«وڭتۇستىك» جانە «استانا» وڭىرلىك قولباسشىلىقتارىنىڭ باسشىلىعى سارباز انالارى ءۇشىن 8 ناۋرىز مەرەكەسىنە ەرەكشە سىيلىق دايىنداپ، ولاردىڭ تىكەلەي ەفيردە ۇلدارىمەن كەزدەسۋىن ۇيىمداستىردى.
اسكەريلەردىڭ بۇل باستاماسىنا «قازاقستان» رەسپۋبليكالىق تەلەراديوكورپوراسياسى Jambyl تەلەراديوكومپانياسىنىڭ باسشىسى گۇلبارشىن قۇلانبايەۆا مەن Saryarqa تەلەارناسىنىڭ جەتەكشىسى بەرىك دۇيسەتايەۆ قولداۋ كورسەتتى، دەپ حابارلايدى اlmaty-akshamy.kz
– بىزگە اسكەري بولىمدەردىڭ ساربازدارى اراسىنان انالارى ءبىلىم بەرۋ سالاسىندا جۇمىس ىستەيتىن تارازدىڭ تۋمالارىن تابۋ قيىندىق تۋدىرعان جوق، – دەيدى «وڭتۇستىك» وڭىرلىك قولباسشىلىعى اسكەرلەرى قولباسشىسىنىڭ تاربيە جانە يدەولوگيالىق جۇمىستار جونىندەگى ورىنباسارى پولكوۆنيك وراز كۋچۋكوۆ. – ءبىزدىڭ بۇل «ارنايى وپەراسيا» تۋرالى كوپتەگەن ادامدار حاباردار بولعانىمەن، انالار بۇل جونىندە بىلگەن جوق.
№ 44 ورتا مەكتەپتىڭ حيميا-بيولوگيا ءپانىنىڭ ءمۇعالىمى ءمولدىر ساكييەۆا مەن № 53 ورتا مەكتەپتىڭ باستاۋىش سىنىپ ءمۇعالىمى نازيما داۋتبايەۆا «راۋان» باعدارلاماسىنىڭ تىكەلەي ەفيرىنە كەلگەندە وزدەرىن قانداي توسىنسىي كۇتىپ تۇرعانىن بىلگەن جوق. اڭگىمە ماماندىقتان وتباسىلىق تاقىرىپقا اۋىسقان كەزدە ستۋديا قوناقتارى ۇلدارىنىڭ مەرزىمدى قىزمەت اتقاراتىنىن ايتتى. وسى ءساتتى دۇرىس پايدالانعان تەلەجۇرگىزۋشى ولاردىڭ ارمانىن سۇرادى. ال انالار بولسا ءبىراۋىزدان ۇلدارىن ءبىر كورىپ، قۇشاقتاعىسى كەلەتىنىن جەتكىزدى.
«وڭتۇستىك» وڭىرلىك قولباسشىلىعىنىڭ سارىوزەكتەگى 12740 اسكەري بولىمىنەن كەلگەن قاتارداعى جاۋىنگەرلەر دانيار ساكييەۆ پەن ماديار اتامبەك ستۋدياعا گۇلمەن كىرگەن كەزدە انالارى ءوز كوزدەرىنە وزدەرى سەنبەي اڭ-تاڭ بولىستى.
«استانا» وڭىرلىك قولباسشىلىعىندا دا وسىعان ۇقساس سەناريي ورىن الدى. تارازداعى 85395 اسكەري بولىمىندە قىزمەت ەتەتىن قوس سارباز نۇربول كوپبايەۆ پەن راسۋل ءالجانوۆ قاراعاندىعا ارنايى كەلدى. مەرزىمدى قىزمەتتىڭ جارتى جىلىندا ولار جاۋىنگەرلىك جانە دەنە دايىندىعىندا ۇزدىك ناتيجەلەر كورسەتىپ، ءبولىم قولباسشىلىعى ەكەۋىنە دە ونكۇندىك دەمالىس بەرگەن ەكەن.
«سالەم، قاراعاندى!» باعدارلاماسىنىڭ مەرەكەلىك شىعارىلىمىنا اۋىل كىتاپحاناشىسى بايان حاسەنوۆا قوناق بولدى. باعدارلاما رەجيسسەرلەرى ۇيىمداستىرعان «تەلەكوپىر» بايان ءۇشىن ۇلى نۇربولمەن كەزدەسۋمەن اياقتالدى.
– دەمالىسقا شىققان سوڭ مەن تۋىستارىما جەتۋگە اسىقتىم. ءارى اناما توسىنسىي جاساۋ مۇمكىندىگى تۋعانىنا قاتتى قۋاندىم. مەن وعان ەستە قالارلىق ەرەكشە تارتۋ جاساعىم كەلدى، – دەيدى نۇربول كوپبايەۆ.
مەكتەپ اسحاناسىنىڭ اسپازى اسەل كوندوربايەۆانىڭ قاتىسۋىمەن وتكەن باعدارلامادا وعان ۇلىنىڭ بۋكەت بەرىپ جىبەرگەنى ايتىلدى. كوپ كەشىكپەي ۇلى راسۋل ستۋدياعا گۇلمەن كىرىپ كەلگەن كەزدەگى اناسىنىڭ تاڭدانىسىن تىلمەن ايتىپ جەتكىزۋ قيىن.
تەلەارنا باسشىلارى مەن جۇرگىزۋشىلەرى، سونداي-اق حابارعا قاتىسقان كەيىپكەرلەر «وڭتۇستىك» وڭىرلىك قولباسشىلىعى اسكەرلەرىنىڭ قولباسشىسى گەنەرال-مايور قۋانىشبەك ۇشتايەۆ پەن «استانا» وڭىرلىك قولباسشىلىعى اسكەرلەرىنىڭ قولباسشىسى پولكوۆنيك ەرجان يبرايەۆقا مەرزىمدى قىزمەتتەگى ساربازداردىڭ انالارىمەن كەزدەسۋدى ۇيىمداستىرۋعا جاردەم كورسەتكەنى ءۇشىن العىستارىن ءبىلدىردى.