2025 جىلدىڭ 10 قاڭتارىندا اقش قارجى مينيسترلىگى رەسەيگە قارسى ەڭ قاتاڭ سانكسيالار پاكەتىن جاريالادى. بۇل شەكتەۋلەر رەسەيدىڭ مۇناي كىرىستەرىنە باعىتتالىپ، ەلدىڭ مۇناي-گاز سەكتورىنداعى نەگىزگى ويىنشىلاردى، سونداي-اق رەسەيلىك مۇنايدى تاسىمالدايتىن 180-نەن استام كەمەنى قامتيدى، دەپ حابارلايدى aqshamnews.kz.
سانكسيالىق تىزىمگە «گازپرومنەفت»، «سۋرگۋتنەفتەگاز» جانە ولاردىڭ ەنشىلەس كومپانيالارى، سونىڭ ىشىندە مۇناي وڭدەۋ زاۋىتتارى مەن مۇناي ءوندىرۋشى كاسىپورىندار كىردى. ولاردىڭ قاتارىندا ماسكەۋ جانە ومبى موز-دەرى، «گازپرومنەفت-نويابرسكنەفتەگاز»، «گازپرومنەفت-ورەنبۋرگ» جانە باسقالارى بار. شەكتەۋلەر «گازپروم نەفتتىڭ» قازاقستان، تاجىكستان، قىرعىزستان، سەربيا (NIS) جانە ليۋكسەمبۋرگتە تىركەلگەن Gazprom Neft International شەتەلدىك قۇرىلىمدارىن دا قامتىدى.
سانكسياعا «روسنەفتەفلوت» كومپانياسىنا تيەسىلى، ۇزىندىعى 250 مەتر، جۇك كوتەرىمدىلىگى 114 مىڭ توننا بولاتىن «افراماكس» كلاستى مۇناي تانكەرى دە ىلىكتى. بۇل كەمە شيكى مۇناي جانە سۇيىق جۇكتەردى تاسىمالداۋعا ارنالعان.
بۇل تانكەر 2020 جىلدىڭ 6 شىلدەسىندە رەسەيدىڭ «زۆەزدا» كەمە جاساۋ كەشەنىندە قازاقستاننىڭ تۇڭعىش پرەزيدەنتىنىڭ 80 جىلدىعىنا وراي سالىنعان. نازاربايەۆتىڭ ەسىمى تانكەرگە رەسەي ۇكىمەتىنىڭ قازاقستان مەن رەسەي اراسىنداعى قارىم-قاتىناستى دامىتۋعا قوسقان ۇلەسىن مويىنداۋى رەتىندە بەرىلگەن.