تۇركى مادەنيەتى جانە مۇراسى قورىنىڭ پرەزيدەنتى اقتوتى رايىمقۇلوۆا پولشاعا ساپارى اياسىندا پولشا رەسپۋبليكاسىنىڭ سەناتى ۆيسە-مارشالى ميحال كامينسكييمەن كەزدەستى، دەپ حابارلايدى aqshamnews.kz
«ادەبيەت جانە كوركەمونەر» پورتالىنىڭ حابارلاۋىنشا، قور دەلەگاسياسىنىڭ پولشاعا ساپارى بارىسىندا ەكىجاقتى ىنتىماقتاستىقتى نىعايتۋعا باعىتتالعان ءبىرقاتار كەزدەسۋلەر ءوتتى. اتاپ ايتقاندا، تۇركى الەمى مەن پولشا اراسىنداعى مادەني بايلانىستاردى دامىتۋ، بىرلەسكەن جوبالاردى جۇزەگە اسىرۋ جانە مادەني مۇرانى ساقتاۋ ماسەلەلەرى تالقىلاندى.
كەزدەسۋ بارىسىندا اقتوتى رايىمقۇلوۆا تۇركى مادەنيەتى جانە مۇراسى قورىنىڭ تۇركى حالىقتارىنىڭ مادەني جانە تاريحي مۇراسىن ساقتاۋ مەن ناسيحاتتاۋ باعىتىندا اتقارعان جۇمىستارى تۋرالى باياندادى. سونداي-اق، پولشاداعى تۇركى تەكتەس قاۋىمداستىقتار – تاتارلار مەن قارايىمداردىڭ مادەني مۇراسىن زەرتتەۋ مەن ساقتاۋ سالاسىندا بىرلەسكەن باستامالاردى قولعا الۋدىڭ ماڭىزدىلىعىن اتاپ ءوتتى.
ءوز كەزەگىندە، پولشا سەناتىنىڭ ۆيسە-مارشالى ميحال كامينسكيي تاريحي جانە مادەني مۇرانى ساقتاۋعا پولشا ۇلكەن ءمان بەرەتىنىن جەتكىزىپ، تۇركى الەمىمەن مادەني بايلانىستاردى دامىتۋعا مۇددەلى ەكەنىن ءبىلدىردى.
كەزدەسۋگە ازەربايجان رەسپۋبليكاسىنىڭ پولشاداعى ەلشىسى نارگىز قۇربانوۆا مەن قازاقستان رەسپۋبليكاسىنىڭ پولشاداعى ەلشىسى ءالىم كىرابايەۆ قاتىسىپ، تاراپتاردى قىزىقتىرعان وزگە دە ماسەلەلەر بويىنشا پىكىر الماستى.