قازاقستان رەسپۋبليكاسى ۇقك شەكارا اكادەمياسى شەكاراشى وفيسەر كادرلارىن دايىندايتىن ەلىمىزدەگى بىردەن-بىر ءارى تاۋەلسىز مەملەكەتتەر دوستاستىعى اۋماعىنداعى باي تاريحى بار، بىرەگەي وقۋ ورنى بولىپ تابىلادى.
ءوزىنىڭ داڭقتى جولىمەن ايشىقتالعان اسكەري وقۋ ورنى العاشىندا ف.دزەرجينسكييدىڭ اتىمەن اتالعان الماتى شەكارا ۋچيليششەسى كەڭەس وداعى اۋماعىنا ءتىپتى، ودان تىس جەرلەرگە دە ايگىلى بولدى. بۇگىندە اتالمىش وقۋ ورنى ق ر ۇقك شەكارا اكادەمياسى دەگەن اتقا يە، دەپ حابارلايدى Almaty-akshamy.kz.
شەكارا اكادەمياسىنان تۇلەپ ۇشقان تۇلەكتەر ونىڭ داڭقىن اسىرىپ كەلەدى. ولار ۇلى وتان سوعىسى كەزىندە، بەيبىت كۇندە دە ەرجۇرەكپەن مەملەكەتتىك شەكارا شەبىن كۇزەتە ءبىلدى. عاسىرعا جۋىق تاريحى بار ءبىلىم ورداسىن وسى جىلدارى 35 000 مىڭنان استام تۇلەك ءبىتىردى. ونىڭ 45 تۇلەگى كەڭەس وداعىنىڭ باتىرى، بىرەۋى ەكى مارتە جانە بەسەۋى رەسەي باتىرى اتاعىنا يە بولدى. سونداي-اق اتالمىش وقۋ ورداسىنىڭ 300-دەن استام تۇلەگى گەنەرال اتاعىنا قول جەتكىزدى.
بۇگىندە اعا بۋىن ۇرپاقتىڭ داڭقتى جاۋىنگەرلىك ءداستۇرىن جالعاستىرعان ءىزباسارلارى ەگەمەندى قازاقستاننىڭ شەكاراسىن سەنىمدى كۇزەتۋدە جانە قازاقستان رەسپۋبليكاسى شەكارا قىزمەتىنىڭ اسكەري بىرلەستىكتەرىمەن بولىمدەرى، باسقا دا بولىمشەلەرىندە بىلىكتىلىكپەن باسشىلىق جاساۋدا.
تاۋەلسىزدىك العان جىلدان بەرى اكادەميانى 8 مىڭنان استام وفيسەر ءبىتىردى. ولار العاشقى قىزمەت جولدارىن شالعايدا ورنالاسقان شەكارا زاستاۆاسى باستىعىنىڭ ورىنباسارى بولىپ باستايدى.
شەكارا اكادەمياسىندا 70-تەن اسا عىلىمي قىزمەتكەر تابىستى ەڭبەك ەتىپ كەلەدى. ونىڭ 7 عىلىم دوكتورى، 29 عىلىم كانديداتى، 12 PhD دوكتورى، 28 پروفەسسورلارمەن دوسەنتتەر ابىرويلى قىزمەت ەتىپ ءجۇر.
2023 جىلدىڭ 24 ماۋسىمىندا ق ر ۇقك شەكارا اكادەمياسىن 200-دەن استام شەكاراشى كۋرسانت وقۋىن ويداعىداي اياقتادى. ونىڭ ىشىندە 30 تۇلەك ۇزدىك ديپلوم يەگەرى اتاندى. 3 كۋرسانت پرەزيدەنت قولىنان العاشقى «لەيتەنانت» اسكەري شەنىن الدى.
ايتا كەتۋ كەرەك، بيىل تۇڭعىش رەت ۇلتتىق قاۋىپسىزدىك كوميتەتى اكادەمياسىنىڭ 50-گە جۋىق كۋرسانتى شەكاراشىلارمەن بىرگە ديپلوم مەن ءتوس بەلگىسىن الدى. ولاردىڭ اراسىندا جالعىز قىز بار. بولاشاق قاۋىپسىزدىك قورعاندارىنىڭ 25 تۇلەگى دە وقۋىن ۇزدىك ديپلومعا بىتىرگەن. ونىڭ تورتەۋى « سپورت شەبەرلىگىنە ۇمىتكەر» ەكەن.
4 جىل وقىپ شەكارا اكادەمياسىنان تۇلەپ ۇشقان جاس لەيتەنانتتار وقۋ- بىلىمنەن بولەك سپورتتا دا بيىك جەتىستىكتەرگە قول جەتكىزدى. اتاپ ايتقاندا، 12 تۇلەك «قازاقستان رەسپۋبليكاسىنىڭ سپورت شەبەرىنە ۇمىتكەر» اتانسا، 5 تۇلەك «قازاقستان رەسپۋبليكاسىنىڭ سپورت شەبەرى» اتاعىن العان. ال، 90 كۋرسانتقا «ۇزدىك سپورتشى جاۋىنگەر» سپورتتىق اتاعى بەرىلگەن.
سالتاناتتى شاراعا ۇلتتىق قاۋىپسىزدىك ورگاندارىنىڭ باسشىلارى مەن ءبىتىرۋشى تۇلەكتەردىڭ اتا-انالارى جانە تۋىستارى قاتىستى. شارا باستالماس بۇرىن بالالارىنىڭ قۋانىشىنا جينالعان قوناقتارعا تاربيەلىك، الەۋمەتتىك-قۇقىقتىق جانە يدەولوگيالىق جۇمىستار باسقارماسىنىڭ ۇيىمداستىرۋىمەن كونسەرتتىك باعدارلاما ۇسىنىلدى.
العاش بولىپ ءبىتىرۋشى تۇلەكتەر ءبىر-بىر سۇلۋ قىزبەن ۆالس بيلەپ، وزدەرىن تاماشالاپ تۇرعان اتا-انالارىنىڭ كوڭىلىنە قۋانىش ۇيالاتتى. ويتكەنى، مۇندا ءار كۋرسانتپەن بيلەپ جۇرگەن سۇلۋ ولاردىڭ الداعى ۋاقىتتا تۇرمىسقا شىعاتىن قىزدارى بولماسىنا كىم كەپىل؟!
سودان كەيىن كوپشىلىكتىڭ الدىنا شىققان كۋرسانتتار كارابيندەرمەن دەفيلە كورسەتتى. دەفيلە – اسقان شاپشاڭدىقتى، رەتتىلىكتى، ادەمىلىكتى جانە قىراعىلىقتى قاجەت ەتەتىن ونەر..
شەكارا قىزمەتى كينولوگيا باسقارماسىنىڭ دەمونستراسيالىق قويىلىمى دا جينالعانداردىڭ كوڭىلىنەن شىقتى. مۇندا قىزمەت ءيتىنىڭ كومەگىمەن ءتۇرلى كورىنىستەر كورسەتىلىپ، قىزمەت ءيتىنىڭ مەملەكەتتىك شەكارانى قورعاۋدا تاپتىرماس كومەكشى ەكەنى كورسەتىلدى.
اسىرەسە، «بوران» دەسانتتىق موتو-مونيەۆرلىك شابۋىلداۋشى توبىنىڭ مەملەكەتتىك شەكارا بۇزۋشىنى قۇرىقتاۋ ءادىسى كورەرمەنگە قاتتى اسەر ەتتى. ارنايى دايىندىقتا جۇرەتىن قىراعى شەكاراشىلار قويان-قولتىق ۇرىسىنان ءتۇرلى ادىس-تاسىلدەر كورسەتتى. مۇنداي كورىنىستى تەك كينودان عانا كورەتىن اتا-انالار مەملەكەتتىك شەكارانىڭ بەرىك قالقانىنا اينالعان سايىپقىران اسكەري قىزمەتشىلەردىڭ ونەرىنە ەرەكشە ءتانتى بولدى.
اكادەميانىڭ پلاسىندا قازداي تىزىلگەن شەكاراشى كۋرسانتتاردى قۇتتىقتاۋ ءۇشىن ۇلتتىق قاۋىپسىزدىك كوميتەتى ءتوراعاسىنىڭ ورىنباسارى قالقابايەۆ مارات ومىربەك ۇلى ءسوز الدى. سودان كەيىن اتا-انالاردىڭ اتىنان -اديلگازينوۆ ەرجان زاينۋللينوۆيچ ءسوز سويلەپ جاس لەيتەنانتتاردىڭ الداعى قىزمەتىنە ساتتىلىك تىلەدى.
ال، تۇلەكتەر اتىنان لەيتەنانت ەرجان بەكبولاتوۆ بارشا قارۋلاس دوستارىن بۇگىنگى قۋانىشتى كۇنىمەن شىن جۇرەكتەن قۇتتىقتادى.
شارا بارىسىندا اسكەري مىندەتتەرىن ورىنداۋدا قازا تاپقان شەكارا اكادەمياسىنىڭ تۇلەكتەرىنە، كۋرسانتتارى مەن قىزمەتكەرلەرىنە اسكەري قۇرمەت كورسەتۋ قۇقىعى - لەيتەنانتتار انۋاربەك پەن نازاربايۇلىنا بەرىلدى. قوس شەكاراشى گۇل شوقتارىن سونداي ۇقىپتىلىقپەن قادام باسىپ ەسكەرتكىش باسىنا قويدى.
گۇل شوعىن قويۋ - قازا تاپقاندارعا قۇرمەت كورسەتىپ، ۇلتىمىزدىڭ قاۋىپسىزدىگى ءۇشىن ءوز ومىرلەرىن ارناپ، قىزمەتتىك بورىشىن اتقارۋ كەزىندە قايعىلى جاعدايدا ومىرلەرىمەن قوش ايتىسقان اسكەري قىزمەتشىلەردى ەسكە الۋدى قامتيدى.
بۇگىندە شەكارا اكادەمياسى - وفيسەر كادرلاردى دايارلاۋعا قويىلاتىن تالاپتاردىڭ بارلىعىنا جاۋاپ بەرەتىن زاماناۋي جوعارى جانە جوعارى بىلىمنەن كەيىنگى ءبىلىم بەرۋ ۇيىمى. كاسىبي بىلىكتى وقىتۋشى قۇرام، ۇزدىك ادىستەمەلىك جانە ماتەريالدىق-تەحنيكالىق بازا، ءبىلىم الۋشىلاردىڭ جەكەلەگەن قاجەتتىلكتەرىنە وراي ىجداعاتتىلىقپەن قولدانىلاتىن ادىستەر، تۇلەكتەردىڭ قازاقستان رەسپۋبليكاسىنىڭ شەكاراسىن قورعاۋداعى مىندەتتەرىن تابىستى ورىنداۋعا مۇمكىندىك بەرەتىن كومانديرلىك داعدىلارىن قالىپتاستىرۋعا، زاماناۋي كاسىبي قۇزىرەتتەلىكتى يگەرۋلەرىنە بارلىق جاعدايدىڭ جاسالۋىن قامتاماسىز ەتەدى.