2024 جىلعى 18 ساۋىردە قازاقستاننىڭ ازەربايجانداعى ەلشىلىگىندە اوسشك قىزمەتىنىڭ نەگىزگى باعىتتارى جانە ازەربايجاننىڭ وسى ۇيىمعا الداعى ءتوراعالىعى تۋرالى جەتەكشى ازەربايجان ب ا ق وكىلدەرى ءۇشىن بريفينگ ءوتتى.
قازاقستاننىڭ ازەربايجانداعى ەلشىسى ءالىم بايەل قازاقستان مەن ازەربايجان جەمىستى ەكىجاقتى ىنتىماقتاستىقپەن قاتار اوسشك سياقتى كوپجاقتى الاڭداردا دا تابىستى ءوزارا ءىس-قيمىل جۇزەگە اسىرۋدا ەكەنىن اتاپ ءوتتى. ديپلومات 2020-2024 جىلدارداعى ۇيىمنىڭ ءتوراعاسى رەتىندە قازاقستان تاراپىنىڭ ءتوراعالىقتىڭ جاقىن ارادا باۋىرلاس ازەربايجانعا وتەتىنىنە دەگەن ەرەكشە قاناعاتتانۋشىلىعىنا نازار اۋداردى.
اوسشك باس حاتشىسى قايرات سارىباي ءوز سوزىندە ونىڭ باكۋعا ساپارىنىڭ ماقساتى ازەربايجاننىڭ 2024-2026 جىلدارعا جوسپارلانعان اوسشك ءتوراعالىعى بويىنشا كونسۋلتاسيالار وتكىزۋ ەكەندىگىن حابارلادى. ساپار اياسىندا ول ازەربايجان پرەزيدەنتى يلحام الييەۆپەن، سىرتقى ىستەر ءمينيسترى دجەيحۋن بايراموۆپەن كەلىسسوزدەر جۇرگىزىپ، ازەربايجاننىڭ باسقا دا ءبىرقاتار لاۋازىمدى تۇلعالارىمەن كەزدەستى. پرەزيدەنت ي.الييەۆ ازەربايجاننىڭ قوسىلماۋ قوزعالىسى ءتوراعالىعىنداعى تابىستى تاجىريبەسىن اوسشك قىزمەتىن ۇيلەستىرۋدە پايدالاناتىنىن اتاپ وتكەن.
باسپا ءسوز كونفەرەنسياسى بارىسىندا ق.سارىباي اوسشك قىزمەتىنىڭ نەگىزگى ولشەمدەرى مادەني-گۋمانيتارلىق، ساۋدا-ەكونوميكالىق، ەكولوگيالىق، اسكەري-ساياسي، ازاماتتىق-قۇقىقتىق سالالار ەكەندىگىن ايتتى. باس حاتشى اوسشك شەڭبەرىندە قازاقستاننىڭ باسىم مىندەتتەرىن ىسكە اسىرۋعا باعىتتالعان سوڭعى قادامدار تۋرالى اقپارات بەردى. ولاردىڭ ءبىرى – اوسشك اياسىندا تۇراقتى ءوزارا بايلانىس جونىندەگى كەڭەس قۇرۋ تۋرالى باستاما. وسى تۇرعىدا ول تۇراقتى لوگيستيكالىق ينفراقۇرىلىم مەن وڭىرلىك كولىك باعىتتارىن قۇرۋ، جاسىل كولىك تەحنولوگيالارىن دامىتۋ، كليماتتىڭ وزگەرۋىنە قارسى كۇرەس، سونداي-اق كاسپيي تەڭىزىنىڭ ەكولوگيالىق پروبلەمالارىن شەشۋ ماسەلەلەرىندە ىنتىماقتاستىقتىڭ ماڭىزدىلىعىن اتاپ ءوتتى.
ازەربايجاننىڭ ۇيىمعا الداعى ءتوراعالىعىنا ەرەكشە نازار اۋدارا وتىرىپ، ق.سارىباي ازەربايجاننىڭ جانجالدان كەيىنگى قالپىنا كەلتىرۋ ماسەلەسىندەگى تاجىريبەسىنە ەرەكشە نازار اۋداردى. «اوسشك ءتىپتى بىر-بىرىمەن ديپلوماتيالىق قارىم-قاتىناسى جوق ەلدەردى بىرىكتىرىپ، وسىلايشا جاقسى ديالوگ الاڭى بولىپ وتىر. ازەربايجاننىڭ الداعى ءتوراعالىعى اوسشك دامۋىنا ءوز ۇلەسىن قوسادى دەپ سەنەمىن»، – دەپ ايتتى باس حاتشى.