قازاقستاندا ونلاين-پلاتفورمالار مەن بۇقارالىق اقپارات قۇرالدارىن رەتتەۋگە وزگەرىس ەنگىزەتىن زاڭ جوباسى ازىرلەنۋدە، دەپ حابارلايدى aqshamnews.kz
«اشىق نقا» پورتالىندا جاريالانعان قۇجات 29 جەلتوقسانعا دەيىن قوعامدىق تالقىلاۋعا ۇسىنىلعان.
مادەنيەت جانە اقپارات مينيسترلىگى زاڭنامانى جاڭارتۋدى جانە زاڭعا قايشى كونتەنتكە قارسى شارالاردى كۇشەيتۋدى ۇسىنعان. ماسەلەن، تانىمال ءانونيمدى Telegram-ارنالاردىڭ يەلەرىن ءوز جەكە باسىن جاريا ەتۋگە مىندەتتەۋ قاراستىرىلعان.
«جوبا ونلاين-پلاتفورمالاردا بەس مىڭنان استام جازىلۋشىسى بار ءانونيمدى پايدالانۋشىلاردىڭ ءتىزىمىن ەنگىزۋدى كوزدەيدى. مۇنداي اككاۋنتتاردىڭ يەلەرى ۋاكىلەتتى ورگانعا وزدەرىن سايكەستەندىرۋگە مۇمكىندىك بەرەتىن دەرەكتەردى ۇسىنۋعا مىندەتتى. دەرەكتەر تىزبەسىن مينيسترلىك ايقىندايدى»، – دەلىنگەن جوبا ماتىنىندە.
قۇجاتتا مەملەكەتتىك ورگانداردىڭ رەسمي جاۋاپتارىن ارنايى بەلگىلەۋ ءتارتىبى، اۋديوۆيزۋالدى پلاتفورمالاردىڭ جاڭا جۇمىس ەرەجەلەرى، وپەراتورلاردى ليسەنزيالاۋ، كونتەنت ورنالاستىرۋ تالاپتارى جانە رەتتەۋشىنىڭ وكىلەتتىگىن كەڭەيتۋ ءتارىزدى نورمالار قامتىلعان.
جوباعا ەنگىزىلگەن جەكە نورما 16 جاسقا تولماعان بالالاردىڭ الەۋمەتتىك جەلىلەردە تىركەلۋىنە تىيىم سالۋدى ۇسىنادى.
سونىمەن بىرگە زاڭ جوباسىندا اكىمشىلىك جاۋاپكەرشىلىككە قاتىستى ەرەجەلەر بار. زاڭسىز فوتو-ۆيدەو تاراتقان ءۇشىن 200 اەك-كە دەيىن ايىپپۇل سالۋ قاراستىرىلعان. ونلاين-پلاتفورمالاردا نەمەسە بۇقارالىق اقپارات قۇرالدارىندا بالاعات سوزدەر قولدانعانى ءۇشىن 20 اەك ايىپپۇل نەمەسە 15 تاۋلىككە دەيىن اكىمشىلىك قاماۋ جازاسى كوزدەلەدى.
بۇعان دەيىن مادەنيەت جانە اقپارات ءمينيسترى ايدا بالايەۆا ءانونيمدى Telegram-ارنالاردى سىنعا العان بولاتىن. ونىڭ ايتۋىنشا، كوپتەگەن پلاتفورمالار جالعان اقپارات پەن پورنوگرافيا جاريالايدى.
قۇقىق قورعاۋشىلار مەن ازاماتتىق قوعام وكىلدەرى قازاقستاندا بۇقارالىق اقپارات قۇرالدارى مەن الەۋمەتتىك جەلىگە قاتىستى بيلىكتىڭ باقىلاۋى كۇشەيگەنىن ايتادى. ەلدە بيلىكتى سىنايتىن جۋرناليست، بلوگەر، بەلسەندىلەردىڭ اككاۋنتتەرى بۇعاتتالىپ، You Tube ارنالارى ءتۇرلى سەبەپپەن جابىلادى. جاقىندا عانا جۋرناليست اسحات نيازوۆ پەن ۆاديم بورەيكونىڭ جانە ساياسي بەلسەندى سانجار بوقايەۆتىڭ Instagram پاراقشالارى وشىرىلگەن.