ۆاشينگتوندا تۇراتىن وتانداسىمىز ءان شىعارىپ قانا قويماي، الەمدىك حيت اندەردى قازاق تىلىنە، ال قازاق اندەرىن اعىلشىن تىلىنە اۋدارىپ ءجۇر.
انار ءومىرزاق (Anar KZ Omirzaq) ۆاشينگتون قالاسىندا تۇرادى. ونىڭ ايتۋىنشا، قاڭتار وقيعاسى سىرتتاعى قازاقتارعا وتە اۋىر تيگەن. تاۋەلسىزدىككە تىكەلەي ءقاۋىپ تونگەندە، ەلمەن بىرگە بولا الماعان وتانداستارىمىز سىرت مەملەكەتتە ءجيى كەزدەسىپ، قاتتى الاڭداعانىن، جىراقتاعى ەلىنىڭ تاعدىرى ءۇشىن اقىلداسقانىن ايتقان، دەپ حابارلايدى Almaty-akshamy.kz
ەل تۇرعىندارى عانا ەمەس، شەتەلدە جۇرگەن قازاقتار دا قاتتى كۇيزەلىسكە تۇسكەن.
«پاندەميا كەزىندە قازاقستانداعى كوپتەگەن تانىمال ادامدار، ونەر، قوعام قايراتكەرلەرى دە قايتىس بولدى. سول كەزدە جۇباتۋ ءانىن شىعاردىم. وسىنداعى جانە ەلدەگى ادامدارعا جۇبانىش بولسىنشى دەپ ويلادىم. ۇزاققا جالعاسقان، ادامداردى كۇيزەلىسكە تۇسىرگەن پاندەميادان سوڭ قاڭتار وقيعاسى بولدى. سوندىقتان ەلىمە، الىستاعى حالقىما كوڭىل ايتقىم كەلدى. كوڭىل ايتۋدى، جۇباتۋدى بەينەبايان ارقىلى جەتكىزگىم كەلدى. قازاعىمدى قولىمنان كەلگەنشە جۇباتىپ، دەم بەرگىم كەلەدى»، – دەيدى انار ءومىرزاق.
انار اقش-قا العاش رەت 18 جاسىندا بارعان. ءال-فارابي اتىنداعى قازاق ۇلتتىق ۋنيۆەرسيتەتىنە وقۋعا تۇسكەنىمەن، 1-كۋرسىندا-اق امەريكانىڭ وقۋ گرانتىن ۇتىپ الىپتى. جولدىڭ قاشىقتىعىنا قاراماستان، ەكى مەملەكەتتەگى وقۋ ورىندارىندا كەزەك ءبىلىم الا ءجۇرىپ، قوس ۋنيۆەرسيتەتتى دە ءبىتىرىپ شىققان. ماگيستراتۋرا ديپلومىن العان سوڭ قوس eلدiڭ اراسىندا جۇمىس iستەپ، كەيىن ۆاشينگتونعا ءبىرجولاتا قونىس اۋدارعان. ونىڭ ايتۋىنشا، امەريكاداعى قاي سالانى الىپ قاراسا دا، باسەكە وتە جوعارى. ال مۋزىكانت، ءانشى بولۋ، فەستيۆالدەرگە قاتىسىپ، ءوزىڭدى مويىنداتۋ – مۇحيتتان ءىنجۋ-مارجان ىزدەگەندەي دەپ سانايدى ول.
«پاتريوتتىق جانە ليريكالىق اندەر جازامىن. 18 جاسىمدا اعىلشىن ءتىلىن ەركىن مەڭگەرگەن سوڭ، ولەڭدەردى سول تىلدە دە جازا باستادىم. 7 جاسىمنان باستاپ قازاق-ورىس تىلىندە ولەڭدەر شىعاردىم. اكەم وپەرا ءانشىسى ەدى، مەنىڭ ون جاسىمدا قايتىس بولىپ كەتتى. اتام دا جىراۋ بولعان. ونەر ماعان سول كىسىلەردەن دارىعان شىعار. قازاق ادەبيەتىندەگى فولكلوردى پايدالانىپ «جۇباتۋ» ءانىن جازدىم. باسقا اندەرىمنiڭ ءسوزىن دە، مۋزىكاسىن دا ءوزىم جازدىم»، - دەيدى ءانشى.
ول جۋىردا عانا ديماش قۇدايبەرگەننىڭ ورىنداۋىنداعى «قايران ەلىم» ءانىن اعىلشىن تىلىنە اۋدارىپ بىتكەن. ونىڭ ايتۋىنشا، ديماشتىڭ فاناتتارى امەريكادا وتە كوپ. الايدا ولار قازاق ءانشىسىنىڭ ورىنداۋىنداعى اندەردىڭ ماعىناسىن تۇسىنە الماي قينالادى.
Pop جانرىندا ءان جازاتىن اناردىڭ نەگىزگى جۇمىسى – بيزنەس-كونسالتينگ. امەريكادا سۇرانىسقا يە بيزنەس-كوۋچ اتانىپ تا ۇلگەرگەن.