بۇگىن الماتى قالاسىنىڭ المالى اۋدانىنا قاراستى بولتىرىك اتىحان ۇلى اتىنداعى №36 گيمنازيادا رەسپۋبليكا كۇنىنە ارنالعان «قىران ەلىم، قازاقستان!» اتتى مەرەكەلىك ءىس-شارا ءوتتى.
ءبىرتۇتاس تاربيە باعدارلاماسىنىڭ «تاۋەلسىزدىك جانە وتانشىلدىق» جوباسى اياسىندا ۇيىمداستىرىلعان ءىس-شاراعا جينالعان كوپشىلىك مەكتەپ وقۋشىلارىنىڭ ونەرىن تاماشالادى.
جاس ۇرپاقتىڭ وتانسۇيگىشتىك، ۇلتجاندىلىق، ەل مەن جەرگە دەگەن قۇرمەتىن ارتتىراتىن اسەرلى كەش مەملەكەتتىك ءانۇراندى شىرقاۋمەن باستالدى.
ءيا، تالانت قىرلارىن ۇشتاپ، دۇنيەنىڭ تىلسىم سىرى مەن عاجايىپ سيقىرلى كۇيىن ۇعىندىراتىن ول ارينە، مەكتەپ پەن ۇستاز. جەتىسۋ ولكەسىنە شۇرايلى ولەڭدەرىمەن اقىن، جىرشى، كۇيشى رەتىندە تانىلعان بولتىرىك اتىحان ۇلىنىڭ ەسىمىمەن اتالاتىن №36 گيمنازيا ونەرلى ۇل-قىزدارعا باي. سەبەبى، بۇل مەكتەپتە شاكىرتتەرىن ۇلتتىق ونەرگە باۋلىپ، ءتۇرلى اسپاپتاردا ويناۋدى ۇيرەتەتىن، رۋحاني بايىتىپ، تالانتتار تاربيەلەيتىن كاسىبي ماماندار، تاجىريبەلى ۇستازدار كوپ.
ءىس-شارادا قازاقستان رەسپۋبليكاسىنىڭ ەڭبەك سىڭىرگەن ونەر قايراتكەرى، م.ماقاتايەۆ توسبەلگىسىنىڭ يەگەرى، №36 گيمنازيانىڭ «اسىل مۇرا» كوركەمسوز ۇيىرمەسىنىڭ جەتەكشىسى، ارداقتى ۇستاز گۇلشارا ەسەتوۆانىڭ ادەبيەتكە باۋلىعان شاكىرتتەرى ءارىپ عالىم، نۇراقىن ءنۇرالي، 2 سىنىپ وقۋشىلارى حاديشا كەنجەبەك پەن ايانا قايراتتىڭ ناقىشىنا كەلتىرىپ وقىعان ولەڭدەرى كوركەم ءسوزدىڭ كوسەگەسىن كوگەرتتى.
سانيرا قايرانوۆا جەتەكشىلىك ەتەتىن حالىقارالىق، رەسپۋبليكالىق، قالالىق بايقاۋلاردىڭ جەڭىمپازى «تۇمارحانىم» بي ءانسامبلىنىڭ بيشىلەرى ساحنانىڭ شىرايىن كەلتىردى. 4 سىنىپ وقۋشىسى كەنجەبەك ابدراحماننىڭ «ءوز ەلىم» دەپ سالعان ءانى جۇرەگى ەلىم دەپ سوققان جانداردىڭ جانىن تەبىرەنتتى.
اقمارال اقسەرىكوۆا باسشىلىق ەتەتىن №36 گيمنازيانىڭ وسكەلەڭ ۇرپاققا بەرەر ءتالىمى مەن تاعىلىمى مول. بايقاعانىمىز، مەكتەپ كۇندەلىكتى ءۇزىلىس كەزىندەگى قوڭىراۋ ءۇنىن كۇيگە الماستىرعان ءبىلىم وشاقتارىنىڭ ءبىرى ەكەن. گيمنازيا باسشىسىنىڭ ايتۋىنشا، مەكتەپتە كۇيدىڭ ويناتىلۋىنىڭ وزىندىك ەرەجەسى قالىپتاسقان. ماسەلەن، ادەتتەگى ساباق باستالاتىن ساتتە توكپە كۇي قويىلسا، ال ساباق سوڭىندا شەرتپە كۇي وينايدى. راس، مۇنداي ءۇردىس بالالاردى مەكتەپ قابىرعاسىنان ەلىنە، جەرىنە دەگەن سۇيىسپەنشىلىگىن وياتىپ، ۇلتتىق ونەرىمىزدىڭ اسىل قازىناسىنا سۋسىنداپ وسۋىنە جول اشارى ءسوزسىز.
– بۇگىنگى ءىس-شارانىڭ ماقساتى – جاس ۇرپاقتى تۋعان جەرىن، تۋعان ەلىن ارداقتاۋعا باۋلۋ، وتانسۇيگىشتىك ۇلتجاندىلىققا تاربيەلەۋ، وقۋشىلاردىڭ بويىندا پاتريوتتىق سەزىمدى قالىپتاستىرۋ. گيمنازيامىزدا ءبىلىم الۋمەن قاتار، ءتۇرلى مۋزىكا اسپاپتارىنىڭ قۇلاعىندا وينايتىن، تامىلجىتا ءان سالىپ، مىڭ بۇرالا بي بيلەيتىن بالالار كوپ. شاكىرتتەرىمىز حالىقارالىق، رەسپۋبليكالىق بايلاۋلارعا قاتىسىپ، جۇلدەلى ورىندار الىپ ءجۇر. مۇنىڭ بارلىعى ۇستازدارىمىز بەن اتا-انالارىمىزدىڭ بىرلىگىنىڭ ارقاسى، - دەيدى گيمنازيا باسشىسى اقمارال ماعجان قىزى.
مەرەكە اياسىندا رەسپۋبليكا كۇنىنە ارنالعان كورمە ۇيىمداستىرىلدى. ديرەكتوردىڭ تاربيە ءىسى جونىندەگى ورىنباسارلارى سەرىك سەركەشپايەۆ پەن ەلميرا يساحمەتوۆانىڭ ۇيىمداستىرۋىمەن وتكەن مەرەكەلىك كەشتىڭ سوڭىندا وقۋشىلار مەكتەپ اۋلاسىنا اعاش وتىرعىزدى.
ىرگەتاسى قالانعالى بەرى قالا مادەنيەتى مەن ونەرىن دامىتۋ ىسىنە قوماقتى ۇلەس قوسىپ، جاس ۇرپاققا ساپالى ءبىلىم مەن رۋحاني-مادەني تاربيە بەرۋ №36 گيمنازيا ۇستازدارىنىڭ ەڭبەگى زور. ءبىلىم وشاعىنىڭ قالا مەكتەپتەرى اراسىندا الار ورنى ەرەكشە، بەدەلى دە جوعارى. بۇگىندە ەلىمىزدىڭ تۇكپىر-تۇكپىرىندە قازاقستاننىڭ دامۋى جولىندا قىزمەت ەتىپ جۇرگەن شاكىرتتەرىمىز – ءبىزدىڭ ماقتانىشىمىز دەيدى مەكتەپ ۇستازدارى.
ايتا كەتەيىك، 25 قازان كۇنى ەلىمىزدە ۇلتتىق مەرەكە – رەسپۋبليكا كۇنى اتاپ وتىلەدى. وسى ايتۋلى كۇننىڭ قۇرمەتىنە الماتى قالاسىندا ءتۇرلى مادەني- ءىس-شارا ۇيىمداستىرىلادى.