الماتىدا شوقان ءۋاليحانوۆ اتىنداعى الاڭدا انالارعا ارنالعان ميتينگ-كونسەرت ءوتتى.
ءىس-شارا حالىقارالىق ايەلدەر كۇنىنە وراي ءوتتى، وعان 700-دەي ادام قاتىستى. ميتينگتى «ەرىكتىلەر ليگاسى» قوعامدىق قورى مەن «قازاقستان اتا-انالار وداعى» رقب ۇيىمداستىردى. ساحنادا ءسوز العان بەلسەندىلەر اتا-انالار مەن اعا بۋىنعا قۇرمەت كورسەتۋ، وتانعا سۇيىسپەنشىلىك، وقۋ مەن سالاۋاتتى ءومىر سالتى سياقتى اسا ماڭىزدى تاقىرىپتاردى قوزعادى.
"قازاقستان اتا-انالار وداعىنىڭ" تەڭ قۇرىلتايشىسى باعيلا بالتابايەۆانىڭ ايتۋىنشا، ساياباققا 700-دەن استام ازامات جينالعان. بۇلار - اتا-انالار، ەرىكتىلەر، اعا بۋىن وكىلدەرى.
ساحنادان قوعام بەلسەندىلەرى، تانىمال بلوگەرلەر اتا-انالارعا، بالالارعا، جاستارعا ۇندەۋ تاستادى. سالاۋاتتى ءومىر سالتى، وقۋ، اتا-انانى قۇرمەتتەۋدىڭ ماڭىزدىلىعى تۋرالى اڭگىمەلەدى. مىسال رەتىندە تۋعان جەرىن قورعاعان دالانىڭ ۇلى ايەلدەرىنىڭ ەسىمدەرى اتالدى، ولاردىڭ اراسىندا توميريس، مانشۇك مامەتوۆا، ءاليا مولداعۇلوۆا بار. جاستاردىڭ ۇيلەسىمدى دامۋى ءۇشىن ولاردىڭ ءومىر جولىن زەردەلەۋدىڭ، جاس قازاقستاندىقتاردى وتانعا دەگەن سۇيىسپەنشىلىك رۋحىندا تاربيەلەۋدىڭ ماڭىزدىلىعى اتاپ ءوتىلدى.
باعيلا بالتابايەۆا اتاپ وتكەندەي، شارا «ەرىكتىلەر ليگاسى» مەن «قازاقستان اتا-انالار وداعىنىڭ» بىرلەسكەن مەموراندۋمى اياسىندا ۇيىمداستىرىلعان جوبالاردىڭ ءبىر بولىگى بولدى. بۇلار - سالاۋاتتى ءومىر سالتى، پاتريوتيزم، تاريحتى زەردەلەۋ، دالانىڭ حالىقتىق ادەت-عۇرىپتارى تاقىرىپتارىندا سەمينارلار، ترەنينگتەر. وسىنداي تاربيەلىك ءمانى بار جوبالار بارىسىندا، اسىرەسە، اتا-اناعا قۇرمەت، اعا ۇرپاققا قۇرمەت كورسەتۋدىڭ ماڭىزدىلىعى ءسوز بولادى.
شارا بارىسىندا تانىمال ونەرپازداردىڭ كونسەرتى ءوتتى. سونداي-اق، قولونەر بۇيىمدارىنىڭ، ءداستۇرلى زەرگەرلىك بۇيىمداردىڭ كورمە-جارمەڭكەسى ۇيىمداستىرىلىپ، عاسىردان عاسىرعا جەتەر، دالا قوجايىندارى دايىنداعان ءداستۇرلى بۇيىمدار ۇسىنىلدى.