شاعىمدانۋشى – تۇركسىب اۋداندىق مەملەكەتتىك كىرىستەر دەپارتامەنتى.
سوت جۇيەسىنە تىركەلگەن ءىس قۇجاتتارىنا سۇيەنسەك، مەملەكەتتىك كىرىستەر دەپارتامەنتى «CDM GRoup» كومپانياسىنىڭ بۇرىنعى يەسى ءانيپا نازاربايەۆا مەن قازىرگى يەسى جانات مامرييەۆانىڭ ۇستىنەن سوتقا ارىز بەرگەن، دەپ حابارلايدى aqshamnews.kz
دەپارتامەنت «CDM GRoup» كومپانياسىنىڭ جارعىلىق كاپيتالىنداعى 100% ۇلەستى ساتىپ الۋ – ساتۋ شارتىن جانە مەملەكەتتىك قايتا تىركەۋدى جارامسىز دەپ تانۋدى سۇراعان.
ءىس 2024 جىلدىڭ 11 قاراشاسىندا باستالعان، 6 قاڭتاردا العاشقى سوت وتىرىسى بەلگىلەنگەن. الايدا العاشقى سوت وتىرىسىنا قاتىستى قۇجاتتار جۇيەدە جاريا بولماعان.
Egov جۇيەسىندەگى اقپارات بويىنشا، «CDM GRoup» كومپانياسى 2015 جىلى 18 ناۋرىزىندا تىركەلگەن. 2017 جىلعا دەيىن ونىڭ قۇرىلتايشىلارى: ءانيپا ءابىش قىزى نازاربايەۆا مەن ءالي جانبولات ۇلى قىلىشپايەۆ بولعان. 2017 جىلدىڭ 17 ناۋرىزىندا كومپانيا قايتا تىركەۋدەن ءوتىپ، ونىڭ جاڭا قۇرىلتايشىسى جانات مامرييەۆا بولعان. سوت ىسىنە تۇرتكى بولىپ وتىرعان وسى قايتا تىركەۋ كەزىندەگى كەلىسىمشارت بولۋى مۇمكىن. سەبەبى مامرييەۆا مەن نازاربايەۆانى وسى كومپانيا بايلانىستىرادى. نازاربايەۆادان بولەك، قىلىشپايەۆتىڭ نەلىكتەن سوتتان تىس قالعانى بەلگىسىز.
«CDM GRoup» كومپانياسى كوتەرمە ساۋدامەن اينالىسادى. «بيزنەس-اناليتيك» جۇيەسىنىڭ اقپاراتىنا سۇيەنسەك، 2024 جىلدىڭ جەلتوقسانىنداعى جاعدايعا بايلانىستى كومپانيانىڭ مەملەكەت الدىنداعى سالىق بەرەشەگى 350 613 102 تەڭگەگە جەتكەن. وسى كومپانيامەن ءبىر مەكەنجايدا (تۇركسىب اۋدانى كراسنوگۆاردەيسكيي تراكتى 152د) جانات مامرييەۆاعا تيەسىلى تاعى ءبىر كومپانيا تىركەلگەن. «تدا ترانزيت الماتى LTD» كومپانياسىنىڭ مەملەكەتكە سالىق بەرەشەگى 318 250 570 تەڭگەنى قۇرايدى (2024 جىلدىڭ جەلتوقسانىنداعى جاعداي بويىنشا).