انا تىلىمىزدەگى كوميكس جارىققا شىقتى

بۇل تۋىندى 6-10 جاس ارالىعىنداعى بالالارعا ارنالعان.

كوميكس ەۋروپالىق تاجىريبە نەگىزىندە قانات ساحاريانىڭ پروديۋسەرلىگىمەن جارىققا شىقتى، دەپ حابارلايدى Almaty-akshamy.kz.

وندا بۇلدىرشىندەردىڭ سيفرلىق ساۋاتتىلىعىن ارتتىرۋعا، ينتەرنەتتەگى قاۋىپسىزدىك ەرەجەلەرىن ۇيرەتۋگە ماڭىز بەرىلىپتى. بالعىندارعا ونلاين ورتادا  قاۋىپسىزدىكتى ۇيرەتۋ ءۇشىن كوميكسكە قايسار ەسىمدى كەيىپكەر ەنگىزىلگەن. ول سۋپەر قاھارمان كەيپىندە بالالارعا كيبەربۋللينگكە قارسى تۇرۋعا، اقپاراتتى دۇرىس تالداۋعا كومەكتەسەدى.

"اۋەلدە ءبىز بالالارعا ينتەرنەتتەگى قاۋىپسىزدىكتى ۇيرەتۋدى بەينەساباقتار ارقىلى جۇرگىزۋدى ويعا الدىق. تاعى بىرنەشە نۇسقا بولدى. ساراپتاي كەلە، كوميكس جانرىنا توقتادىق. بىرىنشىدەن، كوميكسكە بالالاردىڭ قىزىعۋشىلىعى جوعارى. ونى قابىلداۋ دا جەڭىل بولادى. الداعى ۋاقىتتا الەۋمەتتىك جەلىلەر مەن سايتتار ارقىلى كوميكستەردىڭ قولدانىس اياسىن كەڭەيتۋ جوسپارىمىز بار"، - دەدى ق ر پرەزيدەنتى جانىنداعى ۇلتتىق قۇرىلتاي مۇشەسى قانات ساحاريا.

كوميكستىڭ سەنارييىن جازىپ، سۋرەتىن سالعان وتاندىق جاس ءارى تالانتتى اۆتورلار  ءمادينا تاجباعامبەتوۆا مەن بەك-اتا دانيال. ايتا كەتۋ كەرەك، تۋىندىنى قۇراستىرۋعا ەۋروپالىق وداقتىڭ قازاقستانداعى وكىلدىگى قولداۋ بىلدىرگەن. ەۋروپالىق كوميسسيا بىلتىر بالالارعا ارنالعان سيفرلىق قىزمەتتەردى جاقسارتۋدىڭ جانە ءار بالانىڭ ينتەرنەتتە قورعالۋىن قامتاماسىز ەتۋدىڭ جاڭا ستراتەگياسىن قابىلداعان. بۇگىنگى تانىستىرىلىم - اتالعان باعدارلاما اياسىندا جۇزەگە اسقان جۇمىستاردىڭ ءبىرى.