سقو-دا مۇز قۇرساۋىندا قالعان اققۋ قۇتقارىلدى
سولتۇستىك قازاقستان وبلىسىنداعى كولدە قالىپ قويعان ەكى اققۋدىڭ ءبىرىن قۇتقارۋشىلار مۇز قۇرساۋىنان بوساتتى، دەپ حابارلايدى almaty-akshamy.kz قازاقپاراتقا سىلتەمە جاساپ.
پەتروپاۆل ماڭىنداعى تۇزدى كولدە ەكى اققۋدىڭ قالىپ قويعاندىعى تۋرالى قۇتقارۋشىلارعا تۇرعىندار حابارلاعان. التى ماماننان تۇراتىن قۇتقارۋ توبى وقيعا ورنىنا باردى.
«ءقازىر كولدىڭ بەتىنە شىعۋ اسا ءقاۋىپتى. ادەتتە مۇزدىڭ قاتقانىن كۇتەمىز. ءقازىر ونىڭ قالىڭدىعى نەبارى 6 سم عانا. كەز-كەلگەن ۋاقىتتا ويىلىپ كەتۋى مۇمكىن. ارنايى شانامىز بار. ەكەۋىمىز مۇز بەتىنە شىقساق، ەكى قۇتقارۋشى جاقىن جەردە كومەك بەرۋگە دايىن تۇرادى. مۇنداي وپەراسيا كەيدە بىرنەشە ساعاتقا سوزىلۋى مۇمكىن»، - دەيدى قۇتقارۋ ءبولىمىنىڭ باس قۇتقارۋشىسى دانيار ءبادىلوۆ.
قۇتقارۋشىلار مۇز قۇرساۋىنا قالعان ەكى اققۋدىڭ بىرەۋىن عانا ۇستاپ الدى. ەكىنشىسى ۇشىپ كەتىپ، قامىس اراسىنا جاسىرىندى.
«جىلدا وسى ۋاقىتتا جىلى جاققا ۇشا الماي قالعان جابايى قۇستاردى قۇتقارامىز. بىلتىر 11 اققۋدى مۇزدان الىپ شىقتىق. 2017 جىلى 16 قۇستى قۇتقارعان ەدىك. ادەتتە كەش وسكەن، دۇرىس جەتىلىپ، قاناتى قاتايىپ ۇلگەرمەگەن بالاپان قۇستار قالىپ قويادى. ءقازىر ءبىز بۇل اققۋدى حالىق اراسىندا «جىلى كانال» دەپ اتالىپ كەتكەن سۋ قويماسىنا اپارامىز. جىلۋ-ەلەكتر ورتالىعىنان اعىپ جاتقان تەحنيكالىق سۋ قىس بويى قاتپايدى. قۇستىڭ قىستاپ شىعۋىنا قولايلى. ال ءبىز ونى ءوز باقىلاۋىمىزعا الامىز»، - دەيدى سقو ورمان شارۋاشىلىعى جانە جانۋارلار الەمى اۋماقتىق ينسپەكسياسىنىڭ ءبولىم باسشىسى ولەگ بەسپالوۆ.
ماماننىڭ ايتۋىنشا، وڭىرگە جازدا 4 مىڭنان استام اققۋ كەلەدى. تابيعاتتى قورعاۋشىلار قىس تۇسكەنگە دەيىن سۋ قويمالارىن باقىلاۋعا الىپ، توبىنان قويعان قۇستاردى قامقورلىققا الادى.