الماتىداعى تۇران ۋنيۆەرسيتەتىندە كسرو حالىق ءارتيسى، ق ر ەڭبەك ەرى، تەاتر جانە كينونىڭ ۇلى تۇلعاسى ءاسانالى اشىموۆپەن تاعىلىمدى كەزدەسۋ ءوتتى.
بۇل باسقوسۋ قازاق ونەرىنىڭ ابىزى ءاسانالى ءاشىم ۇلىنىڭ «اكتەرمىن مەن، مىڭ ءولىپ، مىڭ تىرىلگەن» اتتى كىتابىنىڭ تۇساۋكەسەرىنە ارنالدى.
جيىنعا قازاقستان جازۋشىلار وداعى باسقارماسىنىڭ ءتوراعاسى مەرەكە قۇلكەنوۆ، تۇران ۋنيۆەرسيتەتىنىڭ رەكتورى، پروفەسسور راحمان الشانوۆ، ق ر ەڭبەك سىڭىرگەن قايراتكەرى، اقىن اقۇشتاپ باقتىگەرەيەۆا، الماتى قالاسى مادەنيەت باسقارماسىنىڭ ءبولىم باسشىسى ارمان قالىبەكوۆ، ق ر بعم عك م.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى كەنجەحان ماتىجانوۆ، «Alatau Aqparat» مەدياحولدينگىنىڭ باس ديرەكتورى ەرجان قالىمباي ۇلى، ساياساتتانۋشى ءامىرجان قوسانوۆ، الماتى قالاسى اكىمىنىڭ كەڭەسشىسى، ادەبيەت زەرتتەۋشى عالىم، فيلولوگيا عىلىمىنىڭ كانديداتى ماماي احەتوۆ، تەاتر جانە كينو اكتەرى ازامات ساتىبالدى جانە زيالى قاۋىم وكىلدەرى، قوعام بەلسەندىلەرى مەن ستۋدەنتتەر قاتىستى.
كەشتىڭ مودەراتورى – جۋرناليستيكا سالاسىنىڭ مايتالمانى قالي سارسەنباي بولدى.
كەزدەسۋ ەمەن-جارقىن سىرلاسۋعا، ەستەلىكتەر مەن تاعىلىمدى اڭگىمەگە، ستۋدەنتتەردىڭ كوكەيدەگى سۇراقتارىنا جاۋاپ بەرۋگە ۇلاستى.
اقىن اقۇشتاپ باقتىگەرەيەۆا:
– ءاسانالى اعامىز قازاقتىڭ ءبىرتۋار دارا تۇلعاسى. بۇل كىسى نەبىر تاعدىرلى كەزدەردى باستان وتكەردى. ءوزىنىڭ اقىلى، قايراتى، جىگەرى ارقاسىندا بۇگىنگى بيىگىنە جەتىپ، ەلدىڭ ابىز اقساقالىنا اينالىپ وتىر. مۇنداي الىپ تۇلعامەن جۇزدەسىپ، تىلدەسۋ – زور باقىت. جاستار ونەگە الىپ، ۇلگى ەتەتىن دارا تۇلعا دەپ بىلەمىن، – دەدى.
قازاقستان جازۋشىلار وداعىنىڭ ءتوراعاسى مەرەكە قۇلكەنوۆ تە اعامىز تۋرالى جۇرەكجاردى ەستەلىكتەرىن ءبولىستى:
– ءاسانالى ءاشىموۆ اعامىزدىڭ ونەرىن ەل جاقسى بىلەدى. حالىققا «قىز جىبەك»، «اتاماننىڭ اقىرى» اتتى تاريحي-كوركەم فيلمدەرىمەن تانىلدى. قازاق كسر مەن كسرو حالىق ءارتىسى اتاعىن الۋ وڭاي شارۋا ەمەس. ونىڭ كىتابىندا جازىلعان اڭگىمەلەردىڭ كەيبىرىن بۇرىن دا ەستىپ جۇردىك. بۇل ەڭبەگى – وقىرمانعا ۇلگى ءھام ونەگە، – دەدى ول.
كەش بارىسىندا ءاسانالى ءاشىم ۇلى ءوزى دە ءسوز سويلەپ، كىتابىنىڭ ءمان-ماڭىزىنا توقتالدى. ستۋدەنتتەردىڭ سۇراقتارىنا جاۋاپ بەرىپ، ۇزدىك سۇراق قويعان جاستارعا قولتاڭباسىن قويىپ، كىتابىن سىيعا تارتتى.
جيىن سوڭىندا قازاق ونەرىنىڭ ابىزى جاستارعا اق باتاسىن بەرىپ، العىسىن جەتكىزدى.