سىبايلاس جەمقورلىققا قارسى قىزمەت تۋريزم جانە سپورت مينيسترلىگىمەن بىرلەسىپ سپورتتى قارجىلاندىرۋ سالاسىنداعى جەمقورلىق تاۋەكەلدەرىنە سىرتقى تالداۋ جۇرگىزدى، دەپ حابارلايدى aqshamnews.kz.
ناتيجەلەر وتاندىق سپورتتىڭ دامۋىنا جانە الەمدىك سپورت ارەناسىندا جوعارى كورسەتكىشتەرگە قول جەتكىزۋگە كەدەرگى كەلتىرەتىن جۇيەلى جەمقورلىق تاۋەكەلدەرىنىڭ بار ەكەندىگىن ايعاقتايدى.
تەك سوڭعى 6 جىلدا سپورت سالاسىن قارجىلاندىرۋ شامامەن 1،4 تريلليون تەڭگەنى قۇراعان. اتاپ ايتقاندا 2018 جىلى – 165 ملرد تەڭگە، 2019 جىلى – 204 ملرد تەڭگە، 2020 جىلى – 177 ملرد تەڭگە، 2021 جىلى – 223 ملرد تەڭگە، 2022 جىلى – 296 ملرد تەڭگە، 2023 جىلى – 340 ملرد تەڭگە بولىنگەن.
بيۋدجەتتەن اعىمداعى جانە الداعى ەكى جىلعا تاعى 1،3 تريلليون تەڭگە ءبولۋ جوسپارلانعان.
سالىستىرمالى تۇردە الاتىن بولساق، قازاقستاندىق سپورتقا كانادا، نورۆەگيا، نيدەرلاندى سياقتى ورتالىق ازيا جانە الىس شەت ەلدەردىڭ بيۋدجەتتەرىنەن بىرنەشە ەسە ارتىق.
سونىمەن قاتار، قازاقستان وليمپيادا ويىندارى بويىنشا مەدالدىق ەسەپتە تومەنگى ورىنداردا. ارسىنا بارماي-اق، كەشەگى پاريج وليمپياداسىنىڭ ناتيجەسى ايتساق تا بولادى.
جوعارى ناتيجەگە قول جەتكىزۋگە سالا ىشىندەگى جەمقورلىق، قارجىنى ءتيىمدى پايدالا الماۋ سەكىلدى ارەكەتتەر كەدەرگى كەلتىرۋدە.
باستى كەمشىلىك - وتاندىق سپورتتى دامىتۋدىڭ قولدانىستاعى ساياساتى وتاندىق سپورتشىلاردى ءتيىمدى دايارلاۋعا باعىتتالماعان.
شەتەلدىك ويىنشىلاردى ناتۋراليزاسيالاۋ ارقىلى قول جەتكىزىلگەن قىسقا مەرزىمدى جەتىستىكتەرگە نازار اۋدارىلادى، ال جەكە سپورتتىق كادرلاردى دامىتۋ بويىنشا جۇيەلى جۇمىس ءوز دەڭگەيىندە جۇرگىزىلمەگەن.
قازاقستان وليمپيادالىق سپورت تۇرلەرىنە 126 شەتەلدىكتى ساتىپ العان. ولاردىڭ ءارقايسىسى كەيىننەن ءوز ەلىنە قايتقان.
كوبىنەسە ءوز تالانتتارىن تاربيەلەۋدىڭ ورنىنا اقشا باسقا ەلدەردىڭ ويىنشىلارىنا جۇمسالادى. بۇل سپورتتى قارجىلاندىرۋداعى ايقىن تەڭگەرىمسىزدىكپەن راستالادى.
ماسەلەن، قازاقستاننىڭ بۇقارالىق سپورتقا جۇمساعان شىعىستارى جوعارى جەتىستىكتەر سپورتىنا قاراعاندا 9 ەسە از (35 ملرد تەڭگەگە قارسى 340 ملرد تەڭگە).
سپورتتا نەعۇرلىم تابىستى شەت ەلدەردە جوعارى جەتىستىكتەر سپورتىنىڭ نەگىزى بولىپ تابىلاتىن بۇقارالىق سپورتتى قولداۋعا باسىمدىق بەرىلەدى.
نيدەرلاندىمەن سالىستىرعاندا قازاقستان جوعارى جەتىستىكتەر سپورتىنا 3 ەسە كوپ، ال بۇقارالىق سپورتقا 7 ەسە از جۇمسايدى.
نەگىزىنەن فورمالدىلىققا باسىمدىق بەرىلىپ كەلگەن. قازاقستان رەسپۋبليكاسىنىڭ دەنە شىنىقتىرۋ مەن سپورتتى دامىتۋدىڭ 2023 – 2029 جىلدارعا ارنالعان تۇجىرىمداماسىنا ەنگىزىلگەن بۇقارالىق سپورت تۇرلەرىن دامىتۋ كورسەتكىشتەرى فورمالدى بولىپ قالا بەرگەن.
مىسالى، اكىمدىكتەر جىل سايىن 20 مىڭنان استام سپورتتىق-بۇقارالىق ءىس-شارا، كۇنىنە ورتا ەسەپپەن 3 ءىس-شارا وتكىزۋى ءتيىس.
سپورتتىق عيماراتتار مەن نىسانداردا، سونداي-اق اشىق جەرلەردە وتكىزىلەتىن ءىس-شارالار وسى ءىس-شارالاردا ەكى ءجۇز جانە ودان دا كوپ كورەرمەننىڭ ءبىر مەزگىلدە بولۋىن بولجايتىنىن ەسكەرە وتىرىپ، كورسەتكىش انىق كوتەرىلگەن («دەنە شىنىقتىرۋ تۋرالى» زاڭنىڭ 1-بابىنىڭ 40-1-تارماعى).
كەدەرگىلەردىڭ نەگىزگىسى بۇلىڭعىرلىق. تۇسىنىكتى بولۋ ءۇشىن ايتساق، جوعارى جەتىستىكتەر سپورتىندا باسىم سپورت تۇرلەرىنىڭ بولماۋىنا بايلانىستى تانىمال ەمەس جانە ناتيجەسىز سپورت تۇرلەرى قارجىلاندىرىلادى. 2023 جىلى سپورتتىڭ 31 تۇرىنەن بىردە-بىر مەدال جوق. 2024 جىلى قارجىلاندىرىلاتىن باعىتتاردىڭ سانى 141 تۇرگە دەيىن وسكەن.
ماسەلەن، جازعى وليمپيادالىق سپورت تۇرلەرى بويىنشا قازاقستان 44 ءتۇردى، قىسقى سپورت تۇرلەرى بويىنشا – 13 ءتۇردى دامىتادى. جوعارى جەتىستىكتەر سپورتىنىڭ قارجىلاندىرىلاتىن باعىتتارىنىڭ شامامەن 60%-ى وليمپيادالىق ەمەس باعىتتارعا جاتادى - 84 (141-دەن). جىل سايىن بۇل تۇرلەردى دامىتۋعا – 18 ملرد تەڭگە جۇمسالادى (2023 جىلى وليمپيادالىق تۇرلەرگە – 296 ملرد تەڭگە، وليمپيادالىق ەمەس تۇرلەرگە - 18، وزگە شىعىستارعا - 11 ملرد تەڭگە).
شەتەلدە سپورتتىڭ «نۇكتەلىك» باعىتتارىنا باسىمدىق بەرىلەدى (ۇلىبريتانيادا جازعى وليمپيادا ويىندارىنىڭ 19 ءتۇرى، گەرمانيادا – 18، اۆستراليادا – 12).