قازاقستانداعى بەدەۋلىك نەكە بۇكىل الەمدەگى سياقتى، مەديسينالىق-الەۋمەتتىك پروبلەما بولىپ قالا بەرەدى، ونىڭ شەشىمى ەلدەگى دەموگرافيالىق احۋالدى جاقسارتۋعا جانە بالالى بولۋ مۇمكىندىگىنەن ايىرىلعان پاسيەنتتەردىڭ ءومىر ءسۇرۋ ساپاسىن ارتتىرۋعا ىقپال ەتەتىن بولادى.
قازاقستاندا بەدەۋلىكتەن زارداپ شەگەتىن پاسيەنتتەردىڭ مىندەتتى مەديسينالىق ساقتاندىرۋ جۇيەسىندە ەكستراكورپورالدىق ۇرىقتاندىرۋ ارقىلى مەديسينالىق كومەك الۋ قۇقىعى زاڭنامالىق تۇردە بەكىتىلگەن، دەپ حابارلايدى Almaty-akshamy.kz دەنساۋلىق ساقتاۋ مينيسترلىگىنىڭ باسپا ءسوز ورتالىعىنا سىلتەمە جاساپ.
مەملەكەت باسشىسى ءوزىنىڭ حالىققا جولداۋىندا ۇكىمەتكە 2021 جىلدان باستاپ ەكۇ-عا كۆوتالاردى 7 ەسەگە ارتتىرا وتىرىپ، «اڭساعان ءسابي» ارنايى باعدارلاماسىن ىسكە قوسۋدى تاپسىردى.
پرەزيدەنتتىڭ تاپسىرماسىن ساپالى ىسكە اسىرۋ ماقساتىندا مينيسترلىك ەلىمىزدىڭ جەتەكشى بەيىندى ماماندارى قاتارىنان جۇمىس توبىن قۇردى، «اڭساعان ءسابي» ارنايى باعدارلاماسىن بەكىتتى، ءتيىستى نقا ازىرلەدى.
جالپى العاندا، فەرتيلدىك جاستاعى ايەلدەر مەن ەرلەردىڭ سانىن ەسكەرە وتىرىپ، وڭىرلەر بولىنىسىندە ەكۇ جۇرگىزۋگە جىل سايىن 7 000 كۆوتا ءبولۋ جۇرگىزىلەدى.
الەۋمەتتىك مەديسينالىق ساقتاندىرۋ قورى (ءالمسق) مەديسينالىق ۇيىمدار بولىنىسىندە ەكۇ قىزمەتتەرىنىڭ كولەمىن ورنالاستىردى. ءمامس شەڭبەرىندە مەملەكەتتىك قىزمەتتى 19 كلينيكا (ونىڭ ىشىندە 3 مەملەكەتتىك، 16 جەكە) ۇسىنادى.
سونداي-اق، مينيسترلىك اي سايىن ورىندالعان باعدارلامالاردىڭ تيىمدىلىگىنە مونيتورينگ جۇرگىزەدى.
«اڭساعان ءسابي» باعدارلاماسىن ىسكە اسىرۋ باستالعاننان بەرى 2022-2023 جىلدارى ەكۇ 19 000-نان استام ايەلگە جۇرگىزىلدى، 7 000-نان استام ايەل جۇكتى بولدى، 3 800 وتباسىندا 4 500-دەن استام نارەستە دۇنيەگە كەلدى، 2 500 جۇكتى ايەل بالا تۋۋدى كۇتۋدە.
اعىمداعى جىلى 2023 جىلعا وڭىرلەر بولىنىسىندە بارلىق 7 000 كۆوتا ءبولىندى.
سونىمەن قاتار، «اڭساعان ءسابي» باعدارلاماسىنىڭ ءىس-شارالارى «دەنى ساۋ ۇلت» ءاربىر ازامات ءۇشىن ساپالى جانە قولجەتىمدى دەنساۋلىق ساقتاۋ» ۇلتتىق جوباسىندا، سونداي-اق قازاقستان رەسپۋبليكاسىندا انا مەن بالا دەنساۋلىعىن ساقتاۋ جونىندەگى تۇجىرىمدامانىڭ جوباسىندا كوزدەلگەنىن حابارلايمىز.
مۇنىڭ ءبارى مىندەتتى مەديسينالىق ساقتاندىرۋ جۇيەسىندە جۇيەسىندە 2030 جىلعا دەيىن جىل سايىن دايىندالعان ەكۇ پاسيەنتتەرىنىڭ بارىنشا كوپ سانىن قامتاماسىز ەتۋگە مۇمكىندىك بەرەدى.
قازاقستان قوسالقى رەپرودۋكتيۆتى تەحنولوگيالاردى قولدانا وتىرىپ، بەدەۋلىكتى ەمدەۋدە الدىڭعى قاتاردا، ەلدە گينەكولوگيا، اندرولوگيا، گەنەتيكا، ەمبريولوگيا، پەريناتولوگياداعى سوڭعى تەحنولوگيالار قولدانىلادى.
الايدا، بەدەۋلىك - بۇل كوبىنەسە الدىن الۋعا بولاتىن جانە وسىلايشا قىمبات ەمدەۋگە دەگەن قاجەتتىلىكتى تومەندەتەتىن اۋرۋ بولىپ تابىلادى.
سوندىقتان مينيسترلىكتىڭ ءبىرىنشى كەزەكتەگى مىندەتتەرى جاسوسپىرىمدەر مەن جاستارعا پروفيلاكتيكا جانە جىنىستىق ءبىلىم بەرۋ باعدارلاماسىن جەتىلدىرۋ بولىپ تابىلادى. بۇل جىنىستىق جولمەن بەرىلەتىن ينفەكسيانىڭ الدىن الۋ جانە ەمدەۋ، ءقاۋىپتى ابورتتاردىڭ الدىن الۋ، كونتراسەپسيامەن قامتۋ جانە سالاماتتى ءومىر سالتىن ناسيحاتتاۋ بولىپ تابىلادى.