دانا بيلەردىڭ دارا جولى.
الماتىدا «دالا ەكسپەديسياسى نەگىزىندەگى دەرەكتەر جانە ەل بىرلىگىن ەسەلەگەن التاي بي نايمانباي ۇلى» اتتى حالىقارالىق عىلىمي-تاجىريبەلىك كونفەرەنسيا ءوتتى، دەپ حابارلايدى Almaty-akshamy.kz.
الماتى قالاسىنىڭ عىلىم ورداسىندا قالا اكىمدىگىنىڭ قولداۋىمەن «التاي بي» قوعامدىق قورى ۇيىمداستىرعان «دالا ەكسپەديسياسى نەگىزىندەگى دەرەكتەر جانە ەل بىرلىگىن ەسەلەگەن التاي بي نايمانباي ۇلى» اتتى حالىقارالىق عىلىمي-تاجىريبەلىك كونفەرەنسياسى بولدى. اتالمىش جيىن ادىلەتتى قازاقستان قۇرۋ جولىندا تاريحي سانا مەن ەلجاندىلىق قاسيەتتەردى قالىپتاستىرۋ جانە التاي بي نايمانباي ۇلىنىڭ ءومىرى مەن جوڭعار باسقىنشىلارىنا قارسى كۇرەستەگى ەرلىگىن تالقىلاۋ مىسالىندا قازاقستاندىق ءپاتريوتيزمدى نىعايتۋ ماقساتىندا ءوتتى.
«قازاق دالاسى ەرتە زامانداردان-اق قازاق مەملەكەتتىلىگىنىڭ نەگىزىن قالىپتاستىرۋدا ايانباي قىزمەت ەتكەن، ادىلدىكتىڭ اق تۋىن بيىك ۇستانعان دانا بيلەرى مەن وجەت باتىرلارىنىڭ قىزمەتىمەن تاريحتا ورىن العان. قازاق-جوڭعار سوعىسى داۋىرىندە قازاق بيلەرى ءوزىنىڭ شەشەندىك سوزدەرىنىڭ ءمانى مەن ديپلوماتيالىق شەبەرلىگىمەن قازاق تاريحىندا ەسىمدەرى ورنەكتەلىپ، حالىق ساناسىندا ماڭگىلىك ەستە قالعان. قازاق ءتول تاريحىنداعى بيلەر اراسىنداعى كورنەكتى تاريحي تۇلعالاردىڭ ءبىرى – البان تايپاسىنىڭ قىزىلبورىك رۋىنان شىققان، تانىمال ءاجىباي باتىردىڭ اعاسى التاي بي نايمانباي ۇلى»، – دەپ اتاپ ءوتتى شارا ۇيىمداستىرۋشىلارى.
كونفەرەنسياعا قالا اكىمدىگىنىڭ وكىلدەرى، الماتىنىڭ جوعارى وقۋ ورىندارىنىڭ پروفەسسورلارى مەن وقىتۋشىلارى، قىرعىزستان زەرتتەۋشىلەرىنىڭ دەلەگاسياسى جانە التاي بي نايمانباي ۇلىنىڭ ۇرپاقتارى قاتىستى.
