اقتوبەدە ديماش قۇدايبەرگەن ءۇشىن ارنايى تۋريستىك باعىت ازىرلەنگەن.
اقتوبە قالاسىنا ءانشى ديماش قۇدايبەرگەننىڭ فاناتتارى كەلدى. الەمنىڭ بىرنەشە ەلىنەن جينالعان جانكۇيەرلەر وقۋ ورىندارى مەن قالانىڭ كورىكتى جەرلەرىن ارالاۋعا شىقتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
اقتوبەدە ديماش قۇدايبەرگەن ءۇشىن ارنايى تۋريستىك باعىت ازىرلەنگەن. ەكى كۇندىك ساپار كەزىندە ءانشىنىڭ فاناتتارى مەن شىن جاناشىرلارى مەكتەپكە، مۋزىكالىق كوللەدج بەن ول تۇرعان ۇيگە بارۋدى جوسپارلادى.
«اقتوبەگە الەمنىڭ بەس ەلىنەن فاناتتار كەلدى. ولار ءۇشىن ەكى كۇندىك تۋريستىك ساپار ۇيىمداستىرىپ بەرىپ وتىرمىز. العاشقى كۇنى ولار №32 مەكتەپ گيمنازياسىنا بارادى. مۇندا ءانشىنىڭ ۇستازدارىمەن كەزدەسىپ، وقۋشى ديماشتى تاني الادى. مۋزىكالىق كوللەدجدە دە وقىتۋشىلارىمەن كەزدەسىپ، ستۋدەنت شاعىنداعى مەكەنمەن تانىسۋعا مۇمكىندىك جاسالعان. سونىمەن بىرگە ديماشتىڭ ۇيىنە بارىپ، تانىسادى. قالانى ارالاۋ، كورىكتى جەرلەرىنە ساياحات تا قاراستىرىلعان»، - تۋريستىك كومپانيانىڭ باس ديرەكتورى دەدى مەيرامگۇل بالعوجينا.
ونىڭ ايتۋىنشا، ءبىر عانا تۋريستىك كومپانيا ديماش قۇدايبەرگەننىڭ ءان كەشى بولاتىن كەزدە 200-دەن استام ءتۋريستى قابىلداپ، قىزمەت كورسەتپەك. ولار الەمنىڭ 35 ەلىنەن ءوتىنىش بىلدىرگەن. العاشقى لەگى، ونداعى 11 فانات اقتوبەنى كورۋدى ماقسات ەتكەن. وسى جولمەن تۋريستەردى اكەلۋ جالعاسا بەرەدى.
«اقش، ۇلىبريتانيا، ۋرۋگۆاي، ليتۆا، مالايزيا، ۆەتنامنان بار. جالپى مۇنداي تۋردى 2017، 2019 جىلدارى ۇيىمداستىردىق. جالپى فاناتتار الماتى، استانا، تۇركىستان، تاراز، شىمكەنتكە بارادى. اقش-تان كەلگەن فاناتتىڭ ءبىرى ارالعا بارىپ، ونىڭ پروبلەماسىن كوتەرۋدى كوزدەپ وتىر»، - دەدى مەيرامگۇل بالعوجينا.
ەسكە سالساق، ديماش قۇدايبەرگەن اقتوبەدەگى №32 مەكتەپ-گيمنازيادا ءبىلىم الدى. ول وقۋشى كەزىندە ابايدىڭ قارا سوزدەرىن جاتقا وقىدى.
باستاۋىش سىنىپ ءمۇعالىمى ءقازىر دە وسى مەكتەپتە ساباق بەرەدى. ول وقۋشىسىنىڭ فاناتتارىنا بالا ديماش جايلى ايتىپ بەرۋدەن شارشاعان ەمەس.