 90 ملن تەڭگەنى قۇرايدى.

“باستاپقى مولشەرلەمە دەپوزيت اشقانىڭىزعا ءۇش جىل تولعانعا دەيىن جارامدى. سودان كەيىن ءسىز تۇرعىن ءۇي نەسيەسىنىڭ شارتتارىنا اۋىساسىز، ال نەسيە مولشەرلەمەسى 5% دەيىن تومەندەيدى”، – دەپ جازىلعان بانكتىڭ ۆەب-سايتىندا.