امەريكادا جەلىگە كۇدىكپەن قارايدى.
اقش كونگرەسىنىڭ وكىلدەر پالاتاسى ەندى تەلەفوندارىندا TikTok الەۋمەتتىك جەلىسىن پايدالانۋعا تىيىم سالادى، دەپ حابارلايدى Almaty-akshamy.kz Inbusiness.kz سىلتەمە جاساپ.
اقش بيلىگى TikTok قوسىمشاسىنا جانە ونىڭ قىتايلىق يەسى ByteDance-كە كۇدىكپەن قاراۋدى جالعاستىرىپ كەلەدى. اسىرەسە، پلاتفورمانىڭ قحر كوممۋنيستىك پارتياسىمەن بايلانىستارى مەن قىتايلىق شەنەۋنىكتەر اقش دەرەكتەرىنە قول جەتكىزە الادى دەگەن سىبىس شىققالى بەرى الاڭداۋشىلىق ارتا ءتۇستى. وسىعان بايلانىستى كونگرەسستە شىعىندار تۋرالى جيىنتىق زاڭ جوباسىندا ۇكىمەتتىك قۇرىلعىلارعا قوسىمشانى ورناتۋعا تىيىم سالىندى.
2022 جىلى اقش كونگرەسى تەحنولوگيالىق يندۋسترياعا اسەر ەتكەن بىرنەشە ماڭىزدى زاڭنامانى قابىلدادى.
ولاردىڭ اراسىندا وندىرۋشىلەرگە اقش-تا جارتىلاي وتكىزگىش زاۋىتتارىن سالۋ ءۇشىن ونداعان ميلليارد دوللار بەرەتىن چيپ تۋرالى زاڭ دا بار. وسىلايشا، ۆاشينگتون كومپيۋتەرلىك چيپتەرگە قاتىستى بەيجىڭگە تاۋەلدى بولعىسى كەلمەيدى.
جاڭا زاڭ جوباسى بىرنەشە جارتىلاي وتكىزگىش كومپانيالاردى اريزونا، نيۋ-يورك پەن وگايودا جاڭا زاۋىتتار سالۋدى باستاۋعا يتەرمەلەگەنى بەلگىلى.
TikTok - بەيجىڭدەگى ByteDance كومپانياسىنا تيەسىلى قىسقا بەينەلەردى جاساۋعا جانە كورۋگە ارنالعان قوسىمشا.