پرەزيدەنتىمىز قاسىم-جومارت توقايەۆتىڭ بۇگىنگى جولداۋى كوكەيىمىزدە جۇرگەن كوپ سۇراققا جاۋاپ الۋعا مۇمكىندىك بەردى. كوڭىلگە قوندى. ءار سالادان ايتىلعان اڭگىمەلەر بۇگىنگى حالىقتىڭ ساۋالىنا جاۋاپ بولدى. دەپۋتاتتارعا ارتىلعان جۇمىستار، ايتىلعان تىلەكتەر ولاردىڭ ساپاسىن ارتتىرىپ، سانىن ازايتۋ، اسىرەسە، حالىقپەن بىرگە بولۋ دەگەنى كوڭىلىمىزگە قوندى.
بيلىك حالىقتان الىستاپ كەتكەلى كوپ ۋاقىت بولدى. حالىقپەن سويلەسپەگەلى كوپ ۋاقىت بولدى. مىنە، سودان كەتكەن قاتەلىكتى تۇزەۋ، جاڭا قازاقستاندى جاڭا جولعا قويۋ دەۋ ءبىزدىڭ كوكەيىمىزگە قونادى. اسىرەسە، جاستاردىڭ رۋحاني تاربيەدەن الشاقتاۋى جايىندا ايتقان ەرتەڭگى قۇرىلتاي كەڭەسىن قۇرۋ، ۇلكەنگە ىزەت، تاجىريبەسى مول ەستيارلاردان ساباق الۋ سياقتى قوعامدا بولاتىن جاڭالىقتار دا كوڭىلىمىزدەن شىقتى.
كەشەگى جۇرەگىمىزدى جارالاعان قاڭتار قىرعىنى تۋرالى ونىڭ دا كوپ نارسەسىنىڭ بەتىن اشىپ، ءالى دە تەكسەرىلىپ جاتقانىن ايتتى. بۇل ءبىزدىڭ تاريحىمىزعا، ءبىزدىڭ ەگەمەندىگىمىزگە، ەلدىگىمىزگە ۇلكەن سىن بولعان قاتەلىكتىڭ نۇكتەسى تەزىرەك قويىلسا دەپ حالىق ءالى دە كۇتۋدە. سوندىقتان بۇل ساۋالداردىڭ دا ناقتى شەشىمى دۇرىس بولاتىنىنا ءبىز سەنەمىز.
تاعى ءبىر قۋانعانىمىز، كەڭ بايتاق قازاقستاننىڭ وبلىستارىن قىسقارتىپ ەمەس، كەڭەيتىپ باسقارۋ قاجەت ەدى. جاڭادان قۇرىلعان اباي، ۇلىتاۋ، الماتى وبلىسى مەن قونايەۆتىڭ ەسىمىن قاپشاعاي قالاسىنا بەرۋ تۋرالى ايتقانى، وسىناۋ ەل ارداقتاعان ازاماتتىڭ ەسكەرىلۋى بۇل دا ءبىر كەيىنگىگە ۇلكەن ۇلگى بولارلىق جايت. ويتكەنى، قونايەۆ تۋعان ەلگە قىزمەت ەتۋدىڭ، تازالىقتىڭ، پاراساتتىلىقتىڭ، ازاماتتىقتىڭ ۇلگىسىن كورسەتكەنىن ءبىز جاقسى بىلەمىز. سونىڭ كۋاگەرىمىز. الەمدە بولىپ جاتقان جايتتاردى تۇسىندىرە كەلە، ەكونوميكالىق قيىندىقتارعا شىداۋ كەرەك ەكەنىن دە ەسكەرتتى. ويتكەنى، تۋعان ەلىن سۇيەتىن ءار ازامات وزىنەن باستاۋ كەرەك، تۋعان ەلدى قورعاۋعا ءوزى قىزمەت ەتۋى كەرەك دەگەنى دە كوكەيىمىزگە قونادى.
ۇلتتىڭ ساناسىنىڭ بيىك بولۋىن، ەلدىڭ تۇتاستىعى، ەركىندىك پەن كوك تۋدى ساقتاۋدا بىرلىك قاجەت ەكەنىن باسا ايتتى. بۇل دا ءبىزدىڭ كوكەيىمىزدە جۇرگەن ۇلكەن ماسەلە. بىزگە بۇگىن بىرلىك كەرەك، تىرلىك كەرەك! ەڭبەك ەتۋ كەرەك جانە ۇرپاقتىڭ تاربيەسى مەن ساۋاتى كەرەك. ۇلى دالانىڭ ءبىرىنشى بايلىعى – كەڭدىگى جانە ەگىسى مەن مال شارۋاشىلىعى. مال شارۋاشىلىعىنىڭ كەنجەلەپ تۇرعانىن تاعى دا ءبىر ايتاتىن شىعار، اناۋ ارقالىق پەن تورعايدىڭ دا تاعدىرى ويلاندىراتىن شىعار، ءبارى ءوز كەزەگىمەن بولاتىن شىعار دەپ ويلاپ وتىرمىن.
بىزگە كەڭ دالاعا ەڭبەك ەتەتىن جاستارعا مۇمكىندىك جاساسا، ءبارى دۇرىس بولار ەدى. اسىرەسە، اۋىل شارۋاشىلىعىن، دالانى كوركەيتۋدى تەزىرەك قولعا السا، بالكىم، قازاقستاننىڭ بولاشاعى مۇلدەم باسقا بولادى، جۇمىس قولى كوبەيەدى. مەنىڭ ويىمشا، اۋىلدى كوركەيتۋ – كەزەك كۇتتىرمەيتىن ماسەلە. اۋىل ازىپ كەتتى. اۋىل توزعان سوڭ، ۇرپاق ازىپ كەتتى. بۇل دا ءبىر ءبىزدىڭ كوكەيىمىزدە جۇرگەن ۇلكەن ماسەلە. كەلەسى كەزەكتە پرەزيدەنتىمىز وسىعان كوڭىل بولەتىن شىعار دەگەن ۇمىتتەمىن.