جاقسىلىعىنا باقسا، التى كۇنگە، جاقسىلىعىنا باقپاسا، الپىس كۇنگە سوزىلاتىن ءقاۋىپتى «ءساۋىر امالى» كەلدى. «قىرىق ساۋىرىك، ءبىر مىرزا» دەپ اتالعان اتاقتى اڭىز وسى امالدىڭ ىشىندە.
«قىزىر قامشىسى» امالى اياقتالدى. كەشەدەن باستاپ «ءساۋىر» امالى كورىنىس بەردى. بۇرىنعى جۇلدىزشىلاردىڭ ايتۋىنشا، ايدىڭ 25-ىنە دەيىن جالعاسادى. «جاقسىلىعىنا باقسا، التى كۇنگە، جاقسىلىعىنا باقپاسا، الپىس كۇنگە سوزىلاتىن» اسا ءقاۋىپتى امال.
قاريالار ءساۋىر امالى كىرگەندە، بۇلتتى باقىلايدى. بۇلت ءتونىپ، ىدىراماسا، ءساۋىردىڭ بۇلتى قالىپ قويدى دەيدى. ول جىلى ءساۋىر امالى ۇزاققا سوزىلىپ، بۇلت ءتونىپ، مۇز جاۋادى. سوندىقتان «ءساۋىر بولماي، ءتاۋىر بولماس» دەگەن ءتامسىل قالىپتاسقان. ءساۋىردىڭ «قويشى»، «قۇسقاناتى» دەگەن جاناما اتتارى بار. اۋا رايىنىڭ ەرەكشەلىگى: كۇن جىلىنىپ، كوك شىققان كەزىندە اياقاستىنان اۋا رايى بۇزىلىپ، قارلى بوران بولۋى مۇمكىن ەكەن. «ءساۋىر بولماي، ءتاۋىر بولماس»، «ساۋىردە جاۋعان جاۋىنىڭ، ساۋىپ تۇرعان ساۋىنىڭ»، ت.ب. ماقال-ماتەلى، قاناتتى سوزدەرى بار.
ءساۋىر جاڭبىرىنىڭ ادامعا دا، تابيعاتقا پايداسى كوپ. جىلاننىڭ ۋى، بالىقتىڭ ءىنجۋى، ءتىپتى بال اراسىنىڭ بالى دا وسى جاڭبىر سۋىنان پايدا بولادى-مىس. ءساۋىر جاڭبىرى – دەرتكە داۋا، قيىنشىلىققا كەڭشىلىك، اۋرۋعا شيپا سۋ. سۋلاردىڭ ىشىندەگى ەڭ تازا سۋ – ءساۋىر جاڭبىرى. ءساۋىر جاڭبىرى سۋىمەن ۇيىتىلعان ايران وتە ماڭىزدى بولادى (تاجىريبەسى جاسالعان). ءساۋىر جاڭبىرىندا سۋلانعان كيىم شىرىمەيدى، شاش تۇسپەيدى، اسىرەسە، وقىلعان ءساۋىر جاڭبىرى قويانشىق اۋرۋىنا شيپا، پسيحولوگيالىق اۋرۋعا داۋا، ءتان اۋرۋىنا پايدالى. پەرزەنتتى بولماي جۇرگەندەر ىشسە، بالالى بولادى دەگەن حاديس تە بار ەكەن.
«ءساۋىر امالى وتپەي، ساۋىرىك پىشۋگە بولمايدى». ساۋىرىك (3-4 جاستاعى ۇيىرگە تۇسپەگەن) ايعىر. امالدىڭ وسىنداي ۇستانىمى بار. ءبىر مىسال: وسى امال كەزىندە ءبىر بايدىڭ قىسىراققا بولىنگەن بايتال ايعىرلارىن دالاعا – ورىسكە ايداپ اپارىپتى. ويلاماعان جەردەن داۋىل تۇرىپ، قار جاۋىپ، كۇن سۋىتىپ، جۇقا كيىنگەن باي مىرزاسى مەن 40 ساۋىرىك (ايعىر) سۋىقتان ولگەن دەلىنەدى. ەل ىشىندە وسى امال «قىرىق ساۋىرىك، ءبىر مىرزا» دەپ اتالىپ كەتسە كەرەك.
بۇگىن گريگوريانشا (قولدانىستاعى كۇنتىزبە) ءساۋىردىڭ 21ء-ى، مۇسىلمانشا (اي كۇنتىزبەسى بويىنشا) رامازاننىڭ 20-سى. قازاقى ەسەپكە (ەسكىشە) سۇيەنسەك، ايدىڭ 8ء-شى جاڭاسى. اپتا ايدىڭ العاشقى ونكۇندىگى مەن سوڭعى اپتاسىنا ءدال كەلىپ تۇر. دەمەك، اۋا رايىندا از دا بولسا اۋىتقۋشىلىق بار دەگەندى بىلدىرەدى. اسپان دەنەلەرىنىڭ قيمىل-قوزعالىسىنا بولجام جاسايتىن بولساق، كۇن ىسيدى، جاڭبىر جاۋادى. جوعارىدا ايتقانىمىزداي، ءساۋىر ايىنا دا، "ءساۋىر امالىنا" دا سەنىم جوق...