بازارداعى كوتەرمە باعا دا «ۇشىپ» تۇر
وتكەن اپتادا اقتوبەلىكتەر ساۋدا جەلىلەرىنەن قانت تاپپاي، ءبىراز دۇرلىكتى. ءقازىر جاعداي ءبىرقالىپتى. الايدا قانت باعاسى قىمباتتاپ بارادى، دەپ حابارلايدى Almaty-akshamy.kz Baq.kz-كە سىلتەمە جاساپ.
ماسەلەن، بۇگىندە وبلىس ورتالىعىندا حالىق كوپ باراتىن «انۆار»، «دينا» ساۋدا جەلىلەرىندە ءبىر كەلى قانتتىڭ باعاسى — 441 تەڭگە. ال ەسكى قالادا ورنالاسقان ورتالىق بازاردا — 550-600 تەڭگە. ءتىپتى، بازارداعى كوتەرمە باعا دا «ۇشىپ» تۇر.
«ءقازىر جاز ايىندا جۇرتتىڭ كوبى قانتتى كوپ مولشەردە جۇمسايدى. سەبەبى توساپ جابادى، ءتاتتى نان پىسىرەدى. جىل سايىن ءدال وسى كەزەڭدە قانتتىڭ باعاسى ازداپ كوتەرىلەدى. حالىق تا ونى بىلەدى. الايدا ءبىر كەلى قانتتىڭ باعاسى 500 تەڭگە بولدى دەگەن نە سۇمدىق؟ سوندا بالا-شاعاسى كوپ، ءبىر جالاقىعا كۇن كورەتىن وتباسىلار اقشاسىن قالاي جەتكىزەدى. ءتىپتى، ءقازىر ۇن دا، كۇنباعىس مايى دا، جەمىس-جيدەك تە قىمباتتاپ كەتتى. ال ەندى قانتتىڭ وسىنشا قىمباتتاعانى بىزگە ۇلكەن سالماق. تاعام پىسىرسەڭ دە، بوتقا پىسىرسەڭ دە، قانت كەرەك. ءتيىستى ورگاندار نەگە باعانى جۇگەندەمەيدى؟ حالىقتىڭ جاعدايىن كىم ويلايدى؟»، — دەيدى اقتوبە قالاسىنىڭ تۇرعىنى تىلەكشى ايانبەرگەن قىزى.
ول وتباسىندا 6-7 ادام تۇراتىنىن، جولداسىنىڭ تاپقان اقشاسى ازىق-تۇلىك پەن نەسيەدەن ارتىلمايتىنىن ايتادى. اپتا سايىن كەلىپ، «انۆار» گيپەرماركەتىنەن ازىق-تۇلىك الادى ەكەن.
«وتكەن اپتانىڭ اياعىندا كەلىپ، وسى جەردەن قانت تاپپادىق. «قويمادا ءبىتىپ قالدى» دەپ جۇباتتى ءبىزدى ساۋدا جەلىسىنىڭ ادامدارى. بۇگىن كەلىپ، الىپ جاتىرمىن. وندا دا 3 كەلىدەن ارتىق الۋعا بولمايدى. كوكتەمنەن بەرى وسىلاي شەكتەۋ قويىلعان»، — دەيدى ول.
اقتوبە وبلىستىق كاسىپكەرلىك باسقارماسىنىڭ باسشىسى نۇرحان تىلەۋمۇراتوۆتىڭ ايتۋىنشا، بۇگىندە وبلىستا قانت تاپشىلىعى جوق. اپتا باسىندا وبلىسقا 5 ۆاگون قانت اكەلىنگەن. ءار ۆاگونداعى قانتتىڭ مولشەرى — 68 توننا.
«اقتوبەدە قانت قورى جەتكىلىكتى. ءقازىر تۇراقتاندىرۋ قورىندا دا قانت قورى بار. الەۋمەتتىك دۇكەندەردە 363 تەڭگەدەن، ال ساۋدا جەلىلەرىندە 441-442 تەڭگەدەن ساتىلىپ جاتىر»، — دەيدى ول.
اقتوبە وبلىسىندا شالعاي اۋىلداردا ءقازىر قانت باعاسى 650 تەڭگەدەن ساتىلىپ جاتىر. ماسەلەن، شالعاي اۋدان — ىرعىز اۋدانىندا ءبىر كەلى قانتتىڭ باعاسى — 560-620 تەڭگە. جاۋاپتى ماماندار كاسىپكەرلەرگە ەشقانداي «ءتارتىپ» جۇرگىزە المايتىنىن ايتادى. ەڭ باستىسى، «ساۋدا قىزمەتىن رەتتەۋ تۋرالى» زاڭعا سايكەس، ىشكى ساۋدا سۋبەكتىلەرى الەۋمەتتىك ماڭىزى بار تاۋار تۇرلەرىنە قوسىلاتىن ساۋدا ۇستەمەسىن 15 پايىزدان اسىرماۋى كەرەك. الايدا كاسىپكەرلەردىڭ قانتتى قانداي باعاعا الىپ جاتقانى بەلگىسىز.
ايتا كەتۋ كەرەك، وسىدان ءبىر جارىم اي بۇرىن اقتوبەدە قانت باعاسى 369 تەڭگەدەن 423 تەڭگەگە كوتەرىلدى. ال قاڭتار ايىندا ءبىر كەلى قانتتىڭ باعاسى 311 تەڭگەگە ساتىلعان.