الماتىدا «ءاپالى-سىڭلىلى ناقىپبەكوۆالار: ەركىندىككە جول» اتتى دەرەكتى فيلم كورەرمەنگە جول تارتتى.
تۋىندى كلاسسيكالىق ونەردىڭ حاس شەبەرلەرى اتانعان قازاق قىزدارىنىڭ ءومىرى مەن شىعارماشىلىعىن باياندايدى، دەپ حابارلايدى Almaty-akshamy.kz 24.kz-كە سىلتەمە جاساپ.
ەسكە سالا كەتەيىك، بۇعان دەيىن فيلم لوندوندا تانىستىرىلعان. ەندى قازاقستاندىق كورەرمەنگە جول تارتتى. العاشقى كورسەتىلىمى Esentai IMAX Kinopark 11 كينوتەاترىندا كورسەتىلدى. ءاپالى-سىڭلىلى ناقىپبەكوۆالارعا ارنالعان دەرەكتى ءفيلمىنىڭ تۇساۋكەسەرىنە ولاردىڭ ءوزى قاتىسا المادى. دەگەنمەن، ايتۋلى شاراعا وسىنداعى ونەرسۇيەر قاۋىم جينالدى.
ناقىپبەكوۆالار – الەمدەگى ەڭ ۇزدىك فورتەپيانولىق تريولاردىڭ ءبىرى. ەلۆيرا سكريپكادا، ەلەونورا فورتەپيانودا، الفيا ۆيولونچەلدە وينايدى. باتىستا «بەكوۆالار تريوسى» دەگەن اتپەن كەڭىنەن تانىمال. ءفيلمدى ءتۇسىرۋ تۋرالى باستامانى فرانسياداعى قازاق قاۋىمداستىعى كوتەرگەن.
«بۇلار سوۆەت وكىمەتى تۇسىندا وسى ەلدەن كەتىپ قالعان. ولاردى ديسسيدەنت دەپ اتاعان. سولاردىڭ تاريحى تۋرالى. ديسسيدەنت دەگەن كلەيمو الدى. ءبىراق ديسسيدەنت دەگەن كلەيموسىنا قاراماي، بۇلار مىنە 30 جىل بويى دۇنيەجۇزىنىڭ ساحناسىندا ءبىزدىڭ ەلدى قۇرمەتتەپ كورسەتىپ جاتىر»، - دەيدى بار پروديۋسەر بەرلين يريشيەۆ.
لوندونعا العاش بولىپ، الفيا بارعان. ول 1981 جىلى گاسترولدىك ساپاردا بولىپ، قايتپاي قالادى. كەيىن وعان ەكى اپكەسى بارىپ قوسىلادى. ءسويتىپ، قازاق قىزدارى كلاسسيكالىك مۋزىكانىڭ مايتالماندارىنا اينالادى.
«ولار سول كەزدىڭ وزىندە وداق كولەمىندە كەڭىنەن تانىمال بولدى. اتاق، ابىرويدان كەندە بولمادى. ءبىراق مۋزىكانت قىزدار شىعارماشىلىق ەركىندىكتى اڭسادى. شەتەلدىڭ مادەنيەتىمەن، ونەرىمەن جاقىنىراق تانىسقىسى كەلدى. ال بۇل جاقتا ونداي مۇمكىندىك بولماعانى بەلگىلى. الفيا شەتەلدە قالىپ قويعان سوڭ، ولاردىڭ وتباسى سول تۇستاعى امىرشىل-اكىمشىل جۇيەنىڭ زاردابىن باستان كەشىردى»، - دەيدى سەناريي اۆتورى نۇرگۇل تۇسىپبەكوۆا.
دەرەكتى فيلم بىرنەشە ەلدە ءتۇسىرىلدى. ءقازىر الفيا مەن ەلەونورا ۇلىبريتانيادا، ەلۆيرا يتاليادا تۇرادى. ولاردىڭ ونەرىنە قاي ەلدە بولماسىن سۇرانىس جوعارى.