قازاقستان پرەزيدەنتى قاسىم-جومارت كەمەل ۇلى توقايەۆتىڭ «Qazaqstan» ۇلتتىق تەلەارناسىنا بەرگەن سۇحباتى الماتى قالالىق ارداگەرلەرى تاراپىنان قىزۋ تالقىعا ءتۇسىپ، وتە جاقسى پىكىرگە يە بولدى. اسىرەسە، مەملەكەتىمىزدى ساقتاپ قالۋ مەن ونىڭ تۇراقتىلىعى تۋرالى ايتقان تۇجىرىمدارى جۇرتشىلىق كوڭىلىنەن شىعىپ، كوكەيگە قونىمدى بولدى.
شىندىعىندا تەرروريست قاراقشىلاردىڭ ەل كونستيتۋسياسى مەن ونىڭ زاڭدىلىق نورمالارىن ورەسكەل بۇزا وتىرىپ، بەيبىت شەرۋشىلەردىڭ الاڭعا شىعۋىن ءوز ماقساتتارىنا پايدالانىپ، ەلدەگى كونستيتسيالىق قۇرىلىمدى بۇزىپ، مەملەكەتتى قۇلاتپاق بولعانى، ەلدەگى بيلىكتى توڭكەرۋگە جاساعان تاعىلىق ارەكەتتەرى ەشبىر اقىلعا سىيمايدى.
كەزىندە الماتى قالاسىنان سايلانعان سەناتور رەتىندە مەن ۇقشۇ پارلامەنتتىك اسسامبلەياسىنىڭ ساياسي ماسەلەلەر جونىندەگى جانە حالىقارالىق قاتىناستار كوميسسياسىنىڭ ءتوراعاسى رەتىندە ۇجىمدىق قاۋىپسىزدىك تۋرالى شارت ۇيىمىنىڭ قىزمەتىمەن تىكەلەي ارالاستىم. وسى ۇيىمنىڭ قۇقىقتىق ماسەلەلەرىن ۇيىمداستىرۋشىلاردىڭ ءبىرى رەتىندە ءبىرقاتار ماڭىزدى قىزمەت اتقاردىم. بۇل حالىقارالىق ۇيىم وسىنداي فورس-ماجورلىق، ياعني كۇتپەگەن جاعدايلاردا ساياسي، اسكەري جانە باسقا ماسەلەلەردى ۇتىمدى شەشۋگە اتسالىسۋ بولىپ تابىلادى. ۇجىمدىق قاۋىپسىزدىك تۋرالى شارت ۇيىمى وسى بەدەلدى ۇيىمعا مۇشە ەلدەردىڭ تۇراقتىلىعى مەن بەيبىت ءومىرىن قامتاماسىز ەتۋدە ماڭىزدى مىندەتتەر اتقارادى.
وسىلايشا پرەزيدەنت قاسىم-جومارت توقايەۆ ءوز سۇحباتىندا ايتىپ وتكەندەي، قاڭتار قاسىرەتى بارىسىندا ۇجىمدىق قاۋىپسىزدىك شارت ۇيىمىنا مۇشە قۇرىلىمدارىن قازاقستانعا شاقىرۋى قاجەتتىلىك جانە دەر كەزىندە قابىلدانعان وڭ شەشىم بولدى دەپ ويلايمىز.