اقتوبەدە جۇزدەن اسا ادامدى سان سوقتىرعان حالىق ەمشىسى 6 جىل 8 ايعا سوتتالدى. ءبىراق ول جازاسىن ەكى جىلدان سوڭ عانا وتەيدى. سەبەبى سۋديا كىشكەنتاي ەكى بالاسىن ەسكەرگەن، - دەپ حابارلايدى اqshamnews.kz ءتىلشىسى "كتك" تەلەارناسىنا سىلتەمە جاساپ.
"التى جىل سەگىز ايعا باس بوستاندىعىنان ايىرۋ جازاسى تاعايىندالدى. سونىمەن قاتار، ق ر قك 74-بابى 1-بولىگىندە سوتتالۋشىنىڭ كىشكەنتاي بالاسىنىڭ بولۋىنا بايلانىستى جازاسىن ورىنداۋدى ەكى جىلعا كەيىنگە قالدىردى. ول زاڭدا بەلگىلەنگەن، كورسەتىلگەن"، - دەدى اقتوبە №2 سوتىنىڭ سۋدياسى تۇرسىنحان سالىقوۆ.
بۇعان دەيىنگى سوت وتىرىستارىندا قاتىسۋشىلاردىڭ كوپتىگىنەن ينە شانشار ورىن بولمايتىن. ال ۇكىمدى تىڭداۋعا كەلگەندە كوپشىلىك جينالا قويمادى. سۇلۋشاش ەسىمىمەن وڭىرگە تانىمال كەلىنشەك ناۋقاستارعا ميلليونداپ نەسيە الدىرعان. قىزىعى سول، الدانعاندار قالاي باسى اينالىپ قالعانىن بىلمەيدى. سوتتا ناقتى جابىرلەنۋشى دەپ 136 ادام تانىلدى. ونىڭ ىشىندە ەمشىنىڭ ەت جاقىن تۋىستارى دا، سىنىپتاستارى مەن اۋىلداستارى دا بار.
ەمشى "دەم سالامىن" دەپ ءبارىنىڭ باسىن اينالدىرعان. كەيبىرىنە مەشىت پەن مەديسينالىق ورتالىقتىڭ قۇرىلىسىنا، ەندى بىرەۋلەرگە مۇگەدەك بالامنىڭ ەمىنە قاجەت دەپ اقشا سۇراعان. جابىرلەنۋشىلەر گيپنوزدا جۇرگەندەي كۇي كەشتىك، نەسيەنى قالاي الىپ، قولما-قول قالاي ساناپ بەرگەنىمىزدى بىلمەي قالدىق دەپ وتىر. حالىق ەمشىسىنىڭ كەلتىرگەن جالپى شىعىن كولەمى 579 ميلليون تەڭگەدەن اسادى. ءبىراق بۇل سوما تاعى ارتۋى مۇمكىن. سەبەبى، جابىرلەنۋشىلەردىڭ بانك الدىنداعى قارىزى دا اي سايىن كوبەيىپ وتىر. ونى سوتتالۋشى وتەۋگە مىندەتتەلدى. ال ەمشىنىڭ ادۆوكاتى ۇكىمگە ريزا.
"قازبايەۆا سۇلۋشاش ءوزى شىعىنداردى، حالىقتان العان نەسيەلەرىن وتەۋگە، سوت ءماجىلىسى كەزىندە دە ءبارىن ءوزى ايتتى. "مەن وتەيمىن، ەشكىمنىڭ اقشاسىن جەمەيمىن" دەدى. ەندى بۇل جاعداي ونىڭ قارجى ساۋاتسىزدىعىنان دەپ ويلايمىن"، - دەدى ادۆوكات ەلميرا جۇمابايەۆا.