انا ءتىلىن ۇيرەنگىسى كەلەتىن قازاقتاردىڭ اراسىندا ءبىزدىڭ ءتىلدى مەڭگەرگىسى كەلەتىن امەريكالىقتار دا بار.
امەريكالىقتاردىڭ قازاق ءتىلىن ۇيرەنىپ جاتقانىنا ەكى اپتا عانا بولعان. ءقازىردىڭ وزىندە قال جاعداي سۇراسا الادى. قاراپايىم بىرنەشە ءسوزى جاتتاپ ۇلگەرگەن. ءتىپتى ونى جازا الادى. وتىزعا دەيىن ەركىن سانايدى.
بۇل تۋرالى Almaty-akshamy.kz Qazaqstan.tv ارناسىنا سىلتەمە جاساپ حابارلايدى.
كەرەن كانولي بەس تىلدە سويلەيتىن پوليگلوت جىگىت. قازاق ءتىلىن مەڭگەرسە التى ءتىلدى بىلەتىن مامانعا اينالماق. «كۇندەلىكتى از دا بولسا تۇراقتى ۋاقىت بولسەڭ كەز كەلگەن ءتىلدى مەڭگەرۋگە بولادى»- دەيدى.
«ناقتى باعا بەرۋگە ەرتە ارينە. دەسە دە ءتىپتى تۇرىك تىلىمەن سالىستىرعاننىڭ وزىندە قازاق تىلىندە كوپتەگەن وزىنە ءتان دىبىستار بار. ق، ءۇ، ڭ سەكىلدى. ءقازىر مەنىڭ اۋىز قۋىسى بۇلشىق ەتتەرىم مەن كەڭىردەك پەن كوكىرەك تۇسىم دا وزگەشە قوزعالىسقا ءتۇسىپ، ءتىل سىندىرىپ جاتىرمىن. امەريمكالىقتار ءۇشىن وڭاي ءتىل ەمەس»، - دەيدى اقش ازاماتى كەرەن كاننولي.
«مەن كوللەدجدە وقىعاندا ورتا ازيا تاريحى جانە مادەنيەتىمەن تانىستىم. سودان بەرى قازاقستانعا قىزىعۋشىلىعىم ارتتى. ارنايى بارسام دەپ ءجۇرمىن. قازاق اۋەنى مەن باي ءدۇستۇرىن ۇناتىپ قالدىم. مەن كەنزاستا تۋىپ ءوستىم. ەكى جاقتىڭ مادەنيەتىندە ۇقساستىقتار بار. كانزاستا دا جايىلىمدار كوپ، حالىق نەزىنەن مال ۇستايدى، مۋزىكالىق اسپاپتار مەن اۋەندە دە ۇقساستىق از ەمەسىن بايقادىم. سونى زەرتتەگىم كەلەدى»، - دەيدى اقش ازاماتى ادۋن سىندين
امەريكالىقتاردىڭ ءوتىنىشىن جەرگە تاستاماي، قازاق ءتىلىن ۇيرەتۋدى قولعا العان - اسەل كۇزەۋحان. اعىلشىندارعا قازاق ءتىلىن تىكەلەي ۇيرەتەنىن ارنايى ادىستەمە تاپپاعان سوڭ وزىنشە نۇسقاۋلىق جاساپ العان. بۇرىندارى شەتەلىكدىكتەر قازاقستانعا جۇمىس بابىمەن باراتىن بولسا ورىس ءتىلىن ۇيرەنۋگە تىرىساتىن. «ەندى جاعداي وزگەرىپ كەلەدى»- دەيدى مامان.
«ءقازىر ولار قازاق ءتىلىن ۇيرەنۋىم كەرەك دەپ ورىس ءتىلىن ىسىرىپ، قازاق ءتىلىن ۇيرەنىپ جاتقانى ۇلكەن جەتىستىك. جانە قازاقتانداعى قازاق ءتىلىن بىلمەيتىندەر ءۇشىن ۇلگى دەپ ويلايمىن»، - دەيدى قازاق ءتىلىن ۇيرەتۋشى اسەل كۇزەۋحان.
قازاق تىلىنە دەن قويعان كەرەن ورىس ءتىلىن جاقسى بىلەدى. الايدا، قازاقستانعا بارعاندا سول ەلدىڭ تىلىندە سويلەۋىم كەرەك. ءارى قازاقتىڭ سالت ساناسىن، ءدىلىن قازاق ءتىلىنسىز ءتۇسىنۋ مۇمكىن ەمەس دەيدى.