اقىلى جولعا قارىزى بار قازاقستاندىقتار كەيبىر جولدارمەن جۇرە المايدى

قازاقستاندىقتاردىڭ اقىلى جولدارعا قارىزى 5 ملرد تەڭگەدەن اسادى.

بۇل تۋرالى ق ر ييدم اۆتوموبيل جولدارى كوميتەتى ءتوراعاسىنىڭ ورىنباسارى جامبىل باحتيار ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

 «اتالعان سوما وتكەن جىلدىڭ 23 قاراشاسىنان باستاپ، بيىل 1 جەلتوقسان ارالىعىندا جينالدى. كولىك يەلەرى اقىلى جولدار بويىنشا قارىزىن بەلگىلەنگەن ۋاقىتتا تولەۋى ءتيىس. مىسالى، كولىك يەسىنىڭ 300 مىڭ تەڭگە قارىزى بولسا، ول بەرەشەگىن كەستەگە ساي 2 جىل كولەمىندە تولەيدى»، - دەدى جامبىل باحتيار ق ر يندۋستريا جانە ينفراقۇرىلىمدىق دامۋ مينيسترلىگىنىڭ «اشىق ساعات الاڭى» جوباسىنىڭ ەفيرىندە.

مينيسترلىك وكىلىنىڭ ايتۋىنشا، ءقازىر ەلىمىزدە 2،2 مىڭ شاقىرىم اقىلى جول بار. جىل باسىنان اقىلى جولدان 20 ملرد تەڭگە تابىس ءتۇستى. جينالعان قاراجات جولداردى كۇتىپ ۇستاۋ مەن جوندەۋگە جۇمسالادى.

«بيىلعا جوسپارلانعان جاڭا اقىلى جولداردى ەنگىزۋ كەيىنگە قالدىرىلدى. سەبەبى تۇرعىندار ابونەنتتىك تولەمدى الىپ تاستاۋدى سۇراپ وتىر. سونداي-اق، 2 ساناتتاعى اۆتوموبيل جولدارىن اقىلى ەتۋگە كەلسەك. بۇل ماسەلە حالىقتىڭ وڭ كەلىسىمىنەن كەيىن عانا شەشىلەدى. دەگەنمەن ءبىز اقىلى جولداردان باس تارتا المايمىز. جالپى 15 جەلتوقساننان باستاپ ەلىمىزدە جاڭا ابونەنتتىك تولەم جۇيەسى ەنگىزىلەدى. ول بويىنشا اقىلى جولدار ەكى تۇرگە بولىنەدى. ءبىرىنشى، جابىق جۇيە. ياعني «استانا-ششۋچينسك»، «قاراعاندى- استانا»، «الماتى-قاپشاعاي» تاسجولدارى بويىنشا قارىزى بار كولىك يەلەرى بەرەشەگىن وتەگەننەن كەيىن عانا جۇرە الادى. ەكىنشى اشىق جۇيە. ول بويىنشا كولىك يەسى تولەمەگەن جاعدايدا قارىزى جينالا بەرەدى»، - دەيدى ول.