قازاق مادەنيەتىمەن، ابەديەتىمەن تانىسام دەگەن امەريكالارىقتار ءۇشىن اقش استاناسىندا اباي ورتالىعى جۇمىس ىستەپ تۇر.
دجوردج ۆاشينگتون ۋنيۆەرسيتەتى جانىنان قۇرىلعان ورتالىق 2019 جىلدىڭ باسىندا اشىلدى. پاندەميا كەدەرگى كەلتىرگەنىمەن، ورتالىق ءقازىر تولىققاندى جۇمىس ىستەپ تۇر، دەپ حابارلايدى Almaty-akshamy.kz 24.kz-كە سىلتەمە جاساپ.
قازاق مادەنيەتىن بىلگىسى كەلگەن شەت ەلدىك ستۋدەنتتەرگە اباي ورتالىعى تاپتىرماس جەر. قازاقستانعا قاتىستى اعىلشىن تىلىندە جارىق كورگەن زەرتتەۋلەر مەن انتالوگيالاردى پايدالانا الادى. كلاسسيك جازۋشىلاردىڭ شىعارمالارىن دا وقۋعا بولادى. كەزىندە ەرجان قازىحانوۆتىڭ قولداۋىمەن اشىلعان ورتالىق پاندەميادان سوڭ جۇمىسىن قايتا جانداندىردى.
«بءىز اباي ورتالىعى ارقىلى تەك تاريحي جادىگەرلەردى كورسەتىپ، مادەني جەتىستىكتەرىمىزدى قانا تانىتۋدى جوسپارلاپ وتىرعان جوقپىز. سونىمەن قاتار قازىرگى قازاقستان مادەنيەتىندەگى جاڭالىقتاردى دا جەتكىزگىمىز كەلەدى. سوندىقتان ورتالىقتىڭ جۇمىسىن شيراتۋعا قاتىستى ۇلكەن جوسپارلارىمىز بار. ەلىمىز تۋرالى اقپاراتتى اعىلشىن تىلىندە تاراتۋ تەك امەريكادا عانا ەمەس، بۇكىل الەمدە قازاقستانعا دەگەن قىزىعۋشىلىق ارتادى دەپ سانايمىز»، - دەدى ەۋروپا، رەسەي جانە ەۋرازيالىق زەرتتەۋلەر ينستيتۋتىنىڭ قىزمەتكەرى ايتولقىن قۇرمانوۆا.
ورتالىقتىڭ سايتىندا قازاق تاريحى مەن مادەنيەتىنە قاتىستى عىلىمي ماقالالار مەن باتىس عالىمدارىنىڭ قۇندى زەرتتەۋلەرى بار. ۇلتتىق مۋزىكالىق اسپاپتارعا قاتىستى پودتكاستاردى دا وسى جەردەن تىڭداپ، اباي مۇراجايىنا 3D فورماتتا ونلاين ساياحات جاساۋعا بولادى. ورتالىق دجوردج ۆاشينگتون ۋنيۆەرسيتەتىندەگى ەۆروپا، رەسەي جانە ەۋرازيا زەرتتەۋ ينستيتۋتى جانىنان قۇرىلعان. ينستيتۋت ديرەكتورىنىڭ سوزىنشە، قازاقستاندى تانىپ بىلۋگە دەگەن قىزىعۋشىلىق ستۋدەنتتەر اراسىندا جوعارى.
«مادەنيەت كەز كەلگەن ەلدىڭ قۋاتى، كۇشى. ونى جاقسى بىلمەي سىرتقى ساياساتىن زەرتتەۋ، ءتۇسىنۋ جانە حالىقارالىق بايلانىس ورناتۋ مۇمكىن ەمەس. اباي ورتالىعى قازاق تاريحىن، مادەنيەتىن، مۋزىكاسىن، ادەبيەتىن كەڭىرەك اۋديتورياعا پاش ەتۋدىڭ مۇمكىندىگى دەپ بىلەمىز. جالپى، قازاق مادەنيەتىن تەك زەرتتەۋشىلەرگە عانا ەمەس قاراپايىم امەريكالىقتارعا تانىتۋ ءۇشىن كوپتەگەن شارالاردى وتكىزۋ جوسپاردا»، - دەيدى WJ ۋنيۆەرسيتەتى، ەۆروپا، رەسەي جانە ەۋرازيا زەرتتەۋ ينستيتۋتىنىڭ ديرەكتورى مارلەن لاريۋەل.
ەكى جىلدا ورتالىق ءبىرقاتار شارالاردى جۇزەگە اسىردى. ماسەلەن، گارۆارد ۋنيۆەرسيتەتىندە اباي سيمپوزيۋمى ءوتىپ، مۇرالارى كوپشىلىككە تانىستىرىلدى. تاياۋدا مۇحتار اۋەزوۆتىڭ 125 جىلدىق مەرەيتويىنا وراي حالىقارالىق ونلاين عىلىمي كونفەرەنسيا ءوتتى. مۇنداي مادەني شارالار شيراي تۇسپەك.