انتاليانى قار باسىپ قالدى

انتاليا 29 جىلدان بەرى العاش رەت قار استىندا قالدى

تۇركيا قالالارى – انتالياعا 29، مارماريسكە 13 جىلدان كەيىن العاش رەت قار ءتۇسىپ، قولايسىز اۋا رايى تۇرعىندار مەن جولاۋشىلاردى ابىگەرگە سالۋدا، دەپ حابارلايدى Almaty-akshamy.kz 

اسىرەسە، ىستامبۇلدا جاعداي ۋشىققان.

قالىڭ جاۋعان قار سالدارىنان 24 قاڭتاردان بەرى جۇرگىزۋشىلەر جولدا تۇنەپ، مەگاپوليسكە بەت العان ۇشاقتاردىڭ دەنى كورشى پروۆينسيالارعا قونعان.

سالدارىنان اق تەڭىز جاعالاۋىن بىر-بىرىمەن بايلانىستىراتىن جول جابىلىپ، قوزعالىس تۇگەلدەي توقتاپ قالعان. ودان بولەك، ىستامبۇل تۇرعىندارى كولىكتەرىن قار قۇرساۋىنان شىعارا الماي الەك بولعان.

وسىعان بايلانىستى قالا گۋبەرناتورلىعى جەكە كولىكتەردىڭ تىسقا شىعۋىنا شەكتەۋ قويعان. مەگاپوليستە قاۋىپسىزدىك، دەنساۋلىق جانە تاسىمال قىزمەتكەرلەرىنەن باسقا بارلىق جۇمىسشىلارعا دەمالىس بەرىلگەن.

«قاردىڭ قالىڭدىعى 80 سم جەتكەن ايماقتار بار. كەيبىر اۋدانداردا 1 مەتردەن استى. ازاماتتارىمىزدان ەسكەرتۋلەرىمىزدى قاتاڭ ساقتاۋلارىن سۇرايمىز»، – دەيدى ىستامبۇل مەرى ەكرەم يماموعلۇ.

دەسە دە، ونداعان جىلدان بەرى قالىڭ قاردى كورمەگەن جۇرت سىرتقا شىعىپ، قار اتىسىپ ويناپ ءجۇر.