اق حالاتتى ابزال جاندارعا ارناپ ءمۇسىن قويىلدى

مەديسينا قىزمەتكەرلەرىنە ارنالعان اللەيا 

الماتى وبلىسىندا «اياۋلى الاقان» اللەياسى اشىلدى. ول كوروناۆيرۋس ىندەتىمەن بەتپە-بەت كۇرەسكەن اق حالاتتى جانداردىڭ قۇرمەتىنە ارنالعان، دەپ حابارلايدى  Almaty-akshamy.kz.

Egemen.kz سايتىنىڭ حابارلاۋىنشا، تالدىقورعان قالاسىنىڭ وبلىس ورتالىعى مارتەبەسىن العانىنا 20 جىل تولۋىنا وراي، جاڭا اللەيا اشىلدى. وعان دارىگەرلەردىڭ پاندەميا كەزىندەگى جانكەشتى ەڭبەگىنە العىس رەتىندە «اياۋلى الاقان» ءمۇسىنى قويىلدى. ءمۇسىننىڭ بيىكتىگى - 1،2 م، ۇزىندىعى - 3،8 م، ەنى - 2،8 م. 

«پاندەميانىڭ العاشقى كۇندەرىنەن-اق ەلباسى ۇندەۋىمەن ەلىمىز بىرىگىپ، ىندەتتى جەڭۋگە جۇمىلدى. قيىن جاعدايدا مەديسينا قىزمەتكەرلەرى الدىڭعى قاتاردا كۇرەسكەندەردىڭ ءبىرى بولدى. بۇگىنگى اشىلعان «اياۋلى الاقان» ءمۇسىنى اسا ءقاۋىپتى ىندەتپەن بەتپە-بەت كەلگەن مەديسينا سالاسى قىزمەتكەرلەرىنىڭ قۇرمەتىنە ارنالادى. بۇل – ەل قۇرمەتىنىڭ بەلگىسى، ىستىق ىقىلاسىنىڭ كورىنىسى. ەسكەرتكىش ەل باسىنا قيىندىق تۋعان ساتتە قاھارماندىق كورسەتكەن جانداردىڭ رۋحىنا تاعزىم ەتۋ ورنىنا اينالادى»، - دەدى الماتى وبلىسى اكىمى ءارى جوبا اۆتورى اماندىق باتالوۆ. 

ىندەت كەزىندە وبلىستاعى 31 مەديسينالىق ۇيىم، امبۋلاتوريالىق جانە ستاسيونارلىق دەڭگەيدە 3455 مەديسينا قىزمەتكەرى جۇمىلدىرىلعان. 900-گە جۋىق مەديسينا قىزمەتكەرى كوروناۆيرۋسپەن اۋىرىپ، 14ء-ى كوز جۇمعان.