قازاقستان اۋىلشارۋاشىلىق ونىمدەرىنىڭ نەگىزگى تۇرلەرىن ەكسپورتتايتىن الەمدەگى 10 ەلدىڭ قاتارىنا كىرەدى
قاعاز جۇزىندە ازىق-تۇلىك قاۋىپسىزدىگى قامتاماسىز ەتىلگەن. ال شىن مانىندە ەلىمىز ءالى دە يمپورتقا تاۋەلدى. سەنات دەپۋتاتى ازىق-تۇلىك ينفلياسياسىنا قارسى مەملەكەتتىك ورگاندار جۇمىسىن وسىلاي سىنعا الدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
ونىڭ ايتۋىنشا، قازاقستان اۋىلشارۋاشىلىق ونىمدەرىنىڭ نەگىزگى تۇرلەرىن ەكسپورتتايتىن الەمدەگى 10 ەلدىڭ قاتارىنا كىرەتىنىنە قاراماستان، ازىق-تۇلىك باعاسىنىڭ ءوسۋى ماڭىزدى ماسەلەگە اينالىپ وتىر.
«قازىرگى ۋاقىتتا ءبىزدىڭ مەملەكەتتىك ورگاندارىمىز ءورت ءسوندىرۋ ادىسىمەن جۇمىس ىستەيدى دەپ ايتۋعا بولادى، ولاردىڭ ءىس-قيمىلى الدىن الۋ سيپاتىنداعى شارالاردى قولدانۋعا ەمەس، اياقاستى تۋىنداعان جاعدايعا جاۋاپ قايتارۋعا عانا باعىتتالعان. ەڭ سوراقىسى، بىزدە ەلدىڭ ازىق-تۇلىك قاۋىپسىزدىگىن قامتاماسىز ەتۋ ماسەلەلەرىندە جۇيەلىلىك جوق»، – دەدى ق ر پارلامەنتى سەناتىنىڭ دەپۋتاتى اقىلبەك كۇرىشبايەۆ.
ال سەناتور دينار نوكەتايەۆا بالاباقشالاردا جۇمىس ىستەيتىن مامانداردىڭ 50%-ىندا مامانداندىرىلعان سالالىق ءبىلىم جوقتىعىن ايتتى. ونىڭ پىكىرىنشە، تاربيەشىلەردىڭ ەڭبەكاقىسىن كوتەرۋ ارقىلى پەداگوگتەر تاراپىنان تارتىپتىك بۇزۋشىلىقتاردى ازايتۋعا بولادى.
«مەكتەپكە دەيىنگى ءبىلىم بەرۋ سالاسىندا قارجىلاندىرۋ، جالپى جانە عىلىمي تاسىلدەر، كادرلىق قامتاماسىز ەتۋ جانە وسى سالاداعى ساپالى قولداۋ ماسەلەلەرى بار. وسى فاكتورلاردىڭ سالدارىنان مەكتەپكە دەيىنگى سالا قىزمەتكەرلەرى پەداگوگيكالىق جانە پسيحوەموسيونالدىق تۇرعىدا اۋىر جاعدايعا تاپ بولادى. بالالارعا قول كوتەرۋگە دەيىن قاتىگەزدىك تانىتۋ، سونداي-اق مەكتەپكە دەيىنگى ۇيىمدارداعى پەداگوگتەر تاراپىنان تارتىپتىك بۇزۋشىلىقتار ءجيى بولىپ وتىر»، – دەدى ق ر پارلامەنتى سەناتىنىڭ دەپۋتاتى دينار نوكەتايەۆا.