قازاقستان رەسپۋبليكاسى پرەزيدەنتىنىڭ كەڭەسشىسى – باسپا ءسوز حاتشىسى بەرىك ءۋالي «قازاق ادەبيەتى» گازەتىنىڭ ۇجىمىن باسىلىمنىڭ 90 جىلدىق مەرەيتويىمەن قۇتتىقتادى.
بۇل قاسيەتتى شاڭىراققا قازاقتىڭ قاي جاقسىسى باس سۇقپادى دەيسىز؟! كەشەگى سەرى ساكەن مەن قۇلاگەر ءىلياس، كەربەز عابيت پەن قارا نار بەيىمبەت اتالارىمىزدىڭ اياعىنىڭ ءىزى، قالامىنىڭ تابى قالدى. ودان كەيىن دە گازەتتىڭ باسىندا قازاقتىڭ كىل ارعىماق ۇلدارى، ءقادىرلى قالامگەرلەرى وتىردى. سىرباي ماۋلەنوۆتەن ءازىلحان نۇرشايىقوۆقا، ودان شەرحان مۇرتازا مەن سايىن مۇراتبەكوۆكە جالعاسقان سالقار كەرۋەن ۇلتتىق ادەبيەتتىڭ ۇلى كوشىن تىنباي العا سۇيرەپ كەلەدى، - دەپ جازدى ول ءوزىنىڭ Facebook-تەگى پاراقشاسىنا.
سونداي-اق گازەتتىڭ قانشاما بۋىندى قالىپتاستىرعانىنا توقتالىپ، 90 جىلدان بەرى تاقىرىبى اۋقىمدى، تالابى بيىك، ورەسى ۇلكەن ادەبيەت قالىپتاسسا، وعان وسى اتا باسىلىمنىڭ ەڭبەگى ەرەسەن ەكەنىن اتاپ ءوتتى.
وسى رەتتە مادەنيەت جانە اقپارات ءمينيسترى ايدا بالايەۆا دا گازەتتىڭ العاش جارىق كورگەنىنە 90 جىل تولۋىنا وراي ءوزىنىڭ جىلى لەبىزىن ءبىلدىردى.
وقىرمانىنىڭ كوزايىمىنا اينالعان گازەتتىڭ ءار بەتى – تۇنعان تاريح، ءالى دە جازارى تاۋسىلماعان. مەملەكەت باسشىسىنىڭ باستاعان رەفورمالارى مەن حالىق ءۇشىن ماڭىزدى اقپاراتتارىن قالىڭ وقىرمانىنا تالماي جەتكىزىپ، ۇلتىمىزدىڭ تاريحي سانا-سەزىمىن جاڭعىرتىپ كەلەدى. باسىلىم قوعامىمىزدىڭ رۋحاني ازىعىنا اينالىپ، جاس قالامگەرلەردىڭ شىعارماشىلىعىن شىڭدايتىن ابىرويلى الاڭعا اينالدى، - دەدى مينيستر.
سونىمەن قاتار، ول ادەبي باسىلىم رەداكسياسى ۇجىمىنا تاۋسىلماس شابىت، تولايىم تابىس تىلەدى.