اقش-تاعى مەنەدجەرلەردىڭ 93 پايىزى كومانداسىنىڭ اپتاسىنا ءتورت كۇن جۇمىس ىستەۋىنە قارسى ەمەس.
اقش-تا 4 كۇندىك جۇمىس اپتاسىنا اۋىسۋ تۋرالى باستاما كوتەرىلىپ جاتىر، دەپ حابارلايدى اlmaty-akshamy.kz 24.kz سىلتەمە جاساپ. زەرتتەۋ ناتيجەلەرى بويىنشا كوپتەگەن كومپانيانىڭ باسشىلارى ءتورت تاۋلىك جۇمىس جۇيەسىن قولدايدى ەكەن. ويتكەنى ونىڭ جۇمىس بەرۋشىگە دە جۇمىسشىعا دا ءتيىمدى ەكەنى انىقتالدى. اقش-تا جۇمىسسىزدىق دەڭگەيى ءالى دە تومەن. كەيبىر كاسىپورىندار بىلىكتى مامانداردان ايىرىلىپ قالماس ءۇشىن جاڭا ەرەجەنى ەنگىزە باستاعان.
وتكەن ايدا مەريلەند شتاتى ءتورت كۇندىك جۇمىس اپتاسىنا كوشكەن كاسىپورىندارعا سالىقتىق جەڭىلدىك قاراستىرۋ جونىندەگى زاڭ جوباسىن ۇسىندى. ەگەر قۇجات قابىلدانسا اقش-تاعى العاشقى باعدارلاما بولعالى تۇر.
جالپى، امەريكالىقتار اپتاسىنا 4 تاۋلىك، 10 ساعاتتان جۇمىس ىستەۋگە قارسى ەمەس. ويتكەنى وتباسىنا، ءوزىنىڭ دەنساۋلىعىنا كوبىرەك كوڭىل بولەتىن بوس ۋاقىت پايدا بولادى دەپ سانايدى.
«Robert Half» eڭبەكپەن قامتۋ اگەنتتىگىنىڭ زەرتتەۋى بويىنشا اقش-تاعى مەنەدجەرلەردىڭ 93 پروسەنتى كومانداسىنىڭ اپتاسىنا ءتورت كۇن جۇمىس ىستەۋىنە قارسى ەمەس. ولاردىڭ 64 پروسەنتى الداعى 5 جىلدا جاڭا قىسقارعان جۇيەگە كوشۋدى جوسپارلاپ ءجۇر ەكەن.
ينديانا ۋنيۆەرسيتەتى كەللي بيزنەس مەكتەبىنىڭ دوسەنتى كريشتيانۋ گۋارانانىڭ ايتۋىنشا، ءتورت كۇندىك جۇمىس ونىمدىلىگىن زەرتتەۋ جۇمىستارى كوپ جەردە جۇرگىزىلىپ جاتىر. ساراپتاما كورسەتكەندەي، اپتاسىنا ءتورت تاۋلىك جۇمىس ءتارتىبى كومپانياعا عانا ەمەس، ونىڭ قىزمەتكەرلەرىنە دە ءتيىمدى ەكەنىن كورسەتكەن. سونىڭ ىشىندە ەڭ اۋقىمدى ءارى ناقتى زەرتتەۋدى ۇلىبريتانيا جاسادى. ءتۇرلى سالاداعى 61 كومپانيا جانە 3300 قىزمەتكەر ءداستۇرلى جۇمىس اپتاسىنان ءتورت كۇندىككە اۋىسقان. بۇل كاسىپورىندار ۇجىمنىڭ احۋالى مەن ونىمدىلىگىن ءبىلۋ ءۇشىن پيلوتتىق زەرتتەۋگە قاتىسقان.
ۇلىبريتانياداعى زەرتتەۋ قورىتىندىسى بويىنشا، جاڭا جۇمىس اپتاسىنا اۋىسقان كومپانيانىڭ تابىسى اسا وزگەرمەگەن. قىزمەتكەرلەردىڭ ەڭبەك ونىمدىلىگى دە تومەندەمەگەن. كەرىسىنشە، قىزمەتكەرلەردىڭ شارشاۋى ازايىپ، ۇيقىسى قانىپ، الاڭداۋشىلىق جويىلعان.
«تاجىريبەگە قاتىسقان كومپانيالاردا جۇمىسقا كەشىگۋ، كەلمەي قالۋ، سىرقاتقا بايلانىستى سۇرانىپ كەتۋ سياقتى جاعدايلار ازايعان. ءقازىر كوپتەگەن كاسىپورىندار وسى اپتاسىنا ءتورت كۇندىك جۇمىستى تالانتتى مامانداردى ۇستاپ تۇرۋ ءۇشىن ۇسىناتىن بولعان. دەمەك كومپانيانىڭ ۇزاق مەرزىمدە جەتىستىككە جەتۋىنە قاجەت ءتاسىل سياقتى. كاسىپكەرلەر مەن قاراپايىم جۇمىسشىلار دا پاندەميا كەزىندە قاشىقتان جۇمىس ىستەۋدىڭ تيىمدىلىگىن كوردى. دەگەنمەن ساراپشىلار ءتورت كۇندىك جۇمىسقا كوشكەن كومپانيالار ءالى دە سيرەك ەكەنىن ايتادى. ەڭ باستىسى، ءار كاسىپورىن ىشكى ءتارتىبى مەن ەڭبەك زاڭدىلىعىن ساقتاي وتىرىپ ىڭعايلى كەستە بەكىتۋى كەرەك»، - دەپ مالىمدەدى ينديانا ۋنيۆەرسيتەتى كەللي بيزنەس مەكتەبىنىڭ دوسەنتى كريشتيانۋ گۋارانا.