پرەزيدەنت 2021 جىلى باستاماشىلىق ەتكەن «اڭساعان ءسابي» باعدارلاماسى ناتيجەسىندە 8 مىڭ ايەل جۇكتى بولىپ، 5000-نان استام ءسابي دۇنيەگە كەلدى، دەپ حابارلايدى اlmaty-akshamy.kz دەنساۋلىق ساقتاۋ مينيسترلىگىنە سىلتەمە جاساپ.
بۇل تۋرالى دەنساۋلىق ساقتاۋ ۆيسە-مينيسترى ۆياچەسلاۆ دۋدنيك «بەدەۋلىكتى ەمدەۋدىڭ زاماناۋي تاسىلدەرى. قرت: ءقازىر جانە بولاشاق» اتتى قازاقستان رەپرودۋكتيۆتىك مەديسينا قاۋىمداستىعىنىڭ XV حالىقارالىق كونگرەسىندە ايتتى.
بالاسىز وتباسىلىق ەرلى-زايىپتىلارعا انا مەن اكە بولۋ باقىتىنا يە بولۋعا كومەكتەسۋگە ارنالعان باعدارلاما باستالعالى الەۋمەتتىك مەديسينالىق ساقتاندىرۋ جۇيەسى ەسەبىنەن ەكۇ-عا كۆوتالار سانى 7 ەسە ۇلعايتىلدى جانە 20 مىڭنان استام ايەلدى ەكۇ راسىمدەرىمەن قامتىدى.
«ءبىز مىندەتتى الەۋمەتتىك مەديسينالىق ساقتاندىرۋ قورىنىڭ قاراجاتىنان جىل سايىن 7000 باعدارلامانى ورىنداۋدى جالعاستىرامىز. 21 000 باعدارلامانى وتكىزۋ ارقىلى ءبىز ودان دا كوپ بالالاردىڭ دۇنيەگە كەلۋىنە ۇمىتتەنە الامىز دەۋگە بولادى. بۇل وتە جوعارى كورسەتكىش، مىڭداعان بەدەۋ وتباسىلار وسى باعدارلاماعا قاتىسىپ، اتا-انا بولۋعا مۇمكىندىك الاتىنىن بىلدىرەدى»، - دەپ اتاپ ءوتتى فورۋمدا ق ر دسم باس شتاتتان تىس رەپرودۋكتولوگى، قازاقستاننىڭ رەپرودۋكتيۆتىك مەديسينا قاۋىمداستىعىنىڭ پرەزيدەنتى ۆياچەسلاۆ لوكشين.
سونىمەن بىرگە، باس شتاتتان تىس ونكولوگ، قازورعزي باسشىسى ديليارا قايداروۆا ونكولوگيالىق اۋرۋلارى بار ايەلدەر ءۇشىن بالا تۋۋدى ساقتاۋ باعدارلاماسىنىڭ ءرولىن اتاپ ءوتتى. بۇل ەمدەۋ باستالعانعا دەيىن جىنىس جاسۋشالارى مەن ەمبريونداردى كريوكونسەرۆاسيالاۋ ءۇشىن ەكۇ كلينيكالارىمەن ىنتىماقتاستىقتى قامتيدى.
سونداي-اق د.قايداروۆا جاتىر موينى وبىرىن ۆاكسينالاۋ جانە جاتىر موينى وبىرىنىڭ ءتيىمدى الدىن الۋ ءۇشىن اپۆ سكرينينگىنىڭ پەرسپەكتيۆالارىن قوزعادى.
الەمدە بەدەۋلىكتىڭ ءارتۇرلى تۇرلەرىن ەمدەۋدىڭ ۇلكەن تاجىريبەسى بار. قازىرگى ادىستەردىڭ كوپشىلىگى قازاقستاندا دا ءساتتى ەنگىزىلدى. قازىرگى دەڭگەيدە ەندوۆيدەوحيرۋرگيا، دياگنوستيكا مەن ەمدەۋدىڭ گورمونالدى ادىستەرى دامۋدا، قاۋىپسىزدىك پەن تيىمدىلىك بەيىنى جوعارى جاڭا دارىلىك پرەپاراتتار تىركەلۋدە. اندرولوگيا، مەديسينالىق گەنەتيكا، ەمبريولوگيا جانە مولەكۋلالىق بيولوگيا قارقىندى دامىپ كەلەدى.
قازاقستاندىق رەپرودۋكتيۆتىك مەديسينا قاۋىمداستىعى 2008 جىلعى 2 قازاندا قۇرىلدى جانە بەدەۋلىكتى ەمدەۋمەن اينالىساتىن اكۋشەر-گينەكولوگتار، اندرولوگتار، ەمبريولوگتار، گەنەتيكتەر، پسيحولوگتار ماماندارىن بىرىكتىرەدى.
كونگرەسس جۇمىسىنىڭ قورىتىندىسى بويىنشا قارار قابىلداندى، وندا الداعى جىلعا ارنالعان جاڭا مىندەتتەر مەن ماقساتتار ايقىندالدى.