الدا كەلە جاتقان تاۋەلسىزدىك كۇنى مەرەكەسىنە وراي ەلىمىزدىڭ تۇكپىر-تۇكپىرىندە ءتۇرلى ءىس-شارالار كەشەنى ۇيىمداستىرىلىپ جاتىر.
وسىنداي ءبىر تاماشا شارا س.امانجولوۆ اتىنداعى شىعىس قازاقستان ۋنيۆەرسيتەتىنىڭ رەكتورى، پروفەسسور تولەگەن مۇحتار ادىلبەك ۇلىنىڭ قولداۋىمەن قۇرىلعان «سەمسەر» اقىندار مەكتەبىندە ءوتتى.
ستۋدەنتتەر تاۋەلسىزدىك كۇنى مەن دەموكراتيالىق جاڭعىرۋ كۇنىنە ارناپ ولەڭ-جىردان شاشۋ شاشتى. سونىڭ ءبىر پاراسىن الماتىنىڭ باس باسىلىمى «Almaty aqshamy» گازەتىنە جولداپتى.
بەكارىس سەكەن،
س.امانجولوۆ اتىنداعى ءشقۋ-نىڭ 2-كۋرس ستۋدەنتى.
تاۋەلسىزدىك
اڭساعانى وسى ەمەس پە ازات كۇن؟!
بوداندىقتا بۇعاۋلانعان قازاقتىڭ.
گۇلگە ورانىپ گۇلدەنسە دە قاندى الاڭ،
كۇرمەۋىنەن تارقامايدى ازاپ مۇڭ.
ءدامىن تاتپاي ەركىندىكتىڭ ءتاتتى نۇر،
ازاتتىقتىڭ تاڭى اتقان با، كوپ عۇمىر؟!
شىرىلداعان شىبىن جانعا قاراماي،
قىرشىن جاستىڭ قابىرعاسىن سوكتى ءبىر.
قارا جەرىم قانعا تويماي ۇل-قىزدىڭ،
ماڭدايداعى ءسونىپ كەتتى جۇلدىزىم.
«ەسكە السىن!» دەپ كەلەر ۇرپاق الدىنا،
ورناتىلدى ولار ءۇشىن «قۇر ءمۇسىن».
ءلاززاتتاردىڭ كوز جاسىنا قانباعان،
قاسىرەتسىڭ قانعا تولعان قاندى الاڭ.
تەڭ كەلمەيتىن تەڭدەسسىزسىڭ، ازاتتىق!
بۇل ومىردە بۇدان باسقا بار ما ءمان؟!
ايامادىڭ ەلدىڭ جانىن مۇشكىلىن،
سەكسەن التى تالاي ناۋبەت قۇشتىردىڭ.
كوردى ءداۋىر قايراتتاردىڭ كوزىنەن
ەگەمەن ەل، تاۋەلسىزدىك ۇشقىنىن.
مىنە، بۇگىن، ەركىندىگىم ەڭسەلى،
ەركىندىكتىڭ جوق ومىردە ولشەمى!
ءسۇيىپ وتەم سوڭعى دەمىم قالعانشا،
قازاقستانىم، مەن سەنى!
ايبار رامازان،
س.امانجولوۆ اتىنداعى ءشقۋ-نىڭ 3-كۋرس ستۋدەنتى
جەلتوقسان جاڭعىرىعى
بابالاردىڭ ارمانى عاسىر كۇتكەن،
ەگەمەندىك ەل ءۇشىن اسىل تىپتەن.
انالارى سەن ءۇشىن تاقىم قىسىپ،
بالالارى بايگەگە باسىن تىككەن.
سان عاسىر ويىڭا الىپ ارمانداعان،
قالايدى ەكەن تاۋەلسىز تاڭداردى ادام.
بولعانى انىق جەلتوقسان جاڭعىرىعى،
تاڭبالانىپ تاريحتا قالعان باعاڭ.
بەلگىلى عوي تاريحتا باعاڭ بارى،
ەگەمەندىك - ەلىمنىڭ بار ارمانى.
سوڭعى نۇكتە قويام دەپ ەستە قالدى،
ماڭگىلىككە جاس جاندار الاڭداعى.
جارالعانداي جاندارمىز ىزگىلىكتەن،
قاۋىپ تونسە، قاشپايمىز ءبىز بۇلىكتەن.
جيىرمانىڭ بولىپتى ماڭايىندا،
ءتۇيىر جانىن تارك ەتكەن قىز-جىگىتتەر.
دوس بولعانعا سىيلاسار ار-يبامىز،
"قاس قىلعانعا قارسى شاپ" - قاعيدامىز.
«بورىكتى قازاعىم!» دەپ اتوي سالعان،
بولىپتى ون التىدا ءسابيرا قىز.
ەلدىكتى جاقىنداتتى الىستاعان،
ناعىز ەردە قاشاندا نامىس بولار.
ەرلەردى ۇمىتپايىق، ۇلىقتايىق،
ەلىمە ەگەمەندىك تابىستاعان.
قازاعىم تاۋسىلماسىن وتتى ويلارىڭ،
ەلدىكتىڭ مەرەكەسىن كوپ تويلاعىن.
ءتىلىڭ، ءدىنىڭ ساقتاۋلى بولسىن، ەلىم،
كورسىن ەلىم كوگىنەن كوك بايراعىن!
ەرنۇر جۇماتاي،
س.امانجولوۆ اتىنداعى ءشقۋ-نىڭ 3-كۋرس ستۋدەنتى
تاۋەلسىز قازاقستان
اقتاردىم اق پاراققا تاۋەلسىزدىك كەمەلىن،
اڭساتقان تالاي جاننىڭ اق ارمانى سەن ەدىڭ.
اتىڭدى ۇرانداتقان قان مايداندا بابالار،
التىن ءارىپ، التىن ءسوز بيىك ۇستا، ورەنىم.
قانىم قازاق، قايسار ەلمىز، سۇيگەنىمىز بوستاندىق،
ارلى ەسىم، تەكتى ۇلت، اتىڭدى ايتام اسپان عىپ.
تاريحىم بار، ماقتانامىن ەل قورعاعان باتىرمەن،
بۇگىنگى كۇن ۇرپاعى، ەلگە قىلما قاستاندىق.
تالاي بالاڭ شىرقادى تۋ كوتەرىپ ۇرانمەن،
ازاتتىقتى تەربەتتى، اسقاقتاتىپ جىر-انمەن.
جاسا قازاق، جاساي بەرگىن، تانىلشى بار الەمگە،
بوستاندىقتىڭ سيمۆولى – بارىس پەنەن قىرانمەن.
اتىڭ ءماشھۇر وزگەلەرگە بايلىعىڭمەن كيەلى،
وزگە ۇلتتىڭ ءوزى دە وتانىم دەپ سۇيەدى.
قۇت دارىعان بۇل مەكەنىم - تاۋەلسىزدىك ورداسى،
ۇشقان قۇس پەن وسكەن گۇل دە باسىن ساعان يەدى.
ۇلان-عايىر جەرىم بار، جەرۇيىعىم مەكەنىم،
كوك تۋىڭدى كوتەرۋدى مەن دە ارمان ەتەمىن.
كوك ءبورىمىز، بودان بولۋ قازاعىما ءتان ەمەس،
ءبورى بولساق، ءبىلۋ كەرەك ول دا ەركىن ەكەنىن.
سانجار سۇلتانعازى
س.امانجولوۆ اتىنداعى ءشقۋ-نىڭ 2-كۋرس ستۋدەنتى
قازاق دەگەن...
ءسۇي جۇرەگىم، بارلىعىن ءسۇي، ازىنا،
قوپارىل دا،
تەرەڭدەي بەر
قازىلا.
تىلمەن ايتىپ جەتكىزە الماس،
بار مەندە،
بايلىق بولىپ سانالاتىن قازىنا!
جۇرەگىمە قونىپ قالعان مەكەندەپ،
قازاق ءۇشىن جىرمەن جۇمىس، وتەۋ كوپ!
ەل دەگەندە ەشتەڭەنى ەستىمەي،
ەلەڭدەيمىن «حالقىم امان با ەكەن؟! دەپ.
ءوز اۋىلىم - اپپاعىم دا ماقتانىم،
بەلگىلى عوي سەنەن باقىت تاپقانىم.
قالاداعى ۆاننادان دا
ارتىقتاۋ،
تۋعان جەردىڭ تۇماسىنا باتقانىم.
توسىمە دە مەيلى باتسىن ايىل-مۇڭ،
انا دەسە، اق كىلەم بوپ جايىلدىم.
انا دەسە، اق باسىمدى ءيىلتىپ،
الدىنا ونىڭ جاتۋعا دا دايىنمىن.
تۇرا المايمىن ەلىم دەسە كۇيمەي تىم،
جان بار مە ەكەن ءوز ۇلتىن دا سۇيمەيتىن؟
قازاق دەگەن بەس ءارىپ قوي،
بەس ساۋساق،
جۇمىلسا ەگەر، جەردىڭ بەتىن بيلەيتىن.
وتىرعاندا جان-جاق تۇگەل جالاقتاي،
شابا بەرۋ قيىن، ءسىرا، دالاقتاي.
ءتىل دەگەندە قايىسپاسا قابىرعا،
مايىسۋعا تۋرا كەلەر ساداقتاي.
اقىندارسىز كوكتەم مەن، راس، كۇز ولمەس،
جازۋشى دا بولعان جوق-تى مىنەلمەس.
قازاعىمنىڭ تاعدىرى ول – ادەبيەت،
ودان اينىپ،
تاعدىرىمىز تۇزەلمەس.
وتكەن دەيتىن بۇگىنگىنىڭ دەرەگى،
كەشەگىلەر بۇگىنگىگە سەنەدى.
باقىت قانشا قىمبات بولسا،
سونشالىق،
قايعىمەنەن،
قاسىرەتپەن كەلەدى...
مۇحاممەت تىلەۋباي،
س.امانجولوۆ اتىنداعى ءشقۋ-نىڭ 4-كۋرس ستۋدەنتى
الماتى - تاۋەلسىزدىك تۇراعىسىڭ!
ايتايىن، تىڭداپ كورسەڭ جىر اعىسىن،
جاسىرماي بۇگىن بالاڭ قۋانىشىن.
كونە شاھار، تاريحتىڭ كوزى بولعان
الماتى – عاسىرلاردىڭ كۋاسىسىڭ.
قامداعان تالاي ۇلتتىڭ سۇرانىسىن،
كەنەزەسى كەپكەن جانعا بۇلاعىسىڭ.
جەلتوقساننىڭ جاندىرعان الاۋلى وتىن،
الماتى – ازاتتىقتىڭ شىراعىسىڭ.
قۇربان قىلعان قايراتتاي قىراعىسىن،
ەل مەن جۇرت ايتادى ءالى مىڭ العىسىن.
اقىنداردىڭ شەرلەنگەن ولەڭىمەن،
الماتى – بەيبىت كۇننىڭ ءجىر-انىسىڭ.
تاپپاعان ءومىرىنىڭ ءبىر ءمانىسىن،
ارىلار ساعان كەلسە كۇمانى شىن.
گۇلدەنگەن ءار كۇن سايىن سۇلۋ قالا،
الماتى – اسەمدىكتىڭ سىڭارىسىڭ.
شىعارعان تالاي مىقتى، كىل ارىسىن،
جان قيعان ۇلتىمىزدىڭ ءتىل، ارى ءۇشىن.
باستالعان ەگەمەندىك تاڭى سەندە،
الماتى – تاۋەلسىزدىك تۇراعىسىڭ...
ستۋدەنتتەردىڭ ولەڭ-توپتاماسىن ازىرلەگەن
س.امانجولوۆ اتىنداعى ءشقۋ-دىڭ
«سەمسەر» اقىندار مەكتەبىنىڭ جەتەكشىسى،
اقىن سەرىك قۇسانبايەۆ.
«Almaty-akshamۋ» №147 (6282) 13 جەلتوقسان، سەيسەنبى، 2022 جىل