اتا-بابامىزدا ۋىزىنا جارىعان دەگەن كيەلى ءسوز بار. اسىرەسە، تەكتى پاراساتتى، كىسىلىكتى ادام كورسەك، ۋىزىنا جارىپ وسكەن ازامات ەكەن دەپ سۇيىسپەنشىلىك ءبىلدىرىپ جاتامىز. ال بۇل دەگەنىڭىز ادام بالاسىنىڭ بويىنداعى اسىل قاسيەتتەردىڭ بارلىعى انا سۇتىمەن دارىپ، جەتىلەتىندىگىن بىلدىرسە كەرەك.
ال ءقازىر سول ۋىزىنا جارىپ وسەر ۇرپاق سانى ازايىپ بارا جاتقانى جاسىرىن ەمەس. تۋعان ءسابيىن انا سۇتىمەن قورەكتەندىرىپ، تابيعي تاماقتاندىراتىن انالاردىڭ سانىنىڭ ازايىپ بارا جاتقانىنا دۇنيەجۇزىلىك دەنساۋلىق ساقتاۋ ۇيىمى وسىدان جيىرما جەتى جىل بۇرىن دابىل قاعىپ، ءوزىمىز ۇمىتىپ بارا جاتقان جاڭا تۋعان بالانى تۋا سالىسىمەن انا باۋىرىنا سالىپ، بىردەن انا سۇتىمەن اۋىزداندىرۋ كەرەكتىگىن ايتىپ دابىل قاقتى. ءتىپتى ارنايى باعدارلاما دا قابىلداندى. وسىدان ەكى جىل بۇرىن ول باعدارلامانىنىڭ قولعا الىنعانىنا شيرەك عاسىر تولعانىن اتاپ تا وتتىك. ءقازىر وزگە ۇلت وكىلدەرى تۇرماق، ءوزىمىزدىڭ قاراكوز كەلىنشەكتەرىمىز بالانى ەمىزۋدى ارتىق جۇمىس ساناپ، «انا سۇتىمەن پارا-پار» دەگەن جارناماسى جالاۋلاتىلعان جاساندى سۇتكە يەك ارتىپ العانداي. ونىڭ ۇستىنە انا ءسۇتىنىڭ ءقادىر- قاسيەتىن تۇسىندىرەتىن بۇرىنعى ەنەلەر مەن انالار قاتارى دا سيرەي باستاعانداي. ءوزى بالاسىن جاساندى سۇتپەن قورەكتەندىرگەن انا مەن ەنە قىزى مەن كەلىنىنە بالا ءۇشىن انا سۇتىنەن ارداقتى استىڭ جوقتىعىن قايدان ءتۇسىندىرسىن؟! پەرزەنتحانالاردا جاڭا بوسانعان جاس انالاردى بالا ەمىزۋگە يەكەمدەپ، ءسابيى ەمشەك سۇتىمەن اۋىزدانعانشا كومەك كورسەتەتىن ماماندار بار، ءبىراق ول ماماننىڭ ءۇش-تورت كۇنگى كەڭەسى كەيبىر جاس انالاردىڭ بويىنا ءسىڭىپ ۇلگەرمەيتىنى تاعى بار. وسى ولقىلىقتاردىڭ ورىنىن تولتىرۋ ماقساتىندا قالامىزداعى №29 قالالىق ەمحانادا «جاس انالار» كابينەتى اشىلدى. مۇندا جاس بوسانعان كەلىنشەكتەردى سابيلەرىن انا سۇتىمەن قورەكتەندىرۋگە جانە ولاردىڭ دەنساۋلىعىن كۇتىپ باپتاۋعا، وقىس جاعدايلاردا سابيىنە العاشقى كومەك كورسەتۋگە بەيىمدەيدى.
"كابينەت جۇمىسىنىڭ باستى مىندەتى– جاس انالارعا تەك ءسابيىن انا سۇتىمەن قورەكتەندىرۋگە بەيىمدەپ قانا قويماي، تۋىلعان كۇنىنەن باستاپ كۇتىپ-باپتاۋ مەن دۇرىس قۇنداقتاپ، دەنساۋلىعىن كۇتۋدى دە ۇيرەتۋ. ول ءۇشىن ولارعا ەمحانانىڭ بالا دارىگەرلەرىمەن قاتار، قالامىزداعى انا سۇتىمەن قورەكتەندىرۋ باعدارلاماسى بويىنشا قۇرىلعان ورتالىقتىڭ بىلىكتى ماماندارى انا سۇتىمەن قورەكتەندىرۋدىڭ ماڭىزىن ءتۇسىندىرىپ، اقىل-كەڭەس بەرەدى. ارنايى شاقىرىلعان كوپ بالا تاربيەلەپ وسىرگەن انالارىمىز بەن اقىلمان اجەلەرىمىز كەلىپ، وزدەرىنىڭ تاجىريبەلەرىمەن بولىسەدى. سونىڭ ناتيجەسىندە سوڭعى ەكى-ۇش جىلدا جاس انالار اراسىندا بالالارىن انا سۇتىمەن تاماقتاندىرىپ، بەسىككە بولەيتىندەر قاتارى ارتىپ كەلەدى"، – دەيدى «جاس انالار» كابينەتىنىڭ مەيىربيكەسى الينا نۇركەيەۆا.