داستۇرگە اينالعان «ۇزدىك پەداگوگ» كونكۋرسىنىڭ اۋداندىق كەزەڭى اياقتالىپ، №206 مەكتەپ-گيمنازيانىڭ فيزيكا ءپانى ءمۇعالىمى اقمارال نيازبەكوۆا ءبىرىنشى ورىندى يەلەنىپ، ناۋرىزباي اۋدانىنىڭ «ۇزدىك پەداگوگى» اتاندى.
جاس تا بولسا مول تاجىريبەسى بار ۇستازدىڭ ءبىلىم سالاسىنداعى جۇمىس ءوتىلى 23 جىلدى قۇرايدى. وسىناۋ جىلدار ىشىندە اقمارال قالتاي قىزى ءوزىنىڭ ىزدەنىمپازدىعىمەن، ەڭبەكسۇيگىشتىگىمەن تالاي بەلەستى باعىندىردى.
ءور التايدىڭ تابيعاتىنان ءنار الىپ، شىڭدالىپ وسكەن اقمارال قالتاي قىزى ارمان قۋىپ الىس جولعا شىعادى. ۇستاز بولسام دەگەن ارمانى الدامادى. ومىردە جاقسى جاندارعا جولىقتى. قيىن دا، قىزىقتى ماماندىقتىڭ مايتالمان مامانىنا اينالدى.
اقمارال نيازبەكوۆا ەڭبەك جولىن 2001 جىلى الماتى قالاسىنىڭ بوستاندىق اۋدانىنداعى №138 گيمنازيادا فيزيكا ءپانىنىڭ ءمۇعالىمى بولىپ باستايدى. كەيىن جەتىسۋ اۋدانىنداعى №148 مەكتەپ-گيمنازياسىندا جۇمىس ىستەپ، قازىرگى ۋاقىتتا №206 مەكتەپ-گيمنازياسىندا ءوز قىزمەتىن جالعاستىرىپ جاتىر. بىلىكتى ۇستاز قاجىرلى ەڭبەگى مەن كاسىبي شەبەرلىگىنىڭ ارقاسىندا كوپتەگەن جەتىستىكتەرگە قول جەتكىزدى. ءوز سالاسىنىڭ قىرى مەن سىرىن مەڭگەرىپ، ناعىز مامانعا اينالدى. ۇزاق جىلعى تاجىريبە مەن تىنىمسىز ەڭبەك ونى تالاي بيىككە شىعاردى. ۇستازدىڭ ىزدەنىسى تالاي بايراقتى بايگەلەرگە جول اشتى.
ىزدەنىمپاز ۇستازدىڭ قاتىسقان بايقاۋلارى وتە كوپ. ولاردىڭ قاتارىندا «دارىن» رەسپۋبليكالىق پراكتيكالىق ورتالىعى ۇيىمداستىرعان «ۇزدىك اۆتورلىق باعدارلاما»، «Digital Ustaz Almaty 2021» سيفرلىق ورتا قۇرۋ بايقاۋى، «ۇزدىك پەداگوگ»، «پەداگوگيكالىق يدەيالار» سياقتى بايقاۋلار بار. بىلىكتى ۇستازدىڭ وسى سالاداعى ەڭبەگى ەسكەرۋسىز قالعان جوق.
ول «قازاقستان رەسپۋبليكاسىنىڭ قۇرمەتتى پەداگوگى» توسبەلگىسىنىڭ يەگەرى اتاندى، بىرنەشە مارتە قالالىق ءبىلىم باسقارماسىنان «العىس حاتتار» الدى. ەسىمى «ءبىلىم بەرۋ سالاسىنداعى ۇزدىك ەسىمدەر» اتتى ۇزدىك پەداگوگتار انتولوگياسىنا ەندى. ارينە، ۇستازدىڭ ەڭبەگى شاكىرتتەرىنىڭ جەتىستىكتەرىمەن دە ولشەنەدى. اقمارال ۇستازدىڭ وقۋشىلارى پرەزيدەنتتىك وليمپيادا، قالالىق، رەسپۋبليكالىق جانە «دارىن» ورتالىعى ۇيىمداستىرعان پاندىك وليمپيادالاردا فيزيكا ءپانى بويىنشا جۇلدەلى ورىندارعا يە بولىپ كەلەدى.
ءبىز بىلەتىن اقمارال قالتاي قىزىنىڭ يننوۆاسيالىق بەينەسى ونىڭ شاكىرتتەرىنىڭ بىلىمدىك جانە زەرتتەۋشىلىك جەتىستىكتەرىنىڭ جوعارى ناتيجەلەرىمەن ەرەكشەلەنەدى. ول – وقۋشىلاردىڭ عىلىمي زەرتتەۋلەرىنە جەتەكشىلىك ەتۋ ارقىلى ءوزىنىڭ شىعارماشىل ءارى ىزدەنىمپاز پەداگوگ دەگەن ءيميدجىن قالىپتاستىرعان شەبەر ۇستاز.
– وسىناۋ جىلدار ىشىندە ءوزىم تاڭداعان ماماندىقتىڭ ناعىز مامانى بولعانىما قۋانامىن. «ۇستاز بولۋ – باتىلدىقتىڭ بەلگىسى» دەيدى عوي. بۇل شىندىق ەمەس پە؟ مەن بۇگىن ءوزىم ارمانداپ، تاڭداعان ماماندىقتىڭ يەسى اتاندىم. شاكىرتتەرىم دە بەرگەن ءبىلىمىمدى اقتاپ، جاقسى ناتيجەلەرگە قول جەتكىزىپ جاتىر. ءالى دە ءبىلىمنىڭ بيىگىنە ۇمتىلسام دەيمىن، – دەيدى اقمارال قالتاي قىزى.
ونىڭ الار اسۋى مەن شىعار بيىگى ءالى الدا.