جازعى اپتاپ تەك جايسىزدىق قانا ەمەس، دەنساۋلىققا تىكەلەي ءقاۋىپ ءتوندىرۋى مۇمكىن. №36 قالالىق ەمحانانىڭ جالپى تاجىريبە دارىگەرى قارلىعاش قالييەۆا كۇن ءوتۋدىڭ جانە ىستىق ءوتۋدىڭ ايىرماشىلىعىن، كىم ءۇشىن ىستىقتىڭ اسا ءقاۋىپتى ەكەنىن، كۇننەن قورعايتىن كرەمدى قالاي دۇرىس قولدانۋ كەرەك ەكەنىن جانە ىستىقتان ساقتانۋدىڭ جولىن ايتىپ بەردى، - دەپ حابارلايدى aqshamnews.kz.
ماماننىڭ ايتۋىنشا، كۇن ءوتۋ - باستىڭ قاتتى قىزىپ كەتۋى، كوبىنە باس كيىمسىز تىكەلەي كۇن ساۋلەسىنىڭ استىندا ۇزاق بولۋدان بولادى. ال ىستىق ءوتۋ - اعزانىڭ جالپى قىزىپ كەتۋى، ول تەرمورەگۋلياسيانىڭ بۇزىلۋىنا بايلانىستى بولادى. ىستىق ءوتۋ ءتىپتى كولەڭكەدە، اسىرەسە اۋاسى تار، جەلدەتىلمەيتىن بولمەدە نەمەسە كولىكتە ورىن الۋى مۇمكىن.
ىستىق اۋا رايى كەزىندە ءقاۋىپ توبىنداعىلار:
- قارت ادامدار
- ءتورت جاسقا دەيىنگى سابيلەر
- جۇكتى ايەلدەر
- جۇرەك-قان تامىر اۋرۋلارى، سەمىزدىك، قانت ديابەتى، وكپەنىڭ سوزىلمالى اۋرۋلارى بار ناۋقاستار.
سونداي-اق كەيبىر دارى-دارمەك، ماسەلەن، ءزار ايدايتىن ءدارى، بەتا-بلوكاتور، انتيدەپرەسسانت قابىلدايتىن ادامدار ءۇشىن ىستىق اۋا رايى ءقاۋىپتى بولۋى مۇمكىن.
كۇن ءوتۋ مەن ىستىق ءوتۋدىڭ العاشقى بەلگىلەرى:
- السىزدىك
- باس اينالۋ
- باس اۋرۋى
- جۇرەك قاعىسىنىڭ جيىلەۋى
- جۇرەك اينۋ، قۇسۋ
- دەنە قىزۋىنىڭ 40°س جانە ودان جوعارى كوتەرىلۋى
- تەرى قۇرعاۋى، بەتتىڭ قىزارۋى
- ەسىنىڭ شاتاسۋى، ءتىپتى ەسىنەن تانۋ.
مۇنداي بەلگىلەر بايقالعان جاعدايدا دەرەۋ كومەك كورسەتۋ كەرەك.
دارىگەردىڭ كەڭەسى بويىنشا بۇنىڭ الدىن الۋ ءۇشىن:
- كۇننەن قورعايتىن كرەمدى كوشەگە شىعاردان 15-20 مينۋت بۇرىن جاعىپ، ءار ەكى ساعات سايىن جانە سۋعا تۇسكەننەن كەيىن جاڭارتىپ وتىرۋ كەرەك.
- ەرەكشە كوڭىل بولەتىن جەر، اسىرەسە جاعاجايدا: بەت، مويىن، قۇلاق، قول، يىق، اشىق كەۋدە تۇسى جانە اياق
- ەرەسەكتەرگە SPF 30-دان تومەن ەمەس، ال بالالارعا SPF 50 جانە ودان جوعارى كرەم قولدانۋ ۇسىنىلادى.
تاماقتانۋ مەن سۋ ءىشۋ ءتارتىبى:
- الكوگول، ءتاتتى گازدى سۋسىن، ەنەرگەتيك پەن قويۋ كوفە ىشپەگەن ءجون - ولار اعزانى سۋسىزداندىرادى.
- اۋىر جانە مايلى تاعامنان باس تارتىپ، جەڭىل ءارى سۋ مولشەرى كوپ تاعامدى تۇتىنعان دۇرىس.
- ءار 15-30 مينۋت سايىن از-ازدان سالقىن سۋ ءىشىڭىز.
- قانتسىز مورس، كومپوت، ليمون مەن جالبىز قوسىلعان سۋ دا پايدالى.
- اس قۇرامىنا شىرىندى جەمىس پەن كوكونىس - قاربىز، قاۋىن، قيار قوسقان ءجون.
ساقتىق شارالارى:
- اشىق ءتۇستى، كەڭ، تابيعي ماتادان تىگىلگەن كيىم كيىڭىز.
- مىندەتتى تۇردە باس كيىم كيىڭىز.
- ساعات 11:00-دەن 16:00-گە دەيىن كۇن استىندا جۇرمەگەن دۇرىس.
- كولەڭكەدە نەمەسە سالقىن جەردە بولعان ابزال.
- ءۇيدى ءجيى جەلدەتىپ، جەلدەتكىش پەن كونديسيونەر قولدانىڭىز.
- سىرتتا شامادان تىس فيزيكالىق بەلسەندىلىكتەن اۋلاق بولىڭىز.
- بالا مەن جانۋارلاردى جابىق كولىكتە قالدىرماڭىز - بۇل وتە ءقاۋىپتى، ءتىپتى ولىمگە اكەلۋى مۇمكىن.
ەگەر قىزىپ كەتۋ ورىن السا:
- كولەڭكەگە نەمەسە سالقىن جەرگە بارىڭىز.
- ارتىق كيىمدى شەشىڭىز.
- بەتىڭىزدى، موينىڭىزدى، بىلەگىڭىزدى سۋىق سۋمەن سۋلاڭىز.
- باس پەن قولتىققا سالقىن كومپرەسس قويىڭىز.
- جاتىپ، اياعىڭىزدى ءسال كوتەرىڭىز.
- سۋىق سۋدى از-ازدان ءىشىڭىز.
- ەگەر ادام ەسىنەن تانىپ قالسا - 103 نومىرىنە حابارلاسىپ، جەدەل جاردەم شاقىرۋ قاجەت.
«ىستىق ءوتۋ تەز داميدى جانە اۋىر زارداپقا - ءتىپتى كوماعا اكەلۋى مۇمكىن. اسىرەسە، بالالار مەن قارتتارعا ەرەكشە نازار اۋدارۋ قاجەت. جازدا اۋرۋدىڭ الدىن الۋ - ونى ەمدەۋدەن الدەقايدا ءتيىمدى»، - دەيدى دارىگەر قارلىعاش قالييەۆا.