بىرلەسكەن جۇمىستىڭ ناتيجەسىندە 25 ەلدى مەكەندە ەكى مىڭ تۇرعىن ءۇيدى سۋ باسۋىنا جول بەرىلمەدى، سۋ تاسقىنىنان زارداپ شەككەندەرگە كەلتىرىلگەن زالال بارىنشا ازايتىلدى.
سۋ تاسقىنىنا قارسى ءىس-شارالارعا ازاماتتىق قورعانىس جۇيەسىنىڭ، ۇلتتىق ۇلاننىڭ، ىشكى ىستەر ورگاندارىنىڭ ءۇش مىڭنان استام قىزمەتكەرى جانە ءبىر جارىم مىڭعا جۋىق ارنايى تەحنيكا جۇمىلدىرىلدى، دەپ حابارلايدى Almaty-akshamy.kz ق ر تجم-عا سىلتەمە جاساپ.
وبلىستاعى ەلدى مەكەندەردى قورعاۋ ءۇشىن ۇزىندىعى 45 كم جەر ۇيىندىلەرىمەن 300 مىڭعا جۋىق ينەرتتى ماتەريال سالىنعان قاپتار دايىندالدى.
سۋ تاسقىنىنا قارسى كۇرەستىڭ الدىڭعى قاتارىندا اقمولا، جامبىل وبلىستارى جانە شىمكەنت قالاسى توتەنشە جاعدايلار دەپارتامەنتتەرىنىڭ قىزمەتكەرلەرى، مالىك عابدۋللين اتىنداعى ازاماتتىق قورعاۋ اكادەمياسىنىڭ كۋرسانتتارى مەن وفيسەرلەرى، 5510 اسكەري ءبولىمىنىڭ جەكە قۇرامى، پوليسيا قىزمەتكەرلەرى مەن ەرىكتىلەر بولدى.
كوكتەمگى سۋ تاسقىنى وتكەن كۇردەلى جانە اۋقىمدى ۋچاسكەلەردىڭ ءبىرى - اتباسار اۋدانى. قازىرگى ۋاقىتتا جاباي وزەنىندەگى سۋ دەڭگەيى 2،8 مەترگە دەيىن تومەندەدى.
بۇگىن اتباسار قالاسىندا سۋ تاسقىنىن جويۋعا قاتىسۋشىلاردى سالتاناتتى تۇردە شىعارىپ سالۋ ءراسىمى ءوتتى.
اقمولا وبلىسىنىڭ اكىمى العىسىن ءبىلدىرىپ، بىرلەسكەن كۇش-جىگەر سۋ تاسقىنىنىڭ ەڭ جوعارى كەزەڭدەرىن از شىعىنمەن وتكىزۋگە مۇمكىندىك بەرگەنىڭ اتاپ ءوتتى.
«بىرلەسكەن جانە جەدەل كۇش-جىگەردىڭ ارقاسىندا ءبىز سۋ تاسقىنىنىڭ اۋىر زارداپتارىن بولدىرماۋعا جانە ەڭ باستىسى - ادامداردىڭ ءومىرىن ساقتاپ قالۋعا قول جەتكىزدىك. بۇل ىستە ازاماتتىق قورعاۋ جانە ىشكى ىستەر، قورعانىس ورگاندارىنىڭ قىزمەتكەرلەرى ۇلكەن جۇمىس اتقاردى. سىزدەر ءوز مىندەتتەرىڭىزدى ابىرويمەن ورىندادىڭىزدار - ادامداردىڭ ءومىرىن، قاۋىپسىزدىگىن جانە قۇقىقتارىن قورعادىڭىزدار. ءبىزدىڭ ازاماتتارىمىزدىڭ تىنىشتىعى، ولاردىڭ ءوز ءال-اۋقاتىنا دەگەن سەنىمى ءبىرىنشى كەزەكتە ءسىزدىردىڭ سىني ساتتەردەگى ىس-ارەكەتتەرىڭىزگە بايلانىستى»، - دەدى م. احمەتجانوۆ.
سۋ تاسقىنى كەزىندە ەرىكتىلەر، تۇرعىنداردىڭ وزدەرى جانە كاسىپكەرلەر دە ۇلكەن كومەك كورسەتتى.
ءوڭىر باسشىسى قالپىنا كەلتىرۋ جوسپارلارىنا توقتالدى.
«ءقازىر قالپىنا كەلتىرۋ جۇمىستارى باستالدى. ۇيلەر، ينجەنەرلىك ينفراقۇرىلىم سالۋ بويىنشا كوپ جۇمىستار اتقارۋىمىز كەرەك. بۇل باعىتتا ءبىز كەزەڭ-كەزەڭمەن جۇمىس ىستەي باستادىق. ءبىرىنشى كەزەكتە سۋ باسقان اۋىلدارعا كولىك قاتىناسى اشىلدى، بارلىق ءوتىنىش بىلدىرۋشىلەرگە ءبىرجولعى تولەمدەر باستالدى، ماتەريالدىق شىعىندار ەسەپتەلۋدە. سۋ تاسقىنىنان زارداپ شەككەندەردىڭ ەشقايسىسى دا نازاردان تىس قالمايدى»، - دەدى وبلىس اكىمى.
اتباسار قالاسىنىڭ تۇرعىنى ەكاتەرينا ماتروس جاۋاپ ءسوز سويلەدى، ول ءوز كەزەگىندە بارلىق قۇتقارۋشىلارعا العىسىن ءبىلدىردى.
ايتا كەتەيىك، اتباسار اۋدانىندا اۆاريالىق-قۇتقارۋ جۇمىستارىنا 400-گە جۋىق ادام قاتىسىپ، 70-تەن استام بىرلىك ارنايى تەحنيكا جۇمىلدىرىلدى.