اقش-تا قىس قاھارىنا ءمىندى

قىتىمىر قىس دەس بەرمەۋدە

قاتتى ايازعا ۇلاسقان قىسقى سۋىق پەن دامىلسىز جاۋعان قار شامامەن 250 ملن ادام تۇراتىن اقش اۋماعىنىڭ باسىم بولىگىن (ەل حالقىنىڭ ۇشتەن ەكىسى) قامتىدى، دەپ حابارلايدى Almaty-akshamy.kz قازاقپاراتقا سىلتەمە جاساپ.

اقش-تىڭ 12 شتاتىندا اۋا رايىنىڭ قولايسىزدىعىنا بايلانىستى ەسكەرتۋ جاريالاندى.

قاتتى اياز، ەكپىندى جەل مەن قالىڭ قار 23 ادامنىڭ ولىمىنە سەبەپ بولدى.

ەلدە ءبىر جارىم ميلليوننان استام ادام جارىقسىز قالدى، وتكەن جۇمادا جۇزدەگەن رەيس توقتاتىلدى.

قاتتى داۋىل تەحاستان كۆەبەككە دەيىنگى 3200 كم اۋماقتى قامتىدى.

اقش-تىڭ ۇلتتىق مەتەورولوگيالىق قىزمەتى مۇنداي سۋىق ەل تاريحىندا بۇرىن-سوڭدى بولماعانىن ايتادى. سۋىق اۋا رايى ەلدىڭ بارلىق اۋماعىن قامتىدى.

«جارىلعىش سيكلون» اقش-كانادا شەكاراسىنا، ۇلى كولدەر ايماعىنا قارلى بوران اكەلدى.

كانادانىڭ باسىم بولىگى دە قىسقى داۋىلدىڭ قۇرساۋىندا قالدى.

قار شامادان تىس كوپ جاۋعاندىقتان، اۋا رايى جىلىنعان جاعدايدا، سەل ءجۇرۋ ءقاۋپى بار.

قىسقى بوران قۇرباندارىنىڭ اراسىندا جول اپاتىنان قازا تاپقاندار دا بار. اۋا رايىنىڭ قولايسىزدىعىنا بايلانىستى جولدارداعى جاعداي ءبىرشاما قيىنداعان.

اقش ۇلتتىق اۋا رايى قىزمەتى وسى اپتانىڭ سوڭىنا قاراي ەلدىڭ كەيبىر ايماقتارىندا اۋا تەمپەراتۋراسى مينۋس 45 گرادۋسقا دەيىن تومەندەيتىنىن حابارلادى.