اباي اتىنداعى قازۇپۋ-دا كورنەكتى مەملەكەت جانە قوعام قايراتكەرى احمەت بايتۇرسىن ۇلىنىڭ 150 جىلدىعىنا ارنالعان عىلىمي-ادىستەمەلىك ورتالىقتىڭ اشىلۋ سالتاناتى ءوتتى، دەپ حابارلايدى Almaty-akshamy.kz.
احمەت بايتۇرسىنۇلىن ۇلت ۇستازى دەپ اتاعانى كەزدەيسوق ەمەس. اتالعان ءىس-شارانىڭ ۇيىمداستىرۋشىسى - اباي اتىنداعى قازۇپۋ فيلولوگيا ينستيتۋتى.
اشىلۋ سالتاناتىنا ۋنيۆەرسيتەت رەكتورى دارحان ءبىلالوۆ، بەلگىلى قوعام جانە ساياسي قايراتكەر، حالىق جازۋشىسى، قازاقستاننىڭ ەڭبەك ەرى ولجاس سۇلەيمەنوۆ، ا. بايتۇرسىنوۆتىڭ جيەنى ايمان بايسالوۆا، ا. بايتۇرسىن ۇلى اتىنداعى ءتىل ءبىلىمى ينستيتۋتىنىڭ، م. اۋەزوۆ اتىنداعى ادەبيەت جانە ونەر ينستيتۋتىنىڭ، ا. بايتۇرسىن ۇلى مۋزەي-ۇيى مەن ب ا ق وكىلدەرى، بەلگىلى عالىمدار، مادەنيەت جانە ونەر قايراتكەرلەرى، ۋنيۆەرسيتەتتىڭ وقىتۋشىلارى مەن ستۋدەنت-جاستارى قاتىستى.
ءىس-شارا بارىسىندا ا.بايتۇرسىن ۇلىنىڭ مۋزەي-ۇيىنىڭ باسشىلىعى جاڭا ورتالىققا الاش قايراتكەرىنىڭ 6 تومدىق شىعارمالار جيناعىن جانە باسقا دا كىتاپتاردى تابىس ەتتى.
دارحان ءبىلالوۆ اباي ۋنيۆەرسيتەتىن وسىنداي ايتۋلى وقيعامەن قۇتتىقتاپ، ورتالىقتى اشۋدىڭ ماڭىزدىلىعىنا توقتالدى. «حالقىمىزدىڭ رۋحاني كوسەمى، ۇلت ۇستازى احمەت بايتۇرسىن ۇلىنىڭ تۋعانىنا بيىل 150 جىل تولىپ وتىر. اباي ۋنيۆەرسيتەتىنىڭ ۇجىمى ءۇشىن احمەت بايتۇرسىن ۇلى باستاعان الاش قايراتكەرلەرىنىڭ ەسىمدەرى قاشاندا ارداقتى. ولاردىڭ قۇندى مۇراسىن وسكەلەڭ ۇرپاقتىڭ ساناسىنا ءسىڭىرۋ اسا ماڭىزدى. بۇل بولاشاق مامانداردىڭ بويىندا وتانسۇيگىشتىك پەن ۇلتقا ادالدىقتى قالىپتاستىرۋعا قىزمەت ەتەدى. ۇلت ۇستازى قالىپتاستىرعان ءبىلىم بەرۋ ءداستۇرى وسى ورتالىقتا زاماناۋي تالاپتارمەن قايتا جالعاسىن تابادى دەپ ويلايمىن»، - دەدى.
ولجاس سۇلەيمەنوۆ احمەت بايتۇرسىن ۇلىنىڭ ءبىلىم جانە عىلىم سالاسىنداعى قىزمەتى تۋرالى ايتا كەلە، قازاقستان تاريحىنا، ونىڭ قايراتكەرلەرىنە، ۇلى تۇلعالارىنا، زيالى قاۋىمعا دەگەن قۇرمەت قاجەتتىگىن اتاپ ءوتتى.
وسى شارا اياسىندا «احمەت بايتۇرسىن ۇلىنىڭ مۇراسى جانە ۇلتتىق قۇندىلىقتار» حالىقارالىق عىلىمي-تاجىريبەلىك كونفەرەنسيا ءوتتى. وعان ق ر پارلامەنتى سەناتىنىڭ مۇشەلەرى نۇرتورە ءجۇسىپ پەن جاناربەك ءاشىمجان، تۇركيا رەسپۋبليكاسىنىڭ باس كونسۋلى الي ىرزا اكىندجى، نەيمەگەن رادباۋد ۋنيۆەرسيتەتىنىڭ پروفەسسورى روبەرت ەرمەرس (نيدەرلاندى كورولدىگى)، پومور اكادەمياسىنىڭ رەكتورى زبيگنيەۆ وسادوۆسكيي (پولشا)، شەتەلدىك جانە وتاندىق جوعارى وقۋ ورىندارىنىڭ عالىمدارى، «احمەت. ۇلت ۇستازى» تەلەحيكاياسىنىڭ قويۋشى رەجيسسەرى مۇرات ەسجان، بەلگىلى اكتەر، ق ر ەڭبەك سىڭىرگەن قايراتكەرى، تەلەحيكايادا احمەتتىڭ ءرولىن سومداعان بايعالي ەسەنالييەۆ قاتىستى.
كونفەرەنسيا بارىسىندا قازىرگى فيلولوگيانىڭ وزەكتى ماسەلەلەرى تاريح پريزماسى ارقىلى تالقىلانىپ، الاش پارتياسى كوسەمدەرىنىڭ مۇراسى: ءتىل، رۋحانيات، وقىتۋ ادىستەمەسى؛ احمەت بايتۇرسىن ۇلى شىعارماسىنداعى شىعىستانۋ، اۋدارما ماسەلەلەرى؛ پەداگوگيكالىق مۇرانىڭ ساباقتاستىعى جانە قازىرگى ءبىلىم بەرۋ پرينسيپتەرى ماسەلەلەرى قارالدى.
كونفەرەنسيا جوعارى دەڭگەيدە ءوتىپ، بارلىق قاتىسۋشىلاردىڭ ۇلكەن قىزىعۋشىلىعىن تۋدىردى.