وقيعاعا قاتىستى جاۋاپتى مەكەمە پىكىر ءبىلدىردى
اقتاۋدىڭ 17-شاعىن اۋدانىنىڭ «Aktau Plaza» تۇرعىن ءۇي كەشەنىندە ىشىندە ادامدارى بار ليفت شاحتاعا قۇلاپ كەتتى، دەپ حابارلايدى Almaty-akshamy.kz قازاقپارات سايتىنا سىلتەمە جاساپ.
تۇرعىنداردىڭ ايتۋىنشا، 25 قىركۇيەك كۇنى كەشكى ساعات 19:30 شاماسىندا ىشىندە ادامدارى بار ليفت شاحتاعا قۇلاعان. ەشكىم زارداپ شەككەن جوق. تۇرعىندار بىر-بىرىنە كومەكتەسىپ، شاحتادان شىققان.
اتالمىش وقيعا كەزىندە ليفتىدە كىشكەنتاي بالالار، جاس انالار بولعان. ولار ءليفتىنىڭ ىستەن شىعۋى ءبىرىنشى رەت ەمەس دەپ شاعىمداندى. «اقتاۋ قالالىق ليفتىلەرى» ج ش س قۇرىلتايشىسى كوپبەرگەن جايلييەۆ مالىمەتىنشە، تۇرعىن ءۇيدىڭ ءليفتى تۇرعىنداردىڭ ءوتىنىشى بويىنشا بارلىق ەرەجەلەرگە قايشى قوسىلعان. ول قاجەتتى سىناقتاردان وتپەگەن جانە پايدالانۋعا بەرىلمەگەن. تۇرىك وندىرىسىندەگى ءليفتىنى جەتكىزۋگە جانە مونتاجداۋعا ارنالعان شارت 2019 جىلى جاسالعان. ءليفتىنى مونتاجداۋ جۇمىسى 2020 جىلى اياقتالعان.
«بارلىق قۇجاتتاردى قۇرىلىس سالۋشىعا تاپسىردىق. ولار ءوز اتىنان پايدالانۋعا بەرۋگە ءوتىنىش بەرۋى كەرەك ەدى. ءبىراق بۇل قۇجاتتار ءۇيدى سالۋشىلاردا بولدى. ولار ءۇيدى تولىق اياقتاماي جاتىپ، ادامداردى قونىستاندىردى. تۇرعىندار ليفت قوسۋدى سۇراي باستادى. ويتكەنى التىنشى، جەتىنشى قاباتتاردا قارت ادامدار تۇرادى. ءبىز زاڭعا قايشى كەلدىك. ءۇيدى تولىق پايدالانۋعا رۇقسات بەرىلگەنگە دەيىن ءليفتىنى ىسكە قوسپاۋ كەرەك ەدى. ءبىز تۇرعىندارعا جەڭىلدىك جاساعانىمىزعا كىنالىمىز»، - دەدى «اقتاۋ قالالىق ليفتىلەرى» ج ش س قۇرىلتايشىسى كوپبەرگەن جايلييەۆ.
پايدالانۋعا تاپسىرار الدىندا ماماندار ءليفتىنىڭ قاۋىپسىزدىگىن تەكسەرۋى كەرەك ەدى. ءبىراق بۇل جۇمىستار جاسالعان جوق. ويتكەنى قۇرىلىس سالۋشى ءالى تىركەۋگە ءوتىنىش بەرمەگەن ەدى. ماماندار توتەنشە جاعدايدىڭ سەبەبى شامادان تىس جۇكتەمە بولۋى مۇمكىن دەپ بولجايدى.