شەكارادان وتە الادى، ءبىراق تىركەلە المايدى. ىىم-دە وڭ رولدەگى كولىكتەر تۋرالى ايتتى
بۇل تۋرالى ق ر ىشكى ىستەر مينيسترلىگى اكىمشىلىك پوليسيا كوميتەتى ءتوراعاسىنىڭ ورىنباسارى سەرىك ءتۇسىپوۆ ىىم-دە وتكەن بريفينگتە ايتتى دەپ حابارلايدى almaty-akshamy.kz
ءرولى وڭ جاقتا ورنالاسقان اۆتوكولىكتەردى قازاقستاندا تىركەۋگە تىيىم سالىنعان. ول 2008 جىلدان باستاپ جۇزەگە اسىرىلىپ كەلەدى. سول ۋاقىتتان بەرى ولار قازاقستاندا تىركەلمەيدى، - دەدى ول.
تۇسىپوۆكە وڭ رولدەگى كولىكتى ساتىپ العاندار قازاقستان شەكاراسىنا وتكەن دەرەكتەر بويىنشا سۇراق قويىلدى.
بۇل جەردە تىركەۋگە رۇقسات جوق. ياعني، ءبىز ازاماتتارعا قانداي دا ءبىر مۇلىكتى ساتىپ الۋعا تىيىم سالا المايمىز. بۇل - كونستيتۋسيادا كورسەتىلگەن ونىڭ قۇقىعى. الايدا زاڭ بويىنشا ونداي كولىكپەن قوزعالۋ ءۇشىن ول قازاقستاننىڭ تىركەۋىندە بولۋى كەرەك. وسىنى تۇسىنگەن ابزال. رەسەيدە ساتىپ العان كولىك بولسا، رەسەيدەگى بۇل كولىكتىڭ بۇرىنعى يەسى اۆتوكولىكتىڭ قازاقستاندا تىركەلۋى كەرەگىن ءبىلىپ، بەلگىلى ءبىر ۋاقىتتان كەيىن سول جاقتاعى ەسەپتەن شىعارادى. ال قازاقستاندىق ازاماتتار قازاقستان شەكاراسىندا بۇرىنعى قۇجاتتارىمەن پايدالانۋدى جالعاستىرا بەرەدى. ال بۇلاي ىستەۋگە بولمايدى. سەبەبى كولىك ەسەپتەن شىعارىلعان، - دەدى ول.
ءتۇسىپوۆ زاڭ بويىنشا كولىك تەك تىركەلگەن جاعدايدا عانا قوزعالا الاتىنىن ەسكە سالدى.
زاڭ تالاپتارىن ورىنداۋ كەرەك. ءقازىر قازاقستاندىق ەسەپتە 4،2 ملن تەحنيكا بىرلىگى تىركەلگەن. بۇل تالاپتى قازاقستاندىق جۇرگىزۋشىلەر تولىق ورىنداپ جاتىر. سوندىقتان بەلگىلى ءبىر ساناتقا جەڭىلدىك جاساۋ زاڭدا قاراستىرىلماعان. سوندىقتان بۇل كولىكتەردى تىركەۋ كەرەك نە وسىعان دەيىنگى يەسىمەن ماسەلە شەشىلمەگەنشە پايدالانباۋ كەرەك، - دەدى ءتۇسىپوۆ.