بۇل ساۋالعا مينيستر جاۋاپ بەردى.
ۇلتتىق ەكونوميكا ءمينيسترى الىبەك قۋانتىروۆ قازاقستاندىقتارعا قولدا بار اقشاسىن تەڭگە دەپوزيتتەرىندە ساقتاۋعا كەڭەس بەردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ەكونوميكاعا جاۋاپتى مينيستر رەتىندە ايتىڭىزشى، قازاقستاندىقتار وسىنداي قۇبىلمالى كەزەڭدە قولداعى اقشاسىن ينفلياسيادان قالاي ساقتاندىرۋى كەرەك؟»، - دەپ سۇرادى ب ا ق وكىلى ورتالىق كوممۋنيكاسيالار قىزمەتىندە وتكەن بريفينگتە.
«ارتىق اقشا كوپ بولسا، ارينە، بروكەرلەر ارقىلى شەتەلدەگى جىلجىمايتىن مۇلىككە ينۆەستيسيالاۋعا بولاتىن ەدى. ءبىراق، قازاقستاندىقتار ءۇشىن ەڭ قاراپايىم ءتاسىل اقشانى تەڭگەدەگى دەپوزيتتەردە ساقتاۋ شىعار. ويتكەنى بۇل - ەڭ قاراپايىم جول. ونىڭ مەرزىمدىك جانە مەرزىمدىك ەمەس دەپوزيتتەرى بار. ءوزىڭ ول اقشانى ءدال ءقازىر پايدالانبايتىن بولساڭ، وسىلاي اينالدىرۋعا بولادى. نەگە تەڭگەمەن ساقتاۋ كەرەك دەگەنگە كەلسەك، ويتكەنى مولشەرلەمەسى دوللارعا قاراعاندا الدەقايدا جوعارى. دوللاردىڭ قىمباتتايتىنىنا سەنىپ وتىرىپ تا اقشانى جوعالتۋعا بولادى. بىزدە دوللارداعى دەپوزيتتەرگە 1 پايىز كولەمىندە عانا جىلدىق مولشەرلەمە بەلگىلەنگەن. سوندىقتان تەڭگەدەگى دەپوزيتتە ساقتاۋدى ەڭ ءبىر قاراپايىم جول رەتىندە ايتىپ وتىرمىن»، - دەدى مينيستر.
سونداي-اق، ول بروكەرلەر قىزمەتىنە جۇگىنگەندەر بولسا، اقشانى ءارتاراپتاندىرىپ ينۆەستيسيالاۋ ماڭىزدى ەكەنىن ەسكەرتتى.
«بىزدە قارجىلىق قۇرالدار بارشىلىق. ارتىق اقشاسى بار ادام قارجى نارىعىنان حابارى از، قاراپايىم جان بولسا، سەنىمدى بروكەرلەر ارقىلى اكتيۆتەرىن ءارتاراپتاندىرىپ ساقتاۋ كەرەك دەپ ويلايمىن»، - دەدى الىبەك قۋانتىروۆ.
ايتا كەتەيىك، ۇلتتىق ەكونوميكا ءمينيسترى قازاقستان اۋماعىنان زاڭسىز شىعارىلعان كاپيتال 100 ملرد دوللاردان اسۋى مۇمكىن ەكەنىن ايتتى.